ޔުމްނުއާއެކު އުޅުނު، ރައުދު ހައްޔަރުކުރުމަށް ކޯޓު އަމުރަކަށް އެދިއްޖެ
ރައުދުގެ ފަރާތުން އެއްބާރުލުން ނުލިބޭ
ފުލުހުން އާއްމު ކުރި ސީސީޓީވީ ފުޓޭޖުން ފެންނަ ރައުދު އަހުމަދު ޒިލާލު
ހ. ފެންޓެނޯއީ ގޭގެ މަތިން ފުރާޅު މައްޗަށް ވެއްޓުނު 21 އަހަރުގެ ހައްވާ ޔުމްނު ރަޝީދާއެކު އުޅުނު،ރައުދު އަހުމަދު ޒިލާލު ހައްޔަރު ކުރަން ކޯޓު އަމުރަކަށް އެދެފި އެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި، ޑެޕިއުޓީ ކޮމިޝަނާ އޮފް ޕޮލިސް އިސްމާއިލް ނަވީން ވިދާޅުވީ މައްސަލައިގައި ރިވިއު ޓީމުން ކުރާ މަސައްކަތަށް ރައުދުގެ ފަރާތުން އެއްބާރުލުން ނުލިބޭ ކަމަށާއި، އޭނާ ހައްޔަރުކުރުމަށް މިހާރު ކޯޓު އަމުރަށް އެދިފައިވާ ކަމަށެވެ.
ޔުމްނު ފުރާޅަށް ވެއްޓުނު ހާދިސާގައި ފުލުހުން އަމަލުކޮށްފައިވަނީ ތަފާތުކޮށް ކަމަށް ބުނެ، ގިނަ ބައެއްގެ ފާޑުކިޔުން ފުލުހުންގެ އިތުރުން ސަރުކާރަށް ވަނީ އަމާޒުވެފައެވެ.
މި މައްސަލައާ ގުޅިގެން ފުލުހުން ފުރަތަމަ ވަނީ ރައުދު ފުލުހުންގެ އިދާރާއަށް ހާޒިރުކޮށް، ބަޔާން ނަގާފައިވެއެވެ. އަދި ކުޑަކަމުދާތަކެތި ޓެސްޓު ކުރިއިރު، ކެނެބިސްއަށް ޕޮޒިޓިވްވި ނަމަވެސް މިހާތަނަށް އޭނާ ހައްޔަރު ނުކޮށް އޭނާގެ ޕާސްޕޯޓު ހިފެހެއްޓިއެވެ.
ކެނެބިސްއަށް ޕޮޒިޓިވްވި ނަަމަވެސް އޭނާ ހައްޔަރުކޮށްފައި ނުވާތީ ގިނަ ބައެއްގެ ފާޑުކިޔުން ވެސް ފުލުހުންނަށް ވަނީ އަމާޒުވެފައެވެ. މަސްތުވާތަކެއްޗާ ބެހޭ ގާނޫނުގެ 115 ވަނަ މާއްދާގައި ބުނެފައިވާ ގޮތުން، ކެނެބިސް ބޭނުން ކުރާ މީހެއްގެ އަދަބަކީ ތިން އަހަރު ދުވަހަށް ޖަލަށް ލުމެވެ.
ޔުމްނު ފުރާޅު މައްޗަށް ވެއްޓިފައި އޮއްވާ ފެނުނީ 18 އޭޕްރީލް 2025 ވަނަ ދުވަހުގެ ހެނދުނުގެ ވަގުތެއްގައެވެ.
