ޔުއެފާ ޗެމްޕިއަންސް ލީގުގެ ގްރޫޕް ސްޓޭޖުގައި ސްޕެއިންގެ ޗެމްޕިއަން ރެއާލް މެޑްރިޑާއި އިނގިރޭސި ޗެމްޕިއަން ޗެލްސީ ވަރުގަދަ ގްރޫޕްތަކުގައި ލައްވާލައިފިއެވެ.

ބުރާސްފަތި ދުވަހުގެ ރޭ ފްރާންސްގެ މޮނާކޯގައި ބޭއްވި ގުރު ނެގުމުގެ ރަސްމިއްޔާތުގައި ޔުއެފާއިން ވަނީ މި ސީޒަނުގައި ޔުއެފާ ޗެމްޕިއަންސް ލީގުގައި 32 ޓީމް ވާދަކުރާނެ ގްރޫޕްތައް ކަނޑައަޅާފައެވެ.

އަށް ގްރޫޕަށް ޓީމުތައް ބަހާލެވިގެން ދިޔައިރު އެންމެ ވަރުގަދަ ގްރޫޕްތަކުގެ ގޮތުގައި ގިނަ ބަޔަކު ދެކެނީ ގްރޫޕް ސީ އާއި ގްރޫޕް ޑީއެވެ.

އެގޮތުން ގްރޫޕް ސީގައި ހިމެނެނީ އިނގިރޭސި ޗެމްޕިއަން ޗެލްސީ އާއި ސްޕެއިންގެ އެޓްލެޓިކޯ އާއި އިޓަލީގެ ރޯމާގެ އިތުރުން އަޒެރްބައިޖާންގެ ގަރަބާގް ފުޓުބޯޅަ ކްލަބެވެ. މިދިޔަ ސީޒަނުގެ ޗެމްޕިއަން ރެއާލް މެޑްރިޑު އޮތީ ޖަރުމަނުގެ ބޮރޫޝިއާ ޑޯޓުމަންޑާއި އިނގިރޭސިވިލާތުގެ ޓޮޓެންހަމްގެ އިތުރުން ސައިޕްރަސްގެ އެޕޮއެލް ނިކޯސިއާއި އެކު ގްރޫޕް އެޗްގައެވެ.

މިދިޔަ ސީޒަނުގައި ޔުއެފާ ޔޫރޮޕާ ލީގުގެ ޗެމްޕިއަން މެންޗެސްޓާ ޔުނައިޓެޑް އޮތީ ޕޯޗުގަލްގެ ބެނެފީކާ އާއި ރަޝިއާގެ ސީއެސްކޭއޭ މޮސްކޯ އާއި ސުއިޒަލޭންޑުގެ އެފްސީ ބަސެލްއާ އެކު ގްރޫޕް އޭގައެވެ. ގްރޫޕް ބީގައި ހިމެނެނީ ވަރުގަދަ ބަޔާން މިއުނިކާއި ފްރާންސްގެ ޕީއެސްޖީ، ސްކޮޓްލެންޑުގެ ސެލްޓިކް އަދި ބެލްޖިއަމްގެ އެންޑަލެކްޓެވެ.

ގްރޫޕް ޑީގައި ވަރުގަދަ ބާސެލޯނާ އާއި ޔުވެންޓަސްގެ އިތުރުން އޮތީ ގްރީސްގެ އޮލިމްޕިއާކޯސް އާއި ޕޯޗުގަލްގެ ސްޕޯޓިންއެވެ. ގްރޫޕް އީގައި އޮތީ ލިވަޕޫލް އާއި ސެވިއްޔާގެ އިތުރުން ރަޝިއާގެ ސްޕާޓަކް މޮސްކޯ އާއި ސްލޮވޭނިއާގެ މަރިބޯއެވެ.  

ގްރޫޕް އެފްގައި ހިމެނެނީ މެންޗެސްޓާ ސިޓީ އާއި އިޓަލީގެ ނަޕޯލީ އާއި ޔޫކްރެއިންގެ ޝަކްތަރް ޑޮނެސްކޭގެ އިތުރުން ނެދަލޭންޑްސްގެ ފެޔަނޫދްއެވެ. ގްރޫޕް ޖީގައި މޮނާކޯ އާއި ޕޯޓޯ އަދި ބެސިކްޓަސްގެ އިތުރުން ހިމެނެނީ މުޅިން އަލަށް ޗެމްޕިއަންސް ލީގުގައި ވާދަކުރާ ޖަރުމަނުގެ  ލީޕްޒިގްއެވެ.

ޔުއެފާ ޗެމްޕިއަންސް ލީގުގެ ފުރަތަމަ މެޗުތައް ކުޅޭނީ ސެޕްޓެމްބަރު މަހުގެ 12 އަދި 13 ވަނަ ދުވަހުއެވެ. މިދިޔަ އަހަރު ޗެމްޕިއަންސް ލީގުގެ ޗެމްޕިއަނުންނަކީ ސްޕެއިންގެ ރެއާލް މެޑްރިޑެވެ.