އިސްރާއީލު ސިފައިން ޣައްޒާގެ ދެކުނުގައި އޮންނަ ރަފަޙް މުޅިން ވަށާލައިފިއެވެ.

އިސްރާއީލުގެ ދިފާއީ ބާރުން ހޮނިހިރު ދުވަހު ބުނެފައި ވަނީ ޣައްޒާގެ ދެކުނުގެ ބޮޑެތި ބިންތަކެއް އަތުލައިގަނެ، ރަފަޙް އާއި ޚާން ޔޫނިސް ސިޓީ ތައް ވަކިކުރާ ސަލާމަތީ ކޮރިޑޯއެއް ގާއިމްކޮށްފައިވާ ކަމަށެވެ.

އައިޑީއެފުން ނެރުނު ބަޔާނެއްގައި ބުނެފައިވަނީ ފާއިތުވި 10 ދުވަހުގެ ތެރޭގައި ހިންގި އޮޕަރޭޝަންތަކުގައި "ދިހަވަރަކަށް ޓެރަރިސްޓުން މަރާލައި، ބިމުގެ އަޑީގައި ހުރި ޓަނަލް ރޫޓުތަކާއި ހަމާސްގެ ޓެރަރިސްޓް އިންފްރާސްޓްރަކްޗަރ ރޫޅާލައި، ރަފަޙް ވަށާލުން ނިންމާފައިވާ" ކަމަށެވެ.

މިއީ ހަމާސް އަށް ޕްރެޝަރކޮށް ހުރިހާ ރަހީނުން މިނިވަންކުރުމަށް ކުރާ ކަމެއް ކަމަށް އައިޑީއެފުން ބުނެއެވެ. އަދި ވަރަށް އަވަހަށް އައިޑީއެފް އިން ޣައްޒާގެ ބޮޑު ބައެއްގައި އޮޕަރޭޝަންތައް ވަރުގަދަ ކުރާނެ ކަމަށް އިސްރާއީލްގެ ޑިފެންސް މިނިސްޓަރު އިސްރާއީލް ކަޓްޒް ނެރުނު ބަޔާނެއްގައި ވިދާޅުވި އެވެ.

ބޮޑުވަޒީރު ބެންޖަމިން ނަތަންޔާހޫ ވަނީ މި މަހުގެ ކުރީކޮޅު ކުރީގެ އިސްރާއީލުގެ އާބާދީއަކަށް މޮރާގް އެކްސިސް ކިޔާ ރަފަޙް އާއި ޚާން ޔޫނިސްއާ ދެމެދު ކޮރިޑޯ އެއް ގާއިމް ކުރުމުގެ ވިސްނުމަކީ ސްޓްރިޕް އިތުރަށް ބައިބައިވާނެ ކަމެއް ކަމަށް ފާހަގަ ކޮއްފައެވެ. ހޮނިހިރު ދުވަހު ކަޓްޒް ވިދާޅުވީ މޮރަގް އަތުލުން ނިމިފައިވާ ކަމަށާއި "ފިލަޑެލްފީ ކޮރިޑޯ އާއި މޮރަގް އާއި ދެމެދުގެ މުޅި ސަރަހައްދު އިސްރާއީލުގެ ސަލާމަތީ ސަރަހައްދުގެ ބަޔަކަށް ބަދަލުކޮށްފައިވާ" ކަމަށެވެ.