އެމެރިކާ އާއި ޗައިނާއާ ދެމެދު ކުރިއަށް ގެންދާ ވިޔަފާރި މަޝްވަރާތަކުގައި ރަނގަޅަށް ކަންތައް ކުރައްވާނެ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

މިއީ ދެ ގައުމުގެ ވިޔަފާރީގެ ހަނގުރާމަ ފެށުނު ފަހުން އެމެރިކާގެ ރައީސް ދެއްކެވި އެންމެ އުންމީދީ ވާހަކަތަކެވެ.

އެމެރިކާގެ ވޮޝިންގްޓަން ގައި ބުދަ ދެއްކެވި ވާހަކަފުޅު ގައި ޓްރަމްޕް ވިދާޅުވީ ދެފަރާތުން ވެސް ރަނގަޅަށް ކަންތައް ކުރައްވާނެ ކަމަށާއި، ޗައިނާ އިން ކޮންމެ ވެސް އިރަކުން އެއްބަސްވުމަކަށް އަންނަން ޖެހޭނެ ކަމަށެވެ.

އެހެން ނޫން ނަމަ، އެމެރިކާ ގައި ވިޔަފާރި ކުރުމަށް ދަތިތަކާ ކުރިމަތިވާނެ ކަމަށް ޓްރަމަޕް ވިދާޅުވި އެވެ. ނަމަވެސް ޗައިނާ އިން ވަނީ މަޝްވަރާތަކަށް އެއްބަސްވުމުގެ ކުރިން އެމެރިކާގެ ސަރުކާރުން ބައެއް ފިޔަވަޅުތައް އަޅަން ޖެހޭނެ ކަމަށް ބުނެފަ އެވެ. 

ޚާއްޞަކޮށް އެމެރިކާގެ ސަރުކާރުގެ އިސް ވެރިން ޗައިނާއާ ދެކޮޅަށް ދައްކާ ވާހަކަތައް ހުއްޓުވުމަށް ގޮވާލާފައިވެ އެވެ. މީގެ ކުރިން އެމެރިކާގެ ނައިބު ރައީސް ޖޭޑީ ވޭންސް ވަނީ "ޗައިނާގެ ދަނޑުވެރިން" އާ ބެހޭ ގޮތުން ނުތަނަވަސް ވާހަކަތަކެއް ދައްކަވައިފަ އެވެ.

އެކަމާ ގުޅިގެން ޗައިނާގެ އިސް އޮފިޝަލަކު ވިދާޅުވެފައި ވަނީ އެއީ "ޖާހިލު އަދި ނުރަނގަޅު" ބަސްތަކެއް ކަމަށެވެ.

ދެ ގައުމުގެ ގުޅުން އިތުރަށް ރަނގަޅުވެ، ވިޔަފާރީގެ ހަނގުރާމަ ނިމުމަކަށް އަންނާނެކަމުގެ އުންމީދު މި ވަގުތު އޮތްކަމަށް ބެލެވޭ ކަމުގަައި މަޝްރަހު ދިރާސާ ކުރާ ފަރާތްތަކުން ބުނެ އެވެ.