ރަޝިޔާގެ ރައީސް ވްލަޑިމިއާ ޕުޓިން އަށް އެއްވެސް "އިނާމެއް" ނުލިބޭ ގޮތަށް، އިންސާފުވެރިކަމާ އެކު ހަނގުރާމަ ނިންމުމަށް، ޔުކްރެއިންގެ ރައީސް ވުލެޑިމިއަރ ޒެލެންސްކީ ގޮވާލައްވައިފި އެވެ.

ރަޝިޔާ އިން ޔުކްރެއިންގައި ހިންގަމުން އަންނަ ހަނގުރާމަ ނިންމުމަށް މަސައްކަތް ކުރަމުން އަންނައިރު، ރަޝިޔާ އިން ބޭނުން ވަނީ ޔުކްރެއިން އިން އެ ޤައުމުގެ ބައެއް ދޫކޮށްލުމަށެވެ. 

ނަމަވެސް ޒެލެންސްކީ ވަނީ، ޔުކްރެއިންގެ އެއްވެސް ސަރަހައްދެއް ރަޝިޔާ އަށް ދޫކޮށްލުމަށް ހުށަހެޅޭ ހުށަހެޅުންތަކަށް ދެކޮޅު ހައްދަވާ ކަމަށް ވިދާޅުވެފަ އެވެ.

ޕޮލެންޑުން އިންތިޒާމު ކޮށްގެން ބޭއްވި ސަމިޓެއްގައި ބައިވެރިވެ ވަޑައިގެން ވާހަކަ ދައްކަވަމުން ޒެލެންސްކީ ވިދާޅުވީ، އެންމެން ވެސް ބޭނުން ވަނީ އިންސާފުވެރި ގޮތެއްގައި ހަނގުރާމަ ނިންމުމަށް ކަމަށެވެ. އަދި އެއީ ޕުޓިން އަށް އެއްވެސް "އިނާމެއް" ނުލިބޭ ގޮތަށް ކަމަށާއި، ވަކިން ޚާއްސަކޮށް އެއްވެސް ބިމެއް ނުލިބޭ ގޮތަށް ކަމަށް އޭނާ ވިދާޅުވި އެވެ. 

ޒެލެންސްކީ މިހެން ވިދާޅުވިއިރު، ދާދި ފަހުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެފައި ވަނީ ރަޝިޔާ އަށް ކްރިމިއާ ދޫކޮށްލަން ޒެލެންސްކީ ތައްޔާރަށް ހުންނެވި ކަމަށް ޤަބޫލު ކުރައްވާ ކަމަށެވެ.

މީގެ ތިން އަހަރު ކުރިން ފެށުނު ހަނގުރާމައިގައި ރަޝިޔާ އިން ވަނީ ޔުކްރެއިންގެ 20 އިންސައްތަ ސަރަހައްދު އަތުލައިގެންފަ އެވެ. އަދި މި ހަނގުރާމައިގެ ސަބަބުން ވަނީ އެތައް ހާާސް ބަަޔަކު މަރުވެ، އިމާރާތްތަކަށް ގެއްލުންވެ، އިއާދަ ނުކުރެވޭ ވަރުގެ ގެއްލުން ތަކެއް ކުރިމަތިވެފަ އެވެ.