މާޒް ސަލީމްގެ ބަރަހަނާ ފޮޓޯ ނަގަން ކްރިމިނަލް ކޯޓުގެ އަމުރެއް ނެތްކަން ހާމަވެއްޖެ
28 އެޕްރީލު 2025 | ހޯމަ 13:29އަހުމަދު ސަލީމް ބަރަހަނާކޮށްގެން ފޮޓޯ ނެގުމަށް އެ ކޯޓުން އަމުރު ދޫކޮށްފައިވާކަމަށް ކޯޓު ރެކޯޑްތަކުން ނުދައްކާ
އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް) 13-03-2025 ގައި އެމްޑީޕީން ބޭއްވި މުޒާހަރާގައި ވާހަކަދައްކަވަނީ
ރައީސް ޑރ. މުހައްމަދު މުއިއްޒުގެ ދަރިކަލުންނާއި ގުޅުވައިގެން ދެއްކި ވާހަކައަށް ހިތްވަރު ލިބޭގޮތަށް ވާހަކަ ދެއްކިކަމަށް ބުނެ އަހުމަދު ސަލީމް (މާޒް ސަލީމް) ގެ ބަރަހަނާ ފޮޓޯ ނަގަން ފުލުހުން ކްރިމިނަލް ކޯޓުގެ އަމުރެއް ހޯދިކަމަށް ބުނި ވާހަކަ ދޮގުކަން ހާމަވެއްޖެއެވެ.
އެމްޑީޕީގެ ގައުމީ މަޖިލިސް މެންބަރު އަހުމަދު ސަލީމް (މާޒް ސަލީމް)ގެ ޖިންސީ ގުނަވަން ނޫން، ހަށިގަނޑުގެ ބޭރު ފޮޓޯ ނެގުމަށް ފުލުހުން ޗިޓް ފޮނުވާފައިވެއެވެ. ފުލުހުންގެ ޗިޓްގައި ބުނެފައިވަނީ ކުޑަކުއްޖެއްގެ ކަރާމާތަށް އުނިކަން އަންނަގޮތަށް މަރިޔަމް ޒުބައިރު (މަންދި) ވާހަކަ ދައްކާފައިވާކަމަށް ތުހުމަތުކުރެވިފައި ވަނިކޮށް، 2025 މާޗް 14 ވަނަ ދުވަހުގެ ރޭގެ ވަގުތެއްގައި، އެމްޑީޕީ އިން މާލޭގައި ކުރިއަށް ގެންދިޔަ، ލައިވްކޮށް ބްރޯޑްކާސްޓް ކުރަމުން ދިޔަ އެއްވުމެއްގައި މަންދި ދެއްކި ވާހަކައަށް ތާއިދުކޮށް، އެވާހަކަ ދެއްކުމަށް ހިއްވަރުދީ، ކުޑަކުއްޖެއްގެ ކަރާމާތަށް އުނިކަން އަންނަ ގޮތަށް މާޒް ވާހަކަ ދައްކާފައިވާ ކަމަށް ތުހުމަތު ކުރެވޭ މައްސަލައިގައި ކަމަށެވެ.
އަދި ކުރެވޭ ތުހުމަތުގެ ހުލާސާ ނުވަތަ ކުރަމުންދާ ތަހުގީގުގެ ހުލާސާގައި ބުނެފައިވަނީ މި މައްސަލައިގެ ތަހުގީގަށް، ކްރިމިނަލް ކޯޓުގެ އަމުރެއްގެ ދަށުން މާޒްގެ ޖިންސީ ގުނަވަން ފިޔަވައި ހަށިގަނޑުގެ ބޭރު ފޮޓޯ ނެގުމަށާއި، އަޑުގެ ސާމްޕަލް ނެގުމަށެވެ. ފުލުހުން ބުނީ މި މައްސަލައަކީ ޗިލްޑްރަންސް އޮމްބަޑަސްޕާސަންގެ އޮފީހުން ހުށަހަޅާފައިވާ، ކުޑަކުއްޖެއްގެ ކަރާމާތަށް އުނިކަން އަންނަ ގޮތަށް އާންމު ފަރާތްތަކުން ވާހަކަ ދައްކާފައިވާ ކަމަށް ތުހުމަތު ކުރެވޭ މައްސަލާގައި އެ ވާހަކަ އަށް ތާއީދުކޮށް، އެ ވާހަކަ ދެއްކުމަށް ހިތްވަރުދީ، ކުޑަކުއްޖެއްގެ ކަރާމާތަށް އުނިކަން ލިބޭ ގޮތަށް ވާހަކަ ދައްކާފައިވާ ކަމަށް ތުހުމަތު ކުރެވޭތީ ކަމަށެވެ.
ނަމަވެސް ޗިލްޑްރަންސް އޮމްބަޑަސްޕާސަންގެ އޮފީހުން އެފަދަ މައްސަލައެއް ބަލަން އެންގިކަމަށް ބުނާ ވާހަކަ ވަނީ ދޮގުކޮށްފައެވެ. އެ އޮފީހުން ނެރުނު ބަޔާނުގައި ބުނީ އެ ފަދަ އެއްވެސް މައްސަލައެެއް ތަހުގީގުކުރަން ފުލުހަށް ހުށަހަޅާފައި ނުވާނޭ ކަމަށެވެ. ޗިލްޑްރަންސް އޮމްބަޑްސްޕާސަން އޮފީހުން ނެރުނު ބަޔާނުގައި ބުނީ އޮފީހުގެ ފަރާތުން ފުލުހުންގެ އިދާރާއަށް ފޮނުވި ސިޓީގައި، އެ އިދާރާއިން އަމަލުކުރަންވީ ގޮތުގެ އެއްވެސް އިރުޝާދެއް، އަދި މިކަމާ ގުޅިގެން ޖިނާއީ ތަހުގީގެއް ކުރުމަށް އެދިފައެއް ނުވާނެ ކަމަށެވެ.
އަދި މާޒް ސަލީމް ވަނީ ކްރިމިނަލް ކޯޓުން އެފަދަ އަމުރެއް ފުލުހުން ހޯދިކަމަށް ބުނެފައިވާތީ އެ އަމުރު ހޯދުމަށް ކްރިމިނަލް ކޯޓުގައި އެދިފައެވެ. މިކަމާއި ގުޅިގެން ކްރިމިނަލް ކޯޓުން ބުނީ މާޒް ސަލީމް ހުށަހެޅި ސިޓީގައި، ކޮޕީ ހޯދުމަށް އެދިފަިއވަނީ އެ ކޯޓުގެ ކޮން ކޯޓު އަމުރެއްކަން ސާފު ނުވާތީ، ކޯޓު އަމުރުގެ ނަންބަރު ނުވަތަ ކޯޓު އަމުރު ނެރުނު ތާރީހުފަދަ މައުލޫމާތު ހިމެނޭހެން ސިޓީ ހުށަހެޅުއްވުމުން، ކޯޓު އަމުުރުގެ ކޮޕީ ދޫކުރުމާމެދު ކޯޓުން ގޮތެއް ނިންމާނެ ކަމަށެވެ.
އެހެންނަމަވެސް އަހުމަދު ސަލީމް ބަރަހަނާކޮށްގެން ފޮޓޯ ނެގުމަށް އެ ކޯޓުން އަމުރު ދޫކޮށްފައިވާކަމަށް ކޯޓު ރެކޯޑްތަކުން ނުދައްކާ ކަމަށެވެ.
ފުލުހުން ބުނީ މި މައްސަލައިގައި ހަށިގަނޑާއި އަޑުގެ ސާމްޕަލް ނަގަން އެދުނީ، ފުޓޭޖަކުން ނުވަތަ ވީޑިއޯއަކުން ފެންނަ މީހަކީ ވަކި މީހެއްތޯ ބެލުމަށް ކޮމްޕެރިސަން ހަދަން ނުވަތަ އަޑަކީ ވަކި މީހެއްގެ އަޑުކަން ދެނެގަތުމަށެވެ.
