''ހަސަން ކުރުސީ'' ހިންގަނީ ކާކުކަން އެނގޭ: ރަޝިޔާ
16 އެޕްރީލު 2025 | ބުދަ 10:09ކުރުސީ މަސައްކަތްކުރަނީ ރާއްޖެއާއި ރަޝިއާއާ ދެމެދު އޮތް އެކުވެރި ގުޅުން ހީނަރު ކުރަން
ހަސަން ކުރުސީ އެކައުންޓު
ބޮޑެތި ހިޔާނާތްތަކާއި، ސިޔާސީ ބައެއް ބޭފުޅުންގެ ސިއްރުތައް އެކްސްގައި ހާމަކުރަމުންދާ އެކައުންޓް ''ހަސަން ކުރުސީ'' ހިންގަނީ ކާކުކަން އެނގޭ ކަމަށް ރަޝިޔާއިން ބުނެފިއެވެ.
ބުދަ ދުވަހު ރަޝިއާއިން ލަންކާއާއި ރާއްޖެއަށް ކަނޑައަޅުއްވާފައި ހުންނަވާ ސަފީރު ލިވަން ޖަރުކަ އެކްސްގައި ކުރެއްވި ޕޯސްޓެއްގައި ވިދާޅުވީ، ކުރުސީ މަސައްކަތްކުރަނީ އެމެރިކާއާ އެކު އެ ގައުމުން ބާއްވާ މަޝްވަރާތަކާ އަދި ރާއްޖެއާއި ރަޝިއާއާ ދެމެދު އޮތް އެކުވެރި ގުޅުން ހީނަރު ކުރަން ކަމަށެވެ.
ހަސަން ކުރުސީ އެކައުންޓް ހިންގަމުންދަނީ މިވަގުތު ޔޫރަޕުގެ ގައުމެއްގައި ހުރި ރާއްޖޭގެ ކުރީގެ ސިޔާސީ އިސް ލީޑަރެއް ކަމަށާއި، އެއީ ކާކުކަން ވަރަށް ސާފުކޮށް އެނގޭ ކަމަށެވެ.
ސަފީރު ލިވަން ޖަރުކަ މިފަދަ ޕޯސްޓެއް ހިއްސާކުރެއްވީ ރާއްޖެ މެދުވެރިކޮށް ރަޝިޔާއަށް ކޮމްޕިއުޓަރު ޗިޕު އެތެރެކުރާ ކަމަށް ބުނެ، ކުރުސީ އެކައުންޓުން އަންގާރަ ދުވަހު ކުރި ޕޯސްޓަކާ ގުޅިގެންނެވެ. ނަމަވެސް މިތުހުމަތުތައް ރަޝިޔާއިން ވަނީ ދޮގު ކޮށްފައެވެ.
މީގެ ކުރިން ފުލުހުން ވަނީ ހަސަން ކުރުސީ އެކައުންޓް ހިންގަނީ ކާކުތޯ ހޯދުމަށް ޚާއްސަ ތަހުގީގެއް ފަށާފައެވެ. އަދި ކްރިމިނަލް ކޯޓުން ވެސް އަމުރެއް ނެރެފައިވެ އެވެ. ނަމަވެސް މިހާތަނަށް އެ އެކައުންޓު ހިންގާ މީހަކު ހޯދިފައެއް ނުވެ އެވެ.
މިއެކައުންޓް ހުޅުވައި ހިންގަން ފަށާފައިވަނީ އޮކްޓޫބަރު މަހުގެ 2022 ވަނަ އަހަރުގެ ތެރޭގައެވެ. ބައިލައްކަށްވުރެ ގިނަ ފްލޯވަރުން ތިބި މިއެކައުންޓަކީ ގުރޫޕަކުން ހިންގާ އެކައުންޓެއް ކަމަށާއި، ކުރީގެ ރައީސް މުހައްމަދު ނަޝީދު ހިންގާ އެކައުންޓެއް ކަމަށް ވެސް ބައެއް ފަރާތްތަކުން ތުހުމަތުކޮށްފައިވެ އެވެ. ނަމަވެސް ނަޝީދު ވަނީ މިތުހުމަތުތައް ދޮގު ކުރައްވާފަ އެވެ. އަދި މިހާތަނަށް މިއީ ކާކު ހިންގާ ނުވަތަ ކޮން ބައެއް ހިންގާ އެކައުންޓެއް ކަމެއް ހޯދިފައެއްނުވެ އެވެ.
