ހަމްނާ، ޤައުމީ ރެކޯޑެއް އައު ކޮށްފި

އަންހެން ފެތުންތެރިޔާ ހަމްނާ އަޙުމަދު، އަނެއްކާ ވެސް ޤައުމީ ރެކޯޑެއް އައު ކޮށްފި އެވެ.

ހަންގޭރީގައި ކުރިއަށް ދިޔަ 127 ވަނަ ނެޝަނަލް ޗެމްޕިއަންޝިޕުގައި ވާާދަކޮށް ހަމްނާ ރެކޯޑު އައު ކޮށްފައި ވަނީ، އަންހެނުންގެ ލޯންގް ކޯސް 200 މީޓަރު ބްރެސްޓް ސްޓްރޯކް އިވެންޓުގަ އެވެ. އެ ރެކޯޑު ހަމްނާ އައު ކޮށްފައި ވަނީ 03:03.69 އިން ރޭސް ފުރިހަމަ ކޮށްގެންނެވެ.

މި ފަހަރު ހަމްނާ އައު ކޮށްފައި ވަނީ ހަ އަހަރު ދުވަސްވީ ޤައުމީ ރެކޯޑެކެވެ. މިއީ 2019 ވަނަ އަހަރު އޮތް ވޯލްޑް ސްވިމިން ޗެމްޕިއަންޝިޕުގައި ވާދަކޮށް، އައިޝަތު ސާޖިނާ ހަދާފައިވާ ރެކޯޑެކެވެ.

މީގެ އިތުރުން ހަމްނާ ވަނީ ނުވަ އަހަރުވީ، އަންހެނުންގެ ލޯންގް ކޯސް 100 މީޓަރު ބްރެސްޓް ސްޓްރޯކްގެ ޤައުމީ ރެކޯޑު ވެސް އައު ކޮށްފަ އެވެ.