ޕީއެންސީ މެންބަރު އިބްރާހިމް ހުސެއިންގެ ނުފޫޒުން ޓްރެފިކް ޕޮލިހަކަށް ފިޔަވަޅު އެޅިކަމުގެ ތުހުމަތު އޭނާ ދޮގު ކުރައްވައިފި

ޕީއެންސީގެ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސެއިންގެ ނުފޫޒުން ޓްރެފިކް ޕޮލިހަކަށް ފިޔަވަޅު އެޅިކަމުގެ ތުހުމަތު އޭނާ ދޮގު ކުރައްވައިފިއެވެ.

ނަމަވެސް ރާއްޖެއެމްވީއަށް މެންބަރު އިބްރާހިމް ވިދާޅުވީ ތިއީ ކަނޑައެޅިގެން ދޮގެއް ކަމަށެވެ. ނަމަވެސް އިތުރު ތަފްސީލެއް ނުދެއްވައެވެ. އަދި މަގުމަތިން ހެޑްސެޓް ޖަހައިގެން ސައިކަލު ދުއްވާފައިދާތީ، ޓްރެފިކް ފުލުހެއް މެންބަރު ހުއްޓުވައި ނަސޭހަތް ދީފައިވާތޯ ކުރި ސުވާލަކަށް ވެސް މެންބަރު އިބްރާހިމް ޖަވާބެއް ނުދެއްވިއެވެ.

ރާއްޖެއެމްވީއަށް އިތުބާރުހުރި ފަރާތަކުން ވިދާޅުވީ މެންބަރު އިބްރާހިމް މަގުމަތިން ހެޑްސެޓް ޖަހައިގެން ސައިކަލު ދުއްވާފަދާތީ، ޓްރެފިކް ފުލުހެއް މެންބަރު ހުއްޓުވައި ނަސޭހަތް ދީފައިވާ ކަމަށެވެ. ނަސޭހަތް ދީފައިވާތީ، މެންބަރުގެ ނުފޫޒުން އެ ފުލުސް މީހާއާ މެދު ފިޔަވަޅު އަޅާފައިވާ ކަމަށް އިތުބާރު ހުރި ފަރާތަކުން މައުލޫމާތު ދީފައިވެއެވެ. އަދި ވިދާޅުވީ ނަސޭހަތް ދިނުމުން މެންބަރު އެކަމާ ނުރުހުންވެ އިންޒާރު އެ ވަގުތު ވެސް ދީފައިވާ ކަމަށެވެ.

މަގުމަތީގެ ޓްރެފިކް ބަލަހައްޓަން މަސައްކަތް ކުރި ނަމަވެސް އެމަސައްކަތުން އެކަހެރިކޮށްފައިވާއިރު، މިހާރު އެ ފުލުސް މީހާ ވަނީ ޓްރެފިކް މައްސަލަތައް ބަލާ ތަހުގީގު ކުރާ ބަޔަށް ބަދަލުކޮށްފައި ކަމަށް އެބޭފުޅާ ވިދާޅުވިއެވެ.

މި މައްސަލައާ ގުޅިގެން ރާއްޖެއެމްވީއަށް ފުލުހުން ބުނީ ޕްރޮފެޝަލަން ސްޓެންޑާޑް ކޮމާންޑުން ތަހުގީގު ކުރަމުން ގެންދާ މައްސަލައަކާ ގުޅިގެން ޓްރެފިކް ޕޮލިހުގައި މަސައްކަތް ކުރާ ފުލުހެއް ކުރިން އަދާކުރަމުން ގެންދިޔަ ޒިންމާތަކުން އެކަހެރިކޮށް، އެހެން ޒިންމާތަކެއް ހަވާލުކޮށްފައިވާ ކަަމަށެވެ.

ނަމަވެސް އެއީ މަތީގައި ދަންނަވާފައިވާ ފަދަ ކަމެއް ނޫންކަން މައުލޫމާތަށްޓަކައި ދަންނަވަން.

ފުލުހުންގެ މީޑީއާ އޮފިޝަލް

ނަމަވެސް މެންބަރެއްގެ ނުފޫޒުން ކޮށްފައިވާ ކަމެއް ނޫން ކަމަށް ބުނެ، ފުލުހުން ވަނީ އެ ތުހުމަތުތައް ދޮގު ކޮށްފައެވެ.