ދިރާގުގެ "އާރްބީ ކުއެސްޓް" ކުޅެގެން ޔޫރަޕަށް

ދިރާގުން "އާރްބީ ކުއެސްޓް"ގެ ނަމުގައި އޯގްމެންޓެޑް ރިއަލިޓީ ބޭނުންކޮށްގެން ގޭމެއް ތައާރަފުކޮށްފިއެވެ.

މިގޭމް ދިރާގުގެ ފަރާތުން ތައާރަފްކޮށްފައި ވަނީ ބުރާސްފަތި ދުވަހުގެރޭ ސީހައުސް ބްރެސެރީގައި ބޭއްވި ޙާއްސަ ރަސްމިއްޔާތެއްގައެވެ.

މިގޭމްގައި އެމީހެއްގެ ފޯނުގެ ކެމާރޭ ބޭނުންކޮށްގެން ޖެހޭނީ ވީހާ ވެސް ގިނަ ރާޅު ބިސް އެކި ހިސާބުތަކުން ހޯދާށެވެ. އަދި މިގޭމްގައި "ކަލޯ" ނަމަކަށް ކިޔާ ކެރެކްޓައެއް ގޭމް ކުޅޭ ޕްލެޔަރުންނަށް އެހީތެރިވުމަށްޓަކައި ގޭމްގައި ހަރަކާތްތެރިވާނެއެވެ.

ދިރާގުން ބުނީ މިގޭމްގައި އެންމެ ގިނައިން ރާޅުބިސް ހޯދާ ފަރާތެއް ބެލުމަށްޓަކައި ވާދަވެރި މުބާރާތެއް އޮގަސްޓް 25 ވަނަ ދުވަހުން ފެށިގެން އޮގަސްޓު 29 ވަނަ ދުވަހުގެ ރޭގަނޑު ބާރަ ޖެހުމާ ހަމައަށް އޮންނާނެ ކަމަށެވެ. އަދި ކޮންމެ ދުވަހަކު އެންމެ ގިނަ ރާޅު ބިސް ހޯދާ ފަރާތަކަށް އެޕަލް ސީރިޒް ދޭއްގެ ގަނޑިއެއް ލިބިގެންދާނެ ކަމަށެވެ.

ދިރާގުން އިތުރަށް ބުނީ އެންމެ ގިނައިން ރާޅުބިސް ހޯދާ ފަރާތެއް ބެލުމަށްޓަކައި ބާއްވާ ވާދަވެރި މުބާރާތުގައި އެއްވަނަ، ދެވަނަ އަދި ތިންވަނައަށް ހޮވޭ ފަރާތްތަކަށް އަގުބޮޑު އިނާމްތަކެއް ލިބިގެންދާނެ ކަމަށެވެ. އެއްވަނައަށް ހޮވޭ ފަރާތަކަށް ޔޫރަޕަށް ދިއުމަށް ދެ މީހެއްގެ ޓިކެޓް ލިބިގެންދާނެ ކަމަށާއި ދެވަނަ އަށް ހޮވޭ ފަރާތަކަށް މެކްބުކް ޕްރޯއަކާއި ސެމްސަންގ ގެލްކްސީ 8ގެ ފޯނަކާއި ޕްލޭސްޓޭޝަން 4 އެއް ލިބިގެންދާނެ ކަމަށް ދިރާގުން ބުންޏެވެ. އަދި ތިންވަނައަށް ހޮވޭ ފަރާތަކަށް ޝެރެޓަން ރިސޯޓުގައި ދެމީހަކަށް ތިން ރޭ ވަންދެން ތިބުމުގެ ފުރުސަތު ލިބިގެންދާނެ ކަމަށް ވެސް ދިރާގުން ބުނިއެވެ.

"އާރުބީ ކުއެސްޓް" ގޭމް ގޫގުލް ޕްލޭސްޓޯރުންނާއި އެޕަލްގެ ސްޓޯރުން ޑައުންލޯޑް ކުރެވޭނެއެވެ.

މިއީ ދިވެހިންނަށް ޙާއްސަކޮށް މިކަހަލަ ގޭމްއެއް ތައާރަފުކުރި ފުރަތަމަ ފަހަރެވެ.

---

ގޭމް ޑައުންލޯޑް ކުރެއްވުމަށް ލިންކަށް ވަޑައިގަންނަވާ

ގޫގްލް ޕްލޭސްޓޯރ އިން ގޭމް ޑައުންލޯޑް ކުރައްވާ

އެޕަލް ސްޓޯރ އިން ގޭމް ޑައުންލޯޑް ކުރައްވާ