އިސްރާއީލުގެ ބެން ގުރިއަން އެއާޕޯޓަށް އަމާޒުކޮށް ހޫތީން އިން ދިން ހަމަލާއާ ގުޅިގެން، އޭގެ ބަދަލުގައި އީރާނަށް ހަމަލާ ދޭނެ ކަމަށް އިސްރާއީލްގެ ބޮޑު ވަޒީރު ބެންޖަމިން ނަތަަންޔާހޫ ވިދާޅުވެއްޖެ އެވެ.

އާދީއްތަ ދުވަހު ނަތަންޔާހޫ ވިދާޅުވީ، އިސްރާއީލުން ކަނޑައަޅާ ވަގުތެއްގައި އަދި ކަނޑައަޅާ ތަނެއްގައި އިރާނަށް ޖަވާބު ދިނުމުގެ ގޮތުން ހަމަލާ ދޭނެ ކަމަށެވެ. 

ހޫތީން އިން ފޮނުވާލި މިސައިލް ހަމަލާގެ ސަބަބުން ބެން ގުރިއަން އެއާޕޯޓުގެ ޕާކިސް ސަރަހައްދުގައި ބޮޑު ވަޅުގަނޑެއް އުފެދުނު ކަމަށް ވަނީ ރިޕޯޓު ކޮށްފަ އެވެ. ނަމަވެސް، އެ އެއާޕޯޓުގެ އެހެން ސަރަހައްދަތަކަށް ނުވަތަ އިންފްރާސްޓްރަކްޗާ އަކަށް ގެއްލުމެއް ލިބިފައި ނުވާ ކަމަށް އިސްރާއީލްގެ އަސްކަރިއްޔާ އިން ވަނީ ބުނެފަ އެވެ.

އެ ހަމަލާ ދިން ވަގުތުގައި މިސައިލް އިންޓަސެޕްޓް ކުރުމަށް އެތައް ފަހަރެއްގެ މަތިން މަސައްކަތް ކޮށްފައިވާ ކަމަށާއި، އެހެން ނަމަވެސް އެކަން ކާމިޔާބު ކުރެވޭ ގޮތް ނުވި ކަމަށް ވެސް އިސްރާއީލްގެ އަސްކަރިއްޔާ އިން ވަނީ ބުނެފަ އެވެ. 

މިއީ އިސްރާއީލްގެ އެއާޕޯޓު ސަރަހައްދަށް މިސައިލް ހަމަލާއެއް އަމާޒުވި ފުރަތަމަ ފަހަރު ކަމަށް ރިޕޯޓުކޮށްފައިވެ އެވެ. މި ހަމަލާއާ ގުޅިގެން އެއާ އިންޑިއާ، ލުފްތަންޒާ، އައިޓީއޭ އެއާވޭސް   އަދި އެއާ ފްރާންސްގެ ފްލައިޓުތައް ވަނީ ވަގުތީ ގޮތުން ހުއްޓާލައިފަ އެވެ. އެހެން ނަމަވެސް، މިހާރު އެއާޕޯޓު ހިންގުން އާންމު ގޮތަށް ކުރިއަށް ގެންދާ ކަމަށް އިސްރާއީލްގެ އޭވިއޭޝަން އޮތޯރިޓީ އިން ވަނީ ބުނެފަ އެވެ.

އިސްރާއީލްގެ ދިފާއި ވަޒީރު އިސްރާއީލް ކާޓްޒް ވިދާޅުވެފައި ވަނީ، އިސްރާއީލަށް އަމާޒުކޮށް ހަމަލާ ދޭ ކޮންމެ ބަޔަކާ ދެކޮޅަށް، ހަތް ގުނަ ވަރުގަދަ ހަމަލާ އެ ޤައުމުން ދޭނެ ކަމަށެވެ.