ޔުމްނު ފުރާޅަށް ވެއްޓުނު ހާދިސާއާ ގުޅުންހުރި 8 މީހުންގެ ވަނަވަރު އާއްމުކޮށް، ސީސީޓީވީ ފުޓޭޖް އާއްމުކޮށްފި
24 އެޕްރީލު 2025 | ބުރާސްފަތި 08:16މި މައްސަލައިގައި ހިމެނޭ އެންމެންގެ ޕާސްޕޯޓު ހިފަހައްޓައި، އެ މީހުންނާ ގުޅުންހުރި ތަންތަން ބަލައި ދަނީ ފާސްކުރަމުން
ޔުމްނު ފުރާޅަށް ވެއްޓުނު ހާދިސާއާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުމުގެ ތެރެއިން
ހ. ފެންޓެނޯއީ ގޭގެ މަތިން ގެ އެއްގެ ފުރާޅަށް، 21 އަހަރުގެ ހައްވާ ޔުމްނު ރަޝީދު ވެއްޓުނު ހާދިސާއާ ގުޅިގެން އެރޭ މަސްތުގެ ހާލަތުގައި ޕާޓީ ކުރި ކަމަށް ތުހުމަތުކުރެވޭ 8 މީހުންގެ ވަނަވަރު އާއްމުކޮށް ސީސީޓީވީ ފުޓޭޖް އާއްމުކޮށްފިއެވެ.
ބުރާސްފަތި ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ވަނީ ޔުމްނު އަދި ރައުދު އަހުމަދު ޒިލާލް ފެންޓެނޯއީ ގޭގެ ސިޑިގޮޅީގައި ބަދު އަހުލާގީ އަމަލު ހިންގާ މަންޒަރު ފެންނަ ސީސީޓީވީ ފުޓޭޖް ލައިޓް ޓީވީގައި އާއްމުކޮށްފައެވެ.
މި ހާދިސާއާ ގުޅޭގޮތުން ޕޮލިސް ކޮމިޝަނަރު އަލީ ޝުޖާއު ވިދާޅުވީ، މި މައްސަލައިގައި ހިމެނޭ އެންމެންގެ ޕާސްޕޯޓު މިހާރު ހިފަހައްޓާފައިވާ ކަމަށެވެ. އަދި އެ މީހުންނާ ގުޅުންހުރި ތަންތަން ބަލައި ފާސްކުރަމުންދާ ކަމަށެވެ.
ޔުމްނުއާއެކު އެރޭ އުޅުނު މީހުން ހައްޔަރުނުކުރި ސަބަބާ ގުޅޭގޮތުން ސީޕީ ޝުޖާއު ވިދާޅުވީ އެމީހުން ހައްޔަރު ނުކޮށް ތިބި 30 ދުވަހުގެ ތެރޭގައި ތަހުގީގު ނިންމައި ޕްރޮސެކިއުޓާ ޖެނެރަލްގެ އޮފީހަށް ނުފޮނުވިދާނެތީ ކަމަށާއި، އެމީހުން ހައްޔަރު ކޮށްގެން 30 ދުވަހުގެ ތެެރޭގައި ތަހުގީގު ނުނިންމިއްޖެ ނަމަ އެ މައްސަލަ އަތުން ދޫވެގެންދާނެ ކަމަށެވެ.
މި ނޫސްވެރިންގެ ބައްދަލުވުމުގައި މަސްތުގެ ހާލަތުގައި ޕާޓީކުރި ކަމުގެ ތުހުމަތު ކުރެވިފައިވާ 8 މީހެއްގެ ވަނަވަރު ވަނީ އާއްމުކޮށްފައެވެ.
- ރައުދު އަހުމަދު ޒިލާލް، 21، ގ. އެރިޔަދޫ
- އައިޝަތު ލަޔާލީ އިގުބާލް، 22، ގ. ނޯތުބްރީޒް
- އިޒްދިޔާން މުހައްމަދު މައުމޫން، 28، މއ. މާންދޫގެދެކުނުގެ (ޓްރާންސްޕޯޓް މިނިސްޓަރު އަމީނަށް ބޮޑުބޭބެ ވިދާޅުވާ ކޮއްކޮއެއް؛ މިއަދާ ހަމައަށް ހުރީ ރައީސް އޮފީހުގެ މަގާމެއްގައި)
- ޔޫސުފް އަހްމަދު އަކްރަމް، 22، މއ. މާންދޫގެދެކުނުގެ (އަމީނަށް ބޮޑުބޭބެ ވިދާޅުވާ ކޮއްކޮއެއް)
- ޔޫސުފް ޔައްސާރު އަބްދުއްގަފޫރު، 28، ހ. މީނާޒް
- އާމިނަތު ޖުނައިދާ ޖަމްޝީދު، 24، މ. ތިލަފަޅު
- ހުސައިން ހަމީސް އަލީ، 28، އަލި/ނ. ވެލިދޫ
- އިޖާޒު ޖާއިޒު، 24، މާތޮޑާއަވަށް އޭޕްރީލް/ގދ. ފަރެސްމާތޮޑާ
މަސްތުގެ ހާލަތުގައި ޕާޓީކުރި ކަމުގެ ތުހުމަތު ކުރެވިފައިވާ 8 މީހުން
ސީޕީ ޝުޖާއު ވިދާޅުވީ މައްސަލަ ފުރިހަމައަށް ތަހުގީގު ކުރުމަށް ފުލުހުންނަށް އިތުރަށް ވަގުތު ބޭނުންވާ ކަމަށާއި، ބޭރުގެ އެހީތެރިކަން ހޯދާނެ ކަމަށެވެ.
މި ހާދިސާއާ ގުޅޭ ގިނަ މައުލޫމާތުތަކެއް ހަސަން ކުރުސީ އެކައުންޓުން އެކްސްގައި ހާމަކުރުމާ ގުޅިގެން 22 އޭޕްރީލް 2025 ވީ އަންގާރަ ދުވަހުގެ ރޭ ކުއްލި ގޮތަކަށް ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ޔުމްނާއާ އެކު އެރޭ އިތުރު ހަތް މީހަކު އުޅުނު ކަމަށާއި، އެއީ، ޖުމްލަ ތިން އަންހެނުންނާއި ފަސް ފިރިހެނުން ކަމަށެވެ.
ޔުމްނު އަމިއްލައަށް ފުންމާލީ ކަމަށް ފުލުހުން ބުނެފައިވާތީ، އެ ވާހަކަތަކަށް ގިނަ ބަޔަކު ދަނީ ފާޑު ކިޔަމުންނެވެ. އަދި މި ހާދިސާގައި ހިމެނޭ އަންހެން ކުއްޖާގެ ނަމާއި އެޑްރެސް އެ ނޫސްވެރިންގެ ބައްދަލުވުމުގައި ފުލުހުން ހާމަކުރި އިރު، ހާދިސާގައި ޝާމިލުވާ އިތުރު އެއްވެސް މީހެއްގެ ވަނަވަރު ފުރަތަމަ ހާމަކޮށްފައެއް ނުވެއެވެ.
