މުއްޠަލިބާ ސުވާލު ކުރަން ނާޒިމް ފުރުސަތު ނުދޭތީ، މެމްބަރުންގެ ކަންބޮޑުވުން

ރައްޔިތުންގެ މަޖިލީހުގެ ޖަލްސާގައި މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަ ޑޮކްޓަރު ޢަބްދުﷲ މުއްޠަލިބާ ސުވާލު ކުރުމަށް، މަޖިލީހުގެ ނައިބު ރައީސް އަޙުމަދު ނާޒިމް ފުރުސަތު ނުދެއްވާތީ މެމްބަރުން ކަންބޮޑުވުން ފާޅު ކޮށްފި އެވެ.

ހޯމަ ދުވަހު އޮތް ރައްޔިތުންގެ މަޖިލީހުގެ ޖަލްސާ އަށް މުއްޠަލިބާ ވަޑައިގެންނެވީ، ވެލިދޫ ދާއިރާގެ މެމްބަރު މުޙައްމަދު އައްބާސް ކުރައްވާ ސުވާލާ ގުޅިގެންނެވެ.

މެމްބަރު އައްބާސްގެ ސުވާލަކީ، ނ.ޅޮހީގެ ފެނާއި ނަރުދަމާގެ މަސައްކަތް ފެށިގެން ކުރިއަށްދާތާ އެތައް ދުވަހެއްވީއިރު ވެސް އެ މަސައްކަތް ނިންމާލެވިފައި ނުވާތީ، އެ ނިޒާމުގެ ބޭނުން ރައްޔިތުންނަށް ކުރެވޭ ގޮތް ނުވާ ކަމަށެވެ. އެހެންކަމުން އެ މަސައްކަތުގެ ތެރެއިން ނުނިމި ހުރި މަސައްކަތް ނިންމުމަށް ފެއްޓޭނެ ތާރީޚަކާއި، މަސައްކަތް ނިންމައި، އެ ނިޒާމުގެ ބޭނުން ރައްޔިތުންނަށް ކުރެވޭނެ ތާރީޚެއް ބުނެދިނުން އެދޭ ކަމަށެވެ.

އެ ސުވާލަށް ޖަވާބު ދެއްވަމުން މުއްޠަލިބު ވިދާޅުވީ، އެ ރަށުގެ ފެނާއި ނަރުދަމާގެ މަސައްކަތަކީ ކުރީ ސަރުކާރުން ބަޔަކާ ހަވާލުކޮށްގެން ކުރިއަށް ގެންދާ މަސައްކަތެއް ކަމަށެވެ. ނަމަވެސް، އެއްބަސްވުމާ އެއް ގޮތަށް މަސައްކަތް ކުރިއަށް ނުދާތީ 2024 ވަނަ އަހަރު އެއްބަސްވުން ބާތިލު ކޮށްފައިވާ ކަމަށެވެ.

އަދި މިހާރު އެ މަސައްކަތް ހަވާލު ކޮށްފައި ވަނީ ފެނަކަ ކޯޕަރޭޝަނާ ކަމަށް ވެސް މުއްޠަލިބާ ވިދާޅުވި އެވެ. އަދި މަސައްކަތް ނިންމަން ހަވާލު ކޮށްފައިވާ ތާރީޚަކީ 2026 ވަނަ އަހަރުގެ ސެޕްޓެމްބަރު މަހުގެ ހަތަރު ވަނަ ދުވަސް ކަމަށެވެ. އަދި އެއްބަސްވުން ފެށުމާ އެކު، މަސައްކަތް ފެށިގެން ދާނެ ކަމަށް ވެސް އޭނާ ވިދާޅުވި އެވެ.

އެހެންކަމުން 2026 ވަނަ އަހަރުގެ ސެޕްޓެމްބަރު މަހުގެ ތެރޭގައި އެ މަސައްކަތް ނިންމައި، ރައްޔިތުންނަށް ޚިދުމަތް ލިބޭނެ ކަމަށް ލަފާ ކުރެވޭ ކަމަށް ވެސް މުއްޠަލިބާ ވިދާޅުވި އެވެ.

އިތުރު ސުވާލު ކުރުމުގެ ފުރުސަތުގައި އައްބާސް ވަނީ ފޮއްދޫގެ ބަނދަރުގެ އަމަލީ މަސައްކަތް ފަށާނެ ތާރީޚެއް ސާފު ކޮށްދެއްވުމަށް އެދިފަ އެވެ. އަދި ވެލިދޫ ބަނދަރުގެ މަސައްކަތް ހުއްޓިފައިވާތީ، އެކަމާ ގުޅޭ ގޮތުން ވެސް ސުވާލު ކޮށްފައިވެ އެވެ.

ނަމަވެސް، އެ ސުވާލާ ގުޅިގެން މުއްޠަލިބު ވިދާޅުވީ ހުރިހާ މަޝްރޫއަކަށް ޖަވާބު ދެއްވަން ފައްޓަވައިފި ނަމަ، ހުރިހާ މެމްބަރުންގެ ސުވާލު އަންނާނެ ކަމަށެވެ. އަދި ސުވާލު ކޮށްފައިވާ މަޝްރޫއާ ގުޅުން ނެތް އެހެން މަޝްރޫއާ ގުޅިގެން ސުވާލު ކުރުމުން ޖަވާބު ދޭން އުނދަގޫ ކަމަށް ވެސް ވިދާޅުވި އެވެ.

އޭގެ ފަހުން ގިނަ އެހެން މެމްބަރުން މުއްޠަލިބާ ކުރި ސުވާލަކަށް ޖަވާބު ދޭން ނާޒިމް ފުރުސަތު ދެއްވާފައި ނުވެ އެވެ. ނާޒިމް ވިދާޅުވަމުން ގެންދެވީ މިއަދުގެ ސުވާލާ ގުޅުން ހުރި ދާއިރާގެ ސުވާލަކަށް ނުވާތީ، އެ ސުވާލަށް ފުރުސަތު ނުދެއްވާނެ ކަމަށެވެ.

އެގޮތުން ގަލޮޅު ދެކުނު ދާއިރާގެ މެމްބަރު މީކާއީލް އަޙުމަދު ނަސީމް، ހަނިމާދޫ ދާއިރާގެ މެމްބަރު ޢަބްދުލް ޣަފޫރު މޫސާ، ކެލާ ދާއިރާގެ މެމްބަރު ޢަބްދުﷲ ޝަރީފު، ކޮލަމާފުށި ދާއިރާގެ މެމްބަރު އިބްރާހީމް ދީދީ، ކެންދޫ ދާއިރާގެ މެމްބަރު މައުރޫފް ޛާކިރު ކުރެއްވި ސުވާލަށް ޖަވާބު ދެއްވަން ވެސް ނާޒިމް ފުރުސަތެއް ނުދެއްވަ އެވެ.

އެކަމާ ގުޅިގެން މަޖިލީހުގެ މެމްބަރުން ގެންދެވީ ކަންބޮޑުވުން ފާޅު ކުރަމުންނެވެ. އެގޮތުން ވަޒީރާ ސުވާލު ކުރަނީ ފެނާއި، ނަރުދަމާއާ ގުޅުުން ހުރި މަޝްރޫއުތަކުގެ ސުވާލު ކަމަށާއި، އެ ސުވާލުތަކަށް ފުރުސަތު ދެއްވަން ވާނެ ކަމަށް މެމްބަރުން ވަނީ ވިދާޅުވެފަ އެވެ.