ގާސިމްގެ ހުކުމާމެދު ރައީސް މައުމޫނު ކަންބޮޑުވުން ފާޅުކުރައްވައިފި
25 އޯގަސްޓު 2017 | ހުކުރު 12:02ކޮންމެ މީހަކަށްމެ އެމީހެއްގެ ދިފާއުގައި ކޯޓަށް ހާޒިރުވެ ބަސްބުނުމެ ހައްގު އޮންނަންވާނެ
ގާސިމް ހޮސްޕިޓަލްގައި އެޑްމިޓްކުރެވިފައިވަނިކޮށް ރައީސް މައުމޫނު އެމަނިކުފާނަށް ޒިޔާރަތް ކުރެއްވުން
ބުރާސްފަތި ދުވަހުގެ ރޭ ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ މައްޗަށް އޭނާގެ ޣައިރު ހާޒިރުގައި އިއްވި ހުކުމާމެދު ކުރީގެ ރައީސް މައުމޫނު އަބުދުލްގައްޔޫމް ކަންބޮޑުވުން ފާޅުކުރައްވައިފިއެވެ.
ރައީސް މައުމޫނު ހުކުރު ދުވަހު ކުރެއްވި ޓްވީޓެއްގައި ވިދާޅުވީ، ދައުވާ ލިބޭ ކޮންމެ މީހަކަށްމެ އެ މީހެއްގެ ދިފާއުގައި ކޯޓަށް ހާޒިރުވެ ބަސްބުނުމެ ހައްގު ގާނޫނު އަސާސީން ކޮންމެ މީހަކަށްމެ ލިބިގެންވާކަމަށެވެ. އަދި އެ ހައްގުން ގާސިމް އިބްރާހިމަށް ލިބިފައި ނުވާތީ އެ މަނިކުފާނު ވަނީ ކަންބޮޑުވެވަޑައިގަންނަވާކަން ހާމަކުރައްވާފައެވެ.
ރައީސް މައުމޫނު ވިދާޅުވީ، އެ ހައްގަކީ، ގާނޫނު އަސާސީގެ 42 އަދި 51 ވަނަ މާއްދާގެ ދަށުން ހަމަ ކޮންމެ ރައްޔިތަކަސްމެ ލިބިދީފައިވާ އަސާސީ ހައްގެއްކަމަށެވެ.
ރައީސް މައުމޫނު މި ޓްވީޓް ކުރައްވާފައި މިވަނީ ޖުމްހޫރީ ޕާޓީގެ ލީޑަރު ގާސިމް އިބްރާހިމް އާލާސްކަންފުޅާ އޮންނަވަނިކޮށް ޣައިރު ހާޒިރުގައި އެމަނިކުފާނުގެ މައްޗަށް ރިޝްވަތު ދިނުމަށް ހުށަހެޅުމުގެ ކުށް ސާބިތުވާކަމަށް ކަނޑައަޅައި ތިން އަހަރާއި ދެ މަހާއި 12 ދުވަހަށް ޖަލަށް ލުމަށް ކްރިމިނަލް ކޯޓުން ކުރި ހުކުމާ ގުޅިގެންނެވެ.
މިހުކުމާއެކު ޤާސިމް އިބްރާހީމް ފުރުއްވަމުން ގެންދެވި ރައްޔިތުންގެ މަޖިލީހުގެ ގޮނޑި ގެއްލިގެންދާނެއެވެ. ގާނޫނު އަސާސީގެ 73 ވަނަ މާއްދާގައި ބުނާ ގޮތުން ޖިނާއީ ކުށެއް ސާބިތުވެ 12 މަސްދުވަހަށް ވުރެ ދިގު މުއްދަތެއްގެ ހުކުމެއް ތަންފީޒުކުރަން ޖެހިއްޖެނަމަ ރައްޔިތުންގެ މަޖިލީހުގެ މެންބަރުކަމުގެ ގޮނޑި ގެއްލޭއެވެ.
އާލާސްކަންފުޅާ އޮންނަވަނިކޮށް ގާސިމްގެ ޣައިރު ހާޒިރުގައި އިއްވި ހުކުމަކީ ގާނޫނުއަސާސީއާއި ޚިލާފް ހުކުމަކަށްވާތީ އެ ހުކުމާއިމެދު ވަކީލުންވަނީ ކަންބޮޑުވުން ފާޅުކުރައްވާފައެވެ.
