އަޒްމިރަލްދާ ވަކިކުރަން ނިންމީ "ކުޑަ ކޮމިޓީ" އިން އުފަންކުރި ހިޔާލީ ތުހުމަތުތަކެއްގެ މައްޗަށް ބިނާކޮށް
6 މެއި 2025 | އަންގާރަ 14:08ސުޕްރީމް ކޯޓުގެ ފަނޑިޔާރު އަޒްމިރާލްދާ ޒާހިރު މަގާމުން ވަކި ކުރަން ޖޭއެސްސީން ނިންމީ ކުޑަ ކޮމިޓީން އުފަންކުރި ހިޔާލީ ތުހުމަތުތަކެއްގެ މައްޗަށް
ފަނޑިޔާރު އަޒްމިރަލްދާ ޒާހިރު
ދިފާއުގައި ހުށަހެޅި ހެކިތައް ބަލައިނުގަތުމަށް ނިންމައި ސުޕްރީމް ކޯޓުގެ ފަނޑިޔާރު އަޒްމިރާލްދާ ޒާހިރު މަގާމުން ވަކި ކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން ނިންމީ އެ މައްސަލަ ތަހުގީގު ކުރި "ކުޑަ ކޮމިޓީ" އިން އުފަންކުރި ހިޔާލީ ތުހުމަތުތަކެއްގެ މައްޗަށް ބިނާކޮށްކަން ހާމަވެއްޖެ އެވެ.
ފަނޑިޔާރު އަޒްމިރާލްދާ ވަކިކުރަން ޖޭއެސްސީން ނިންމި ޑިސެމްބަރު 4، 2024، ގައި އޭނާގެ ފިރިމީހާ ޑރ. އިސްމާއީލް ލަތީފް "ޑައިމަންޑް ފިންގާސް" ނަމަކަށް ކިޔާ ސްޕާއެއްގެ ތެރެއިން ހައްޔަރުކުރި މައްސަލައިގައި އޭނާ ބަންދުން ދޫކޮށްލުމަށް ކްރިމިނަލް ކޯޓުގެ ގާޒީންނަށް ނުފޫޒު ފޯރުވި ކަމަށް ބުނެ އެވެ.
މި މައްސަލައާ ގުޅިގެން ހަމައެކަނި އަޒްމިރާލްދާ ގުޅުއްވީ އިސްމާއީލް ލަތީފްގެ ފަރާތުން އައްޔަނުކޮށްފައިވާ ވަކީލު އައްފާން ޝާފީއަށް ކަމަށާއި، އެ މައުލޫމާތު ލިބުނީ ވަކީލު މޫސާ އާލިމްގެ ފަރާތުން ކަމަށް ތަހުގީގުގައި އަޒްމިރާލްދާ ވަނީ ވިދާޅުވެފަ އެވެ.
އަޒްމިރާލްދާގެ ޤާނޫނީ ޓީމުން މިއަދު ބޭއްވި ނޫސްވެރިންގެ ބައްދަލުވުމުގައި ވެސް ވިދާޅުވެފައި ވަނީ 5 ޑިސެމްބަރު 2024 އަކީ މިއީ އެ މައްސަލާގައި ބަންދާއި މެދު ގޮތެއް ނިންމުމަށް އަޑުއެހުމެއް ބޭއްވި ދުވަސްކަމަށާއި އެދުވަހު ކަންހިނގަ ދިޔަގޮތް ޖޭއެސްސީއަށް ހުށަހެޅި ހެކިތަކުން ސާފުކޮށް ފެންނަން އޮތްކަމަށެވެ. އަދި ކަންހިގާ ދިޔަގޮތް ސާފުކޮށް އެނގޭވަރަށް ހެކި ވެސް ހުށައެޅިކަމަށެވެ.
5 ޑިސެމްބަރުގެ 7:47 ގައި މިވަގުތަކީ ފަނޑިޔާރު އަޒްމިރާލްދާ ޒާހިރަށް ފަނޑިޔާރުގެ ފިރިކަލުން އިސްމާއިލް ލަތީފު ބަންދުކުރިކަން އެނގުނު ގަޑި. އޭގެ ކުރިންރޭ ބަންދުކޮށް ފުލުހުންގެ ބެލުުގެ ދަށަށް ގެންދިޔަސް ފަނޑިޔާރަކަށް ފުލުހުން މެދުވެރިކޮށްވެސް ފިރިކަލުންގެ ފޯނު މެދުވެރިކޮށްވެސް އަދި އެހެން ފަރާތަކުންވެސް އެ މައުލޫމާތު ލިބިވަޑައިގެންފައެއް ނެތް. އެކަން އެނގުނީ އެ ގަޑީގަކަން އަޅުގަނޑުމެންނަށް އެނގޭނެ ހެކިތައް އަޅުގަނޑުމެން ހުށަހެޅިން. އައިޖީއެމްއެޗްގެ ޑރ. އިސްމާއިލް ލަތީފް ގެއަށް ވަޑައިނުގަންނަވައިގެން ފަނޑިޔާރު ޑޮކަޓަރުންނަށް ގުޅުއްވާ މެސެޖު ކުރައްވާ ހެއްދެވިކަން. އެ މެސެޖުތަކުގެ ސްކްރީން ޝޮޓް ވެސް އަޅުގަނޑުމެން ހުށަހެޅިން.ޑރ. އަޒްމިރާލްދާ ޒާހިރުގެ ގާނޫނީ ޓީމް
މި މައްސަލައިގައި އަޒްމިރާލްދާގެ ފަރާތުން ކްރިމިނަލް ކޯޓަށް ގުޅާފައިވަނީ ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު ކަމަށް ޖޭއެސްސީން ތުހުމަތު ކުރާއިރު މިކަން ވަނީ އަޒްމިރާލްދާގެ ގާނޫނީ ޓީމުން ވެސް ދޮގުކޮށްފައެވެ. އަދި ޚުދު އަޒްމިރާލްދާ ވެސް ވަނީ އެ ތުހުމަތުތައް ދޮގުކޮށްފައެވެ.
ފަނޑިޔާރުންތަކެއްގެ މައްސަލަ ބަލަން ފެށީ މަޖިލީހުގެ މެންބަރުން އިންތިޚާބުވި ޕާޓީން ވަކިވުމުންނާއި ވަކިކުރުމުން ވެސް ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ބާތިލުކުރަން އެދި ހުށަހަޅާފައި އޮތް މައްސަލަ ބަލަމުން އަންނަނިކޮށެވެ. ފަނޑިޔާރުން ސަސްޕެންޑުކުރީ އެ މައްސަލައިގެ އަޑުއެހުމެއް ފައްޓަން ކުޑަތަންވެފައި އޮއްވައެވެ.
އޭރު ސަސްޕެންޑުކުރި ފަނޑިޔާރުންގެ ތެރެއިން ހުސްނުއްސުއޫދު ވަނީ އަމިއްލަފުޅަށް އިސްތިއުފާދެއްވައިފައެވެ. އޭނާގެ ބަދަލުގައި ހައިކޯޓުގެ ފަނޑިޔާރުކަމުގައި ހުންނެވި ހުސައިން ޝަހީދު ވަނީ މިހާރު ސުޕްރީމް ކޯޓަށް އައްޔަންކޮށްފައެވެ.
ސަސްޕެންޝަންގައި ތިއްބެވި ފަނޑިޔާރު މަހާޒާއި އަޒްމިރަލްދާ ވެސް ތުހުމަތުތަކަށް އިންކާރުކުރައްވައެވެ.
ފަނޑިޔާރުން ވަކިކުރާ މައްސަލައިގައި ގިނަ ބަޔަކު އަންނަނީ ވަރަށް ބޮޑަށް ކަންބޮޑުވުން ފާޅުކުރަމުންނެވެ. އެކަން ކުރަނީ ސަރުކާރުން ސުޕްރީމް ކޯޓުގައި އޮތް ދުސްތޫރީ މައްސަލައަށް ނުފޫޒު ފޯރުވަން ކަމަށް އެ ބޭފުޅުން ތުހުމަތުކުރައްވައެވެ.
