ރައީސް މުއިއްޒަށް ވެސް އެންމެ ރަނގަޅުވާނީ ސުޕްރީމް ކޯޓު އޮތް ގޮތަށް ބާއްވައި، ޖުޑިޝަރީ މިނިވަންކަމާއެކު ހިންގުމަށް ފުރުސަތު ދިނުން: އަލީ ހުސެއިން
ގާނޫނު އޮތްގޮތުން އެއިރެއްގައި އޮންނަ ސަރުކާރަކަށް ސުޕްރީމް ކޯޓަށް ނުފޫޒު ފޯރުވުމުގެ ޖާގަ ލިބޭ
''ޓީވީޓޯކް ޕްރޮގްރާމް''ގައި ކެންދޫ ދާއިރާގެ ކުރީގެ މަޖިލިސް މެންބަރު އަދި މަޝްހޫރު ގާނޫނީ ވަކީލް އަލީ ހުސެއިން
ރައީސުލްޖުމްހޫރިއްޔާ ޑރ.މުހައްމަދު މުއިއްޒަށް ވެސް އެންމެ ރަނގަޅުވާނީ މިހާރުގެ ސުޕްރީމް ކޯޓު އޮތް ގޮތަށް ބާއްވައި، ޖުޑިޝަރީ މިނިވަންކަމާއެކު ހިންގުމަށް ފުރުސަތު ދީގެން ކަމަށް ކެންދޫ ދާއިރާގެ ކުރީގެ މަޖިލިސް މެންބަރު އަދި މަޝްހޫރު ގާނޫނީ ވަކީލް އަލީ ހުސެއިން ވިދާޅުވެއްޖެ އެވެ.
ރާއްޖެޓީވީގެ ''ޓީވީޓޯކް ޕްރޮގްރާމް''ގައި އަލީ ހުސެއިން ވިދާޅުވީ 2008 ގައި ގާނޫނު އަސާސީ ތަސްތީގު ކުރި ހިސާބުން ފެށިގެން ދިވެހިރާއްޖޭގެ ގާނޫނު އަސާސީ އޮތް ގޮތުން މިނިވަން ޖުޑިޝަރީއެއް ނުހިންގޭނެ ކަމަށެވެ. އަދި އެއިރުން ފެށިގެން މިއަދާ ހިސާބަށް އެކަމުގެ ކަންބޮޑުވުން ފާޅުކުރަމުންދާ ކަމަށް އޭނާ ވިދާޅުވި އެވެ.
އަލީ ހުސެއިން ވިދާޅުވީ ގާނޫނު އަސާސީ އޮތްގޮތުން އެއިރެއްގައި އޮންނަ ސަރުކާރަކަށް ސުޕްރީމް ކޯޓަށް އަދި ޖުޑީޝަރީއަށް ނުފޫޒު ފޯރުވުމުގެ ޖާގަ ލިބޭ ކަމަށެވެ. ބާރުތައް ވަކިވެފައި އޮތުމަކީ ރައްޔިތުން އެދޭ ގޮތް ނަމަވެސް ސަރުކާރަށް ރައްޔިތުންގެ މަޖިލީހުގެ މެޖޯރިޓީ ލިބުމާއެކު، ދެ ބާރު އެކުވީ ކަމަށް އަލީ ހުސެއިން ވިދާޅުވި އެވެ.
މިސާލަކަށް އަޅުގަނޑު ވެސް ގަބޫލުކުރަން މިދިޔަ 5 އަހަރު ދުވަހުގެ ތެރޭގައި އެކަހަލަ ނުފޫޒުތަކެއް ސުޕްރީމް ކޯޓަށް ފޯރުވާފައި ނެތް އެނގޭތޯ. ފޯރުވެން އޮތް އެނގޭތޯ. ފޯރުވެވޭނެ ޖާގަ އޮތް. އެކަމަކު ފޯރުވާފައިނުވާކަން އަޅުގަނޑުމެންނަށް އެނގެނީ ރައީސް ޔާމީންގެ މައްސަލަ ވެސް ކޮންމެހެން އަޅުގަނޑުމެންނަށް ގަބޫލެއް ނުކުރެވޭ އެމްޑީޕީން މައްސަލަ ނިމެން ބޭނުންވި ގޮތަކަށް ނޫން ސުޕްރީމް ކޯޓުން ނިމިގެންދިޔައީ. އެހެންނަމަވެސް ނިމުނަކަށް އެކަމަކާ މެދު ފިޔަވަޅެއް ނާޅާ. ސުޕްރީމް ކޯޓުގެ ފަނޑިޔާރުން ސަސްޕެންޑެއް ނުކުރޭ. އަދި ސުލޫކީ މައްސަލައެއް ވެސް ނުބަލާ. އެތަނުގެ ފުރާޅުން ޓިނެއް ވެސް ނުނަގާ. އެހެންނަމަވެސް އެކަން ކުރެވޭނަމަ ކުރެވޭ ގޮތަށޭ އޮތީ އެނގޭތޯ. އެހެންވީމަ އަޅުގަނޑު ދަންނަވާ ވާހަކައަކީ އެކަން ކުރެވޭ ގޮތަކަށް ވެސް އޮވެގެން ނުވާނެ. އެހެންވީމަ ދަންނަވަން މިއުޅޭ ވާހަކައަކީ ޖޭއެސްސީގެ ކޮންޕޮޒިޝަން އޮތް ގޮތުން ސިޔާސީ ނުފޫޒުން ބޭރު އެ މިނިވަންވާ ގޮތަށޭ ޖުޑީޝަލް ސަރވިސް ކޮމިޝަން ކޮންޕޮޒިޝަން އޮންނަން ޖެހޭނީ. އެހެން އެކަން ނުކުރެވޭ ކަމަށްވާނަމަ އަޅުގަނޑުމެން އެބަޖެހޭ ރައީސުލްޖުމްހޫރިއްޔާ ހޮވާ ގޮތަށް ހޮވާ ބަޔަކު ޖޭއެސްސީއަށް ލައިގެން ނަމަވެސް ޖޭއެސްސީ އެބަޖެހޭ މިނިވަން ކުރަން.ކެންދޫ ދާއިރާގެ ކުރީގެ މަޖިލިސް މެންބަރު އަދި މަޝްހޫރު ގާނޫނީ ވަކީލް އަލީ ހުސެއިން
ސަރުކާރުގެ ނުފޫޒުން، ފަނޑިޔާރުންނާއި، ފަނޑިޔާރުގެ މިނިވަން ކުރަންޖެހޭކަން ފާހަގަކުރައްވައި އަލީ ހުސެއިން ވިދާޅުވީ 2014 ވަނަ އަހަރު ވެސް ސުޕްރީމް ކޯޓު ރޫޅާލި ކަމަށާއި، މިހާރު ވެސް އޮތީ އެފަދަ ހާލެއްގައި ކަމަށެވެ. ނަމަވެސް ރައްޔިތުން ކުރި މަސައްކަތާއެކު، 2019 ވަނަ އަހަރުގެ ތެރޭގައި ގާއިމް ކުރެވުނު ސުޕްރީމް ކޯޓަކީ މިހާތަނަށް ގާއިމްކުރެވުނު އެންމެ ރަނގަޅު އިންސާފުވެރި ފަނޑިޔާރުންގެ ބެންޗު ކަމަށެވެ. އަދި އެކަން ހުރިހާ ރައްޔިތުން ވެސް ގަބޫލުކުރާނެ ކަމަށް އޭނާ ވިދާޅުވި އެވެ.
މީގެ އިތުރުން އަލީ ހުސެއިން ވިދާޅުވީ މި ގައުމަށް އަދި ރައީސް މުއިއްޒަށް ސިޔާސީ ގޮތުން ވެސް އެންމެ ރަނގަޅުވާނީ މިހާރު ގެސް ސުޕްރީމް ކޯޓު އެއޮތް ގޮތަށް ބޭއްވުމުން ކަމަށެވެ. ނަމަވެސް ސުޕްރީމް ކޯޓުގެ ހިންގުން ހުއްޓުވާފައިވާ ކަމަށް އަލީ ހުސެއިން ވިދާޅުވި އެވެ.
ގައުމުގައި ކަމެއް ހިނގާއިރަށް މާ ބޮޑަށް ސަރުކާރު ބިރު ގަންނަ ކަމަށާއި، އެއްވެސް ކަމެއްގައި ކެތްތެރިކަމެއް ނުހުންނަ ކަމަށް އަލީ ހުސެއިން ވިދާޅުވިއެވެ. އަދި ވިދާޅުވީ މިނިވަން މުއައްސަސާތަކަށް ނުފޫޒު ފޯރުވުމުގެ ހިތި ނަތީޖާ ސަރުކާރަށް ފެންނާނެ ކަމަށާއި، ރައްޔިތުންގެ އިތުބާރާއި ތާއީދު ނުލިބޭނެ ކަމަށެވެ.
