ޔުމްނު އަށް އިންސާފު ހޯދުމަށް ގޮވާލައި ޕެޓިޝަނުގައި 6،000 އަށްވުރެ ގިނަ މީހުން ސޮއިކޮށްފި
ޔުމްނު ވެއްޓިފައި އޮއްވާ ފެނުނު މައްސަލާގައި ސަރުކާރު އިދާރާތަކުގެ އިހުމާލު ވީކަމަށް ތުހުމަތުކޮށް މުޒާރާތަކުގެ އިސްވެރިން އިސްތިއުފާ ދިނުމަށް ވަނީ ގޮވާލާފައި
ހުކުރު ދުވަހުގެ ރޭ ކުރިއަށް ގެންދިއަ ޒުވާނުންގެ މުޒާހަރާގެ ތެރެއިން
އޭޕްރިލް 18 ވަނަ ދުވަހުގެ ރޭ ހެންވޭރު ފެންޓެނޯއީގޭގެ ނުވަނަ ފަންގިފިލައިން ފުރާޅުމައްޗަށް ވެއްޓިފައި އޮއްވާ ފެނުނު އުމުރުން 21 އަހަރުގެ ހައްވާ ޔުމްނު ރަޝީދަށް އިންސާފު ހޯދައިދިނުމަށް ގޮވާލައި 6،000 އަށްވުރެ ގިނަ މީހުން ޕެޓިޝަންގައި ސޮއިކޮށްފި އެވެ.
އޮންލައިންކޮށް ސޮއިކުރަމުންދާ މި ޕެޓިޝަނުގައި މި ވަގުތާ ހަމައަށް 6،727 މީހަކު ވަނީ ސޮއިކޮށްފަ އެވެ.
ޒުވާނުން އިސްނަގައިގެން ސޮއިކުރަންފެށި މި ޕެޓިޝަންގައި ވަނީ ޔުމްނު އަށް އިންސާފު ހޯދައިދިނުމަށާއި ދެފުށް ފެންނަ ތަހުގީގެއް ހިންގުމަށް ގޮވާލާފަ އެވެ.
މީގެ އިތުރުން ތަހުގީގުގެ ހުރިހާ ހޯދުންތަކެއް އާންމުކުރުމަށާއި ޔުމްނު އަށް އިންސާފު ހޯދައިދިނުމަށް އެކުގައި ޝާމިލްވާ އެންމެން އިންސާފުގެ ކުރިމައްޗަށް ގެނައުމަށްވެސް ގޮވާލާފައިވެ އެވެ. އަދި ބައިނަލްއަގްވާމީ އިންސާނީ ހައްގުތަކާ ބެހޭ ޖަމިއްޔާތަކުން މި މައްސަލަ ގާތުން ބެލުމަށް ވެސް ޕެޓިޝަނުގައި ހިމަނާފައިވެ އެވެ.
ޔުމްނު ވެއްޓިފައި އޮއްވާ ފެނުނު މައްސަލައިގައި ފުލުހުންނާއި އިދާރާތަކުގެ އިހުމާލު ވާކަމަށް ބުނެ ގިނަ އަދަދެއްގެ ޒުވާނުން ދަނީ މަގުތަކަށް އެއްވެ މުޒާހަރާ ކުރަމުންނެވެ. އެގޮތުން ސިލްސިލާކޮށް ކުރިއަށް ގެންދާ އެ މުޒާހަރަތާކުގައި ހުކުރު ދުވަހުގެ ރޭ ވެސް ވަރަށް ގިނަ ބަޔަކު ވަނީ މުޒާހަރާގައި ބައިވެރިވެފަ އެވެ. އަދި މި މައްސަލައަށް އިހުމާލުވާ ސަރުކާރު އިދާރާތަކުގެ އިސް ވެރިންގެ އިސްތިއުފާއަށްވެސް ވަނީ ގޮވާލާފަ އެވެ.
މީގެ އިތުރުން ރޭގެ މުޒާހަރާގައި ޒުވާނުންގެ ގިނަ ޑިމާންޑްތަކެއް އިއްވާފައިވެ އެވެ. އެގޮތުން 10 ޑިމާންޑެއް ވަނީ އިވާފައި އެވެ. އޭގެތެރޭގައި ފުލުހުން ކުރިއަށްގެންދާ އިންވެސްޓިގޭޝަން މިނިވަން ކަމާއި އެކު ކުރިއަށް ގެންދިއުންމަށާއި މިމައްސަލާގައި ތުހުމަތު ކުރެވޭ ނެޕޯ ބޭބީސް ހައްޔަރު ކޮށް ޕްރޮސެކިއުޓްކުރުމަށާއި އަދި ފުލުހުން ދޮގު ހެދުން ހުއްޓާލާ، މިހާދިސާގެ ރަނގަޅު މައުލޫމާތުދިނުން ފަދަ ޑިމާންޑް ތައް މުޒާހަރާގެ ބައިވެރިން ވަނީ އިއްވާފައެވެ.
ޔުމްނު ވެއްޓިފައި އޮއްވައި ފެނުނު މައްސަލައާ ގުޅިގެން އޭނާއާ އެކު އެ ވަގުތު އުޅުނު ގ. އެރިޔަދޫ، ރައުދު އަހްމަދު ޒިލާލް، 21 ވަނީ ހައްޔަރުކޮށްފަ އެވެ. އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ފަސް ދުވަސް ވަނީ ޖަހާފަ އެވެ.
ފުލުހުން މި މައްސަލާގައި އެކި ފަހަރު އެކި ގޮތަށް މައުލޫމާތު ދީފައިވާއިރު، ރައުދު ބަންދުގައި ބެހެއްޓުމަށް ނެރުނު ކޯޓު އަމުރުގައި ވާގޮތުން ޔުމްނު ވެއްޓުމުގެ ކުރިން އެރޭ ރައުދުއާއި ޔުމްނުއާ ދެމެދު ހަމަނުޖެހުމެއް ހިނގާފައިވެ އެވެ.
އަދި ޔުމްނު ވެއްޓުނު ކަމަށް ބެލެވޭ ވަގުތުގެ އިރުކޮޅެއް ފަހުން ޔުމްނު ކޮބައިތޯ ސުވާލުކުރުމުން ނޭނގޭ ކަމަށާއި ވެއްޓުނީ ކަމަށް ބެލެވޭ ކަމަށް ރައުދު ބުނެފައިވާ ކަމަށް ވެސް ކޯޓުގައި ފުލުހުން ބުނެފައިވެ އެވެ.
ފުލުހުން ރައުދު ހައްޔަރުކުރުމަށް ކޯޓުގައި އަމުރަކަށް އެދުނު އިރު ޔުމްނު ވެއްޓުމުގައި އޭނާގެ ބައިވެރިވުން އޮތް ކަމަށް ބެލެވޭ ކަމަށް ތުހުމަތުކޮށްފައިވެ އެވެ. އަދި ހާދިސާ ހިނގި ވަގުތު އޭނާގެ މަސްތުގެ ހާލަތުގައި ހުރުމާއި ޖިންސީ ބޭނުންހިފުމުގެ ކުށަށް އަރައިގަތުމުގެ ތުހުމަތު ވެސް ކޮށްފައިވެ އެވެ.
ހ. ފެންޓޯނިއާގެއާ ޖެހިގެން ހުރި ގުދަނެއްގެ ފުރާޅުމައްޗަށް ޔުމްނު ވެއްޓިފައި އޮއްވައި ފެނުނު މި މައްސަލައިގެ ތަހުގީގުގައި މިހާރު ވަނީ އޭނާއާ އެކު އެރޭ އުޅުނު ކަމަށް ބެލެވޭ މީހުން ދެނެގަނެ، އެ އެންމެންގެ ބަޔާން ނަގައި އެ މީހުންގެ ފުރުން މަނާކޮށްފަ އެވެ.
އަދި މައްސަލައާއި ގުޅުން ހުރި ނުވަ މީހެއްގެ ފޯނުވެސް މިހާރު ހިފަހައްޓާފައިވާ ކަމަށް ފުލުހުން ވަނީ ބުނެފައެވެ.
