ގިނަ ވައުދުތަކަކާއި އެކު ރައީސް މުއިއްޒުގެ މި ސަރުކާރުން ސ. ފޭދޫ އައު ސްކޫލުގެ ބިންގާ އެޅިތާ އަހަރެއް ވެގެން ދިއައިރުގައި ވެސް މަސައްކަތް ނުފަށާ އޮތުމުން އެ ރަށުގެ ރައްޔިތުން ކަންބޮޑުވުން ފާޅުކުރަން ފަށައިފިއެވެ. މިހާރު އިމާރާތް ހުރީ ބޮލަށް ވެއްޓޭ ހިސާބުގައެވެ.

ދިވެހިރާއްޖޭގެ ސްކޫލެއްގައި ހަދާ އެންމެ ފުރަތަމަ ލެންގުއޭޖް ލެބްގެ އިތުރުން ޒަމާނީ ގިނަ ވަސީލަތްތަކާ އެކު ތަރައްގީ ކުރުމަށް ހަމަޖައްސައި އައްޑޫ ސިޓީ ފޭދޫ ސްކޫލުގެ ބިންގާ އެޅުމުގެ ރަސްމިއްޔާތު ބާއްވާފައި ވަނީ ނިމިދިއަ އަހަރުގެ އޭޕްރީލް މަހުގެ ނުވަވަނަ ދުވަހުގައެވެ.

ފޭދޫ އައު ސްކޫލުގެ ބިންގާ އެޅުމުގެ މި ރަސްމިއްޔާތުގައި މިނިސްޓަރ އޮފް އެޑިއުކޭޝަން ޑރ. އިސްމާއީލް ޝަފީއު ގެ އިތުރުން ހޯމްލޭންޑް ސެކިޔުރިޓީ މިނިސްޓަރު އަލީ އިހްސާން އާއި ސަރުކާރުގެ އިސް ވެރިން ބައިވެރިވެ ވަޑައިގެންފައިވާއިރު، މި ރަސްމިއްޔާތުގައި ވާހަކަދައްކަވަމުން މިނިސްޓަރު ޝަފީއު ވިދާޅުވީ 40 ކްލާސްރޫމްގެ ފޭދޫސްކޫލް ވެގެން ދާނީ މުޅި ރާއްޖެއިން ވެސް ފާހަގަކޮށްލެވޭ ތަފާތު ސްކޫލަކަށް ކަަމަށެވެ.

އެގޮތުން ފޭދޫ ސްކޫލުގައި ރާއްޖޭގައި ހެދޭ އެންމެ ފުރަތަމަ ލެންގުއޭޖް ލެބް ތަރައްގީކުރެވިގެން ދާނެކަމަށް މިނިސްޓަރު ވިދާޅުވިއެވެ.

މީގެ އިތުރުން ޓީޗަރުންނަށް، އެމީހުންގެ ދަރިން ގޮވައިގެން ސްކޫލް މާހައުލުގައި އުޅެވޭނެ ގޮތަށް ޑޭ ކެއަރ ސެންޓަރެއް ވެސް ހެދުމަށް ނިންމާފައިވާކަމަށް މިނިސްޓަރ ވަނީ ވިދާޅުވެފައި އެވެ. އަދި އެއީ ވެސް މުޅިން އަލަށް ރާއްޖޭގެ ސްކޫލެއްގައި ގާއިމުވެގެން ދާ ހިދުމަތެއްކަމުގައި ވާނެ ކަމަށް ވެސް އޭރު ވަނީ ވިދާޅުވެފައިއެވެ.

މީގެ އިތުރަށް މިނިސްޓަރު ވިދާޅުވީ ފޭދޫ ސްކޫލުގެ އަލަށް އެޅޭ އިމާރާތާއެކު އެ ސްކޫލަކީ މުޅި ރާއްޖެއިން ވެސް ފާހަގަކޮށްލެވޭނެ ސްކޫލަކަށް ވެގެންދާނެކަމަށާއި އަދި އެންމެ ޒަމާނީ ހިދުމަތްތަކުގެ އިތުރުން އާ ގިނަ ކަންކަން ތައާރަފްވެގެންދާނެ ސްކޫލަކަށް ވެގެންދާނެކަމަށެވެ.

މިފަދައިން ވިދާޅުވެ އެތަކެއް ވައުދުތަކެއް ވެވަޑައިގެން މިސަރުކާރުގެ އެޑިއުކޭޝަން މިނިސްޓަރ އިސްމާއީލް ޝަފީއު ވާހަކަފުޅުދެއްކެވި އިރު، އެ ސްކޫލުގެ ބިންގާ އެޅިތާ މިއަދަށް ވަނީ އަހަރަކަށް ވުރެ ގިނަ ދުވަސް ވެގެން ގޮސްފައެވެ. އެހެން ނަމަވެސް އެ އައު ސްކޫލު އިމާރާތް ކުރުމުގެ އެއްވެސް މަސައްކަތެއް އަދިވެސް މި ސަރުކާރުން ނުފަށައެވެ.

މި ސަރުކާރުން ފޭދޫގައި އައު ސްކޫލް އިމާރާތެއް އެޅުމަށް ބިންގާ އެޅިފަހުން މިއަދާއި ހަމައަށް ވެސް އޭގެ އެއްވެސް މަސައްކަތެއް މި ސަރުކާރުން ކުރަމުން ނުދާތީ އެ ރަށުގެ ރައްޔިތުން އަންނަނީ ވަރަށް ބޮޑަށް މިކަމާއި ކަންބޮޑުވުން ފާޅުކުރަމުންނެވެ.

އެގޮތުން ބައެއް ފަރާތްތަކުން ވަނީ މިކަމުގެ ކަންބޮޑުވުންތައް ސޯޝަލް މީޑިއާގައިވެސް ހިއްސާކޮށްފައެވެ. އަދި ބައެއް ފަރާތްތަކުން ވަނީ ސްކޫލުގެ އިމާރާތުގެ ތެރެއަށް ވާރޭ ވެހި ފެންބޮޑުވެފައިވާ މަންޒަރު ދައްކުވައިދޭ ބައެއް ފޮޓީތައް ވެސް ސޯޝަލް މީޑިއާގައި ހިއްސާކޮށްފައެވެ.

ބައެއް ބެލެނިވެރިން ސޯޝަލް މީޑިއާގައި ބުނެފައިވަނީ ފޭދޫ ސްކޫލުގެ އިމާރާތް މިހާރު ބާ ވެގެން ބޮލަށް ވެއްޓޭވަރުވެއްޖެ ކަމަށާއި ސަރުކާރުން މިކަން ހައްލުކޮށްދޭން މަސައްކަތް ނުކުރާ ކަމަށެވެ. އަދި މި ކަމާއި ގުޅޭ ގޮތުން އެޑިއުކޭޝަން މިނިސްޓްރީއަށް ޝަކުވާވެސް ހުށަހަޅާފައިވާ ކަމަށާއި ނަމަވެސް އެކަށީގެންވާ ޖަވާބެއް އަދިވެސް ނުލިބޭކަމަށް އެ ފަރާތްތަކުން ވަނީ ބުނެފައެވެ.

ފޭދޫ ސްކޫލުގައި 600 އަށްވުރެ ގިނަ ދަރިވަރުން ތައުލީމު ހާސިލްކުރަމުން އަންނައިރު، އެ ސްކޫލަށް ދިމާވެފައިވާ ޖާގައިގެ ދަތިކަމާއި އެހެނިހެން ކަންކަން ހައްލުކުރުމަށް އައު ސްކޫލެއް ތަރަށްގީކުރަން ބިން ހަވާލުކޮށްފައިވަނީ މިދިއަ ސަރުކާރުގައެވެ.

ފޭދޫގައި މިހާރު ކިވައިދެމުން އަންނަ ސްކޫލް އިމާރާތަކީ 1972 ވަނަ އަހަރު އިމާރާތްކޮށް ކިޔައިދޭން ފެށި ސްކޫލް އިމާރާތެކެވެ. އެ އިމާރާތް މިހާރު ވަނީ ވަރަށް ބޮޑަށް ބާވެ، ކިވައިދޭން ދަތިވާ ވަރަށް ހަލާކުވެފައެވެ. އެގޮތުން ވިއްސާރަ މޫސުމެއް ނަމަ އިމާރާތުގެ ތެރެއަށް ވާރޭވެހި ފުރާޅުން ފެންފައިބާތީ އެ ތަނުގައި ކިޔަވައިދޭން އެތައް ދަތިތަކަކާއި ކުރިމަތިވަމުން އަންނަ ކަމަށް އެ ރަށުގެ ރައްޔިތުން ބުނެއެވެ.

ފޭދޫ ސްކޫލްގައި މިވަގުތު 600 އަށްވުރެ ގިނަ ދަރިވަރުން ތަޢުލީމު ޙާސިލްކުރަމުން އަންނައިރު، އޭގެތެރޭގައި ނުކުޅެދުންތެރިކަން ހުންނަ ގިނަ އަދަދެއްގެ ދަރިވަރުން ވެސް ހިމެނެއެވެ. އެ ސްކޫލްގައި 70 އަށްވުރެ ގިނަ މުދަރިސުން ކިޔަވައިދިނުމުގައި ހަރަކާތްތެރި ވަމުން އާދެއެވެ.