ހައްގުތައް ކަށަވަރުކޮށްދިނުމަށް ގޮވާލާ ބޭއްވުމަށް ތައްޔާރުވަމުން އަންނަ "މޭޑޭގެ މުޒާހަރާ" އަންނަ މޭމަހުގެ އެއްވަނަ ދުވަހުގެ ރޭ އާޓިފިޝަލް ބީޗުގައި ބޭއްވުމަށް އިދިކޮޅު ޕާޓީ އެމްޑީޕީން ނިންމައިފި އެވެ.

އެމްޑީޕީން މިކަން އިއުލާނު ކުރީ ހުކުރު ދުވަހު އެ ޕާޓީގެ އޮފީހުގައި ނޫސްވެރިންނަށް މައުލޫމާތު ދެމުންނެވެ.

ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ ކޮންމެ އަހަރަކުވެސް މޭހަމަހުގެ އެއްވަނަ ދުވަހު ބާއްވަމުން އަންނަ މޭޑޭ މުޒާހަރާ މި އަހަރުގައި ވެސް އޮންނާނެ ކަމަށެވެ. އެގޮތުން އަންނަ ބުރާސްފަތި ދުވަހުގެ ރޭ އާޓީފިޝަލް ބީޗުގައި އެ މުޒާހަރާ އޮންނާނެ ކަމަށް އޭނާ ވިދާޅުވިއެވެ.

ބިގޭ ވިދާޅުވީ މި ސަރުކާރުގެ ކަންކަން ބޮއްސުންލައިގެން ގޮސްފައިވާ ކަމަށާއި ރައްޔިތުންނަށް މަންފާއެއް ހުރި އެއްވެސް ކަމެއް މި ސަރުކާރުން ކުރަމުން ނުގެންދާ ކަމަށެވެ. އެގޮތުން ކަރަންޓު ސަބުސިޑީއާއި ބޭސް ފަރުވާގެ ނަމުގައި ވެސް މި ސަރުކާރުން ހަދަނީ މުޅިން ދޮގުކަމަށް އޭނާ ވިދާޅުވިއެވެ.

ބިގޭ ވިދާޅުވީ މި ހުރިހާ ކަމެއް ވެސް ހުށްޓުވޭނީ އިދިކޮޅު ފަރާތްތަކުން ނުކުމެ އަޑު އުފުލައިގެން ސަރުކާރު ޖަވާބުދާރީ ކޮށްގެން ކަމަށެވެ.

މީގެ އިތުރުން ބިގޭ ވިދާޅުވީ ދާދި ފަހުން ފުރާޅެއްގެ މައްޗަށް ވެއްޓި އަނިޔާވި އުމުރުން 21 އަހަރުގެ ޔުމްނުއަށް އިންސާފު ހޯދައި ދިނުމަށް އެމްޑީޕީއިން ކުރުވެން ހުރި ކަންކަން ވެސް ކުރާނެ ކަމަށެވެ.