ޔުމްނު ފުރާޅަށް ވެއްޓުނު ހާދިސާއާ ގުޅިގެން އެޗްއާރްސީއެމުން ބަހެއް ނުބުނި!
ޔުމްނުގެ ފުރާޅަށް ވެއްޓުނު ހާދިސާގެ ތަހުގީގަށް ވަރަށް ބޮޑަށް ނުފޫޒު ފޯރުވާފައިވާ ކަމަށް ތުހުމަތު ކުރޭ
އެޗްއާރްސީއެމްގެ މެންބަރުން
ހ. ފެންޓެނޯއީ ގޭގެ މަތީ ފްލޯއެއްގެ ފެންލައިޓުން 21 އަހަރުގެ ހައްވާ ޔުމްނު ރަޝީދު ވެއްޓުނު ހާދިސާއާ ގުޅިގެން ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) ބަހެއް ނުބުނެއެވެ.
މިހާދިސާއާ ގުޅިގެން ރާއްޖެއެމްވީން އެޗްއާރްސީއެމްގެ ބަހެއް ހޯދުމަށް މީޑިއާ އޮފިޝަލް އަދި މެންބަރުންނަށް ގުޅި ނަމަވެސް ޖަވާބެއް ދެއްވާފައިނުވެއެވެ.
ޔުމްނުގެ ފުރާޅަށް ވެއްޓުނު ހާދިސާގެ ތަހުގީގަށް ސަރުކާރުން ވަރަށް ބޮޑަށް ނުފޫޒު ފޯރުވާފައިވާ ކަމަށް ބުނެ ގިނަ ބައެއްގެ ފާޑުކިޔުން ފުލުހުންނަށް ވަނީ އަމާޒުވެފައެވެ. އަދި 23 އޭޕްރީލް ވީ ބުދަ ދުވަހުގެ ރޭ ގިނަ އަދަދެއްގެ ޒުވާނުން ވަނީ އާދަމް ހަލީމް ކްރިމިނަލް އިންވެސްޓިގޭޝަން ކައިރީގައި އިންސާފަށް ގޮވާލައި، ބޮޑު މުޒާހަރާއެއް ކޮށްފައެވެ. އެ މުޒާހަރާގައި އެޗްއާރްސީއެމް މެންބަރުންގެ އިސްތިއުފާއަށް ގޮވާލާފައިވެއެވެ. އަދި އެޗްއާރްސީއެމް ވެސް ސިޔާސީ ވެފައިވާ ކަމަށް ތުހުމަތުކޮށްފައިވެއެވެ.
އާއްމު ގޮތެއްގައި ސަރުކާރާ ގުޅުންހުރި ފަރާތްތަކާއި، ސަރުކާރުގެ މަސްލަހަތު ހިމެނޭ ކަންކަމުގައި އެޗްއާރްސީއެމުން ކަންބޮޑުވުން ފާޅުކުރުމާއި، ކުށްވެރިކޮށް ބަޔާންތައް ނެރޭ ކަމަށް ގިނަ ބަޔަކު ދަނީ ބުނަމުންނެވެ. ޔުމްނުގެ ކޭސްގައި އެޗްއާރްސީއެމުން މިހާތަނަށް ވެސް ބަހެއް ބުނެފައިނުވާއިރު، އެންމެފަހުން އެކޮމިޝަނުން ކަންބޮޑުވުން ފާޅުކޮށް ބަޔާނެއް ނެރިފައިވަނީ ރައީސް ޑރ.މުހައްމަދު މުއިއްޒުގެ ދޮށީ ދަރިކަލުން ވާހަކަ އެމްޑީޕީގެ މުޒާހަރާއެއްގައި ދެއްކި ކަމަށް ބުނެއެވެ.
ޔުމްނު ފުރާޅަށް ވެއްޓުނު ހާދިސާގެ މައުލޫމާތު ފުލުހުން ސިއްރު ކުރަން މަސައްކަތް ކުރި ކަމަށް ވެސް ގިނަ ބަޔަކު ދަނީ ބުނަމުންނެވެ. އޭނާ ފުރާޅު މައްޗަށް ވެއްޓިފައި އޮއްވާ ފެނުނީ 18 އޭޕްރީލް 2025 ވަނަ ދުވަހުގެ ހެނދުނުގެ ވަގުތެއްގައެވެ.
