ޚާން ޔޫނިސްއަށް ހަމަލާދީ 7 ކުޑަކުދިންނާއެކު އެއް އާއިލާއެއްގެ 10 މެންބަރުން ޝަހީދުކޮށްލައިފި އެވެ.

ޣައްޒާގެ މަދަނީ ދިފާއީ އިދާރާއިން ބުނީ ހުކުރު ދުވަހުގެ ފަތިހުގެ ކުރިން އިސްރާއީލުން ދިން ވައިގެ ހަމަލާއެއްގައި ދެކުނުގެ ޚާން ޔުނިސް ސިޓީގައި ހަތް ކުޑަކުދިންނާއެކު އެއް އާއިލާއެއްގެ 10 މީހުން ޝަހީދުކޮށްލާފައިވާ ކަމަށެވެ.

އެ އެޖެންސީގެ ތަރުޖަމާނު މަހްމޫދު ބަސަލް އޭއެފްޕީއަށް ވިދާޅުވީ، މެދުތެރޭ ޚާން ޔުނިސްގައި ހުންނަ އަލްފަރާ އާއިލާގެ ގެއަށް އަމާޒުކޮށް އިސްރާއީލުން ދިން ވައިގެ ހަމަލާއާ ގުޅިގެން ޝަހީދުންގެ ގޮތުގައި ހަތް ކުޑަކުދިންނާއެކު 10 މީހަކު ހޮސްޕިޓަލަށް ގެނެސްފައިވާ ކަމަށެވެ.

ރިޕޯޓްތައް ބުނާ ގޮތުން ހަމަލާ އަމާޒުކޮށްފައި ވަނީ އަލް ފައްރާ އާއިލާގެ ގެއަށެވެ.

މީގެ އިތުރުން ޣައްޒާގެ އުތުރުގައި އޮންނަ އަލް އަތާތުރާ އަވަށުގެ ބެއިތު ލަހިޔާގައި ފަލަސްތީނުގެ ބަޔަކަށް އިސްރާއީލުން ވަނީ ހަމަލާދީފައެވެ. އަލްޖަޒީރާ އަރަބިކްގައި ރިޕޯޓްކޮށްފައިވާ ގޮތުން ދެ މީހަކު ޝަހީދުވެ އެތައް ބަޔަކު ޒަހަމްވެފައިވެއެވެ.

އިސްރާއީލުން ޣައްޒާގެ އެކި ހިސާބުތަކަށް ދިން ހަމަލާތަކުގައި ބުރާސްފަތި ދުވަހުގެ ފަތިހުން ފެށިގެން ފަލަސްތީނުގެ 29 މީހުން ޝަހީދުވެފައިވާއިރު، އެ ސަރަހައްދުގެ އުތުރުގައި އޮންނަ ޣައްޒާ ސިޓީގައި 13 މީހަކު ވަނީ ޝަހީދުވެފައެވެ.

ހަލާކުވެފައިވާ ގެތަކުގެ ގާކުނޑި ދަށުގައި ތާށިވެފައިވާ މީހުން ހޯދުމުގެ މަސައްކަތް ސިވިލް ޑިފެންސް ރެސްކިއު ޓީމުން ދަނީ ކުރަމުންނެވެ. އިސްރާއީލުގެ އަސްކަރިއްޔާއިން ވަނީ މިދިޔަ މަހު ހަނގުރާމަ ހުއްޓާލި ފަހުން ޣައްޒާގެ އެކި ސަރަހައްދުތަކުގައި ފަލަސްތީނުގެ 1500 އަށް ވުރެ ގިނަ މީހުން ޝަހީދުކޮށްލާފަ އެވެ.