ސްޕެނިޝް ކޮޕަ ޑެލް ރޭގެ ފައިނަލްގައި ވާދަވެރި ރެއާލް މެޑްރިޑު ބަލިކޮށް، ބާސެލޯނާ އިން މުބާރާތުގެ ޗެމްޕިއަންކަން ހޯދައިފި އެވެ.

ހޮނިހިރު ދުވަހުގެ ރޭ ރެެއާލާ ދެކޮޅަށް ކުޅުނު ފައިނަލް މެޗު ބާސެލޯނާ އިން ކާމިޔާބު ކުރީ 3-2 އިންނެވެ. މެޗުގައި ބާސެލޯނާ އިން ލީޑު ނަގާފައި ވަނިކޮށް، ރެއާލް އިން ވަނީ ފަހަތުން އަރައި ނަތީޖާ ހަމަހަމަކޮށް، ލީޑު ވެސް ނަގައިފަ އެވެ. ނަމަވެސް ފަހުން އިތުރު ދެ ލަނޑު ޖަހައިގެން ބާސެލާނާ ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 28 ވަނަ މިނެޓުގައި ބާސެލޯނާ އަށް ލީޑު ނަގައިދިނީ ޕެޑްރީ އެވެ. އެއީ ލަމީން ޔަމާލް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ނަމަވެސް ދެ ވަނަ ހާފުގައި، މެޗުގެ 70 ވަނަ މިނެޓުގައި ރެއާލަށް ނަތީޖާ ހަމަހަމަ ކޮށްދިނީ ބަދަލަކަށް ކުޅެން އެރި ފްރާންސްގެ ކީލިއަން އެމްބާޕޭ އެވެ. އޭގެ ހަތް މިނެޓު ފަހުން ރެއާލުން މެޗުގައި ލީޑު ނެގީ އައުރެލިއަން ޗުއަމެނީ ޖެހި ލަނޑުންނެވެ.

މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް ފެރާން ޓޮރޭސް ޖެހި ލަނޑުން، ބާސެލޯނާ ނަތީޖާ ހަމަހަމަ ކުރި އެވެ. މެޗުގެ ނަތީޖާ ނެރުމަށް ކުޅުނު އިތުރު ވަގުތުގެ ދެ ހާފުގައި ބާސެލޯނާ މޮޅުވީ ޖޫލްސް ކޫންޑޭ ޖެހި ލަނޑުންނެވެ.

މެޗުން މޮޅުވެ ބާސެލޯނާ އިން ކޮޕަ ޑެލް ރޭ ކާމިޔާބު ކޮށްފައިވާއިރު، މިއީ ބާސެލޯނާ އިން އެ މުބާރާތް ކާމިޔާބު ކުރި 32 ވަނަ ފަަަހަރެވެ. ބާސެލޯނާ އަކީ އެ މުބާރާތުގެ އެންމެ ކާމިޔާބު ޓީމެވެ.