އުމްރާވެރިންގެ ކާޑުން 1500 ޑޮލަރުގެ ވިޔަފާރިއެއް ނުކުރެވޭ، ސަރުކާރުގެ އިހުލާސްތެރިކަމެއް ހުރިނަމަ އެއަރޕޯޓުން 1500 ޑޮލަރު ދޭނެ: ތަޒްމީލް
11 އެޕްރީލު 2025 | ހުކުރު 11:45މި ސަރުކާރުން އެއްވެސް ކަމެއް ކުރުމުގައި އިހުލާސްތެރިކަމެއް ނެތް
''ޓީވީޓޯކް ޕްރޮގްރާމް'' ގައި އެމްޓީޑީސީގެ ކުރީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު ވާހަކަ ދައްކަވަނީ
މި ސަރުކާރުގެ އިހުލާސްތެރިކަމެއް ހުރި ނަމަ އުމްރާވެރިންނަށް އެއާޕޯޓުން 1500 ޑޮލަރު ދޭނެ ކަމަށާއި، ޑެބިޓް ކާޑުތަކުގެ ލިމިޓް 1500ށް ޑޮލަރަށް ބޮޑުކުރިކަން އިއުލާން ނަމަވެސް އެކާޑުން އެއްވެސް ވިޔަފާރިއެއް ނުކުރެވޭ ކަމަށް އެމްޓީޑީސީގެ ކުރީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު ވިދާޅުވެއްޖެއެވެ.
10 ފެބްރުއަރީ 2025 ގައި ރައީސް ޑރ.މުހައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ ރޯދަ މަހު އުމްރާއަށް ދާ މީހުންނަށް ރަސްމީ ރޭޓުގައި ޑޮލަރު ހޯދުމުގައި ލުއި ފަސޭހަ ކޮށްދިނުމަށް ޓަކައި ކޮންމެ އުމްރާވެރިއެއްގެ ބީއެމްއެލް ޑެބިޓް ކާޑަށް މިހާރު އޮންނަ ލިމިޓުގެ އިތުރުން 1500 ޑޮލަރުގެ ލިމިޓެއް ހަމަޖައްސައިދޭން އެދިފައިވާ ކަމަށެވެ. އެއާއެކު ބީއެމްއެލުން ވަނީ ރޯދަ މަހާއި ޝައްވާލް މަހުގެ ފުރަތަމަ ހަ ދުވަހުގެ ތެރޭގައި އުމްރާއަށް ދާ ކަސްޓަމަރުންގެ ޑެބިޓް ކާޑުގެ ޑޮލަރު ލިމިޓް 1،500 ޑޮލަރަށް ބޮޑު ކޮށްދީފައިވާކަން އިއުލާންކޮށްފައެވެ. ކާޑަށް ދޫކުރާ އެ ލިމިޓް ބޭނުން ސައުދީ އަރަބިއާގައި އެކަނި ބޭނުންކުރެވޭނެ ކަމަށް ބީއެމްއެލުން ބުނި ނަމަވެސް އެކާޑު ބޭނުންނުކުރެވޭ ކަމުގެ ޝަކުވާ ގިނަ އުމްރާވެރިން ކޮށްފައިވެއެވެ.
މި މައްސަލައާ ގުޅޭގޮތުން ރާއްޖެޓީވީގެ ''ޓީވީޓޯކް ޕްރޮގްރާމް'' ގައި ތަޒްމީލް ވިދާޅުވީ، މި ސަރުކާރުން އެއްވެސް ކަމެއް ކުރުމުގައި އިހުލާސްތެރިކަމެއް ނެތްކަން ހާމަވަމުންދާ ކަމަށެވެ.
މިފަހުން އުމްރާއަށް ދިޔަކަން ފާހަގަކުރައްވައި ތަޒްމީލް ވިދާޅުވީ ޑެބިޓް ކާޑުން ވިޔަފާރި ކުރުމަށް މަސައްކަތް ކުރި ނަމަވެސް އެ ކާޑު ބޭނުން ނުކުރެވުނު ކަމަށެވެ. އަދި އެކުގައި އުޅުނު އެއްވެސް އުމްރާވެރިއެއްގެ ކާޑުން ނުކެނޑުނުކަން އޭނާ ފާހަގަކުރެއްވިއެވެ.
ތަޒްމީލް ވިދާޅުވީ މިސަރުކާރުގެ ރަނގަޅު ނިޔަތެއް އޮތްނަމަ މިހާރު ވެސް އެއަރޕޯޓުން ޓިކެޓަކަށް 500 ޑޮލަރު ދޭ އުސޫލުން އުމްރާވެރިންނަށް އިތުރު 1500 ޑޮލަރު ދޭންވާނެ ކަމަށެވެ. 50 އަށް ވުރެ އުމުރުން މަތީ މީހުން އުމްރާއަށްދާއިރު، ކާޑު ބޭނުން ކުރުމުގެ ބަދަލުގައި ޑޮލަރު އަތަށް ލިބުމުން މާ ބޮޑަށް ފަސޭހަވާނެ ކަމަށް އޭނާ ވިދާޅުވިއެވެ.
އަޅުގަނޑު މިފަހަރު އުމްރާއަށް ގޮސްފައި އަޅުގަނޑު ހިތަށް އެރި ހާދަހާވާ ރަނގަޅޭ ސަރުކާރުން. 1500 ޑޮލަރު މި ހަމަޖައްސައިދިނީ މިހައި ޑޮލަރު ތާށި ދުވަސްކޮޅެއްގައި. އަނެއްކާ ވަރަށް ގަދަބަހުން ވިދާޅުވި ސޯޝަލް ސެންޓަރުގައި 500 ޑޮލަރު މާރު ކުރަންށޭ ޖެހޭނީ އެނޫން ގޮތެއް ނޯންނާނެ. އެހެންވީމަ ސަރުކާރަށް ޑޮލަރު ލިބުނީމަ ރައްޔިތުންނަށް ޑޮލަރު ތިޔާގިވާނޭ. ޑޮލަރުގެ އަގު މައްޗަށް ވެސް ނުދާނޭ. އެހެންނަމަވެސް އަޅުގަނޑުމެން އުމްރާއަށް ދިއުމާ ހަމައަށް ވެސް ހަމަ 19، ނުވަތަ 20 ގައި.އެމްޓީޑީސީގެ ކުރީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު
ތަޒްމީލް ވިދާޅުވީ ރައީސް މުއިއްޒުގެ ބޭނުމަކީ ރަނގަޅު، ބޮޑެތި ހެޑްލައިންތައް ހެދުން ކަމަށެވެ. އަދި ދިވެހި ރައްޔިތުންނަކީ މޮޔައިން ކަމަށް ދެކި، އަދިވެސް ރައްޔިތުން މޮޔަ ހެއްދުމަށް މަސައްކަތް ކުރާ ކަމަށް އޭނާ ވިދާޅުވިއެވެ.
ތަޒްމީލް ވިދާޅުވީ، ދިވެހި ރައްޔިތުންގެ ކެތްތެރިކަން ކޮޅުންލާ ވަގުތު އަންނާނެ ކަމަށާއި، ރައްޔިތުން ސަރުކާރާ ދެކޮޅަށް ނުކުންނާނެ ކަމަށެވެ. އަދި ސަރުކާރުން ރައްޔިތުންނަށް ކަންކަން އޮޅުވާލައި، އަސްލު މަންޒަރު ކަޝްފު ކުރުމަށް މަސައްކަތް ކުރި ނަމަވެސް އެކަން ކާމިޔާބު ނުވާނެ ކަމަށް ވިދާޅުވިއެވެ.
