ފުރާޅެއްގެ މައްޗަށް ވެއްޓިފައި އޮއްވައި ފެނުނު އުމުރުން 21 އަހަރުގެ ހައްވާ ޔުމްނު ރަޝީދަށް އިންސާފު ހޯދުމަށް ފުލުހުންގެ އިދާރާ ކައިރިއަށް އެއްވެ ގިނަ ބަޔަކު އިހްތިޖާޖްކުރަން ފަށައިފި އެވެ.

'ދުލެއް ނުކުރާނަން' މިނަމުގައި ކުރިއަށްގެންދާ އިހްތިޖާޖްގެ ބައިވެރިން ވަނީ މިކަމުގައި ޒިންމާވާނީ ކާކުތޯ އާއި މެދު ސުވާލު އުފައްދާފައެވެ. 'ދުލެއް ނުކުރާނަން' މިނަމުގައި ޔުމްނުއަށް އިންސާފް ހޯދައިދިނުމަށް ކުރިއަށް ގެންދާ އިހްތިޖާޖުގައި ގިނަ އަދަދެއްގެ ޒުވާނުން ބައިވެރިވެފައިވެއެވެ.

އާދަމް ހަލީމް ކްރިމިނަލް އިންވެސްޓިގޭޝަން ކައިރީގައި ކުރިއަށްދާ މި އިޙްތިޖާޖުގައި ބައިވެރިން ގޮވާލާފައި ގޮވާލާފައިވަނީ، މިހާދިސާ ތަޙްޤީޤް ކުރަން ތިބި ފުލުހުން ކޮބައިތޯއާއި މިހާދިސާ ތަހްގީގް ކުރުމުގައި ފުލުހުން ފެއިލްވެފައިވާ ކަމަށެވެ. އަދި ހައްވާ ޔުމްނާ މަރުވާން ދޫކޮށްލި މީހުން ހައްޔަރު ކުރުމަށާއި މިކަމުގައި ޝާމިލްވާ ހުރިހާ ފަރާތްތައް ހައްޔަރުކޮށް އިންސާފް ހޯދައިދިނުމަށެވެ.

ބުރާސްފަތި ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ޕޮލިސް ކޮމިޝަނަރ އަލީ ޝުޖާއު ވިދާޅުވީ މިހާދިސާގެ ތަހްގީގް ލަސްކަމަށް ގަބޫލުކުރައްވާ ކަމަށާއި އަދި ބުދަ ދުވަހުރޭ އިހްތިޖާޖްކުރަން ފުރުޞަތު ދިނީ މިކަންކަމުގައި ހުރި ސީއަރަސްކަން ހުރިހާ ފުލުހުންނަށްވެސް އަންގައިދިނުމުގެ ގޮތުން ކަމަށެވެ. އަދި މިފަދަ ޝުއޫރުތައް ފުލުހުން ބަލައިގަންނާނެ ކަމަށް ސީޕީ ވިދާޅުވެފައިވެއެވެ.

މިކަމާއި ގުޅިގެން ގިނަ ބަޔަކު ދަނީ ސީޕީގެ އިސްތިއުފާއަށްވެސް ގޮވާލަމުންނެއެވެ.

ޔުމްނު އަމިއްލައަށް ފުންމާލީ ކަމަށް ފުލުހުން ބުނެފައިވާ ވާހަކަތަކަށް ގިނަ ބަޔަކު ދަނީ ފާޑު ކިޔަމުންނެއެވެ. ފުލުހުން ކިޔައިދިން ގޮތުގައި އެރޭ ޔުމްނުއާ އެކު އިތުރު ހަތް މީހަކު އުޅުނެވެ. އެއީ، ޖުމުލަ ތިން އަންހެނުންނާއި ފަސް ފިރިހެނުންނެވެ.

މި ހާދިސާއާ ގުޅޭ ގިނަ މައުލޫމާތު ފުލުހުން ހެއްކާއެކު ދައްކާފައިވާއިރު، ހެކީގެ ގޮތުގައި އަޑާއެކު ދެއްކީ ސީސީޓީވީ ފުޓޭޖުތަކެކެވެ. އަދި މިމައްސަލާގައި ހައްވާ ޔުމްނު ރަޝީދާއެކު އުޅުނު، ރައުދު އަހުމަދު ޒިލާލު ވަނީ ކޯޓް އަމުރެއްގެ ދަށުން ހައްޔަރުކޮށްފައެވެ.

ފުލުހުންގެ ތަޙްގީގު ލަސްކަމަށް ބުނެ ގިނަ ބަޔަކު ދަނީ ފުލުހުންގެ އިދާރާއަށް ފާޑުކިޔަމުންނެއެވެ.