އިންޑިއާ އައުޓް ހަރަކާތަކީ ސިޔާސީ ކަމެއް، އެކަން ކުރީ ރައްޔިތުންނަށް އޮޅުވާލަން - މާރިޔާ

އިންޑިއާ އައުޓް ހަރަކާތަކީ ސިޔާސީ ކަމެއް ކަމަށާއި، ޕީޕީއެމް ޕީއެންސީން އެކަން ކުރީ ރައްޔިތުންނަށް ކަންކަން އޮޅުވާލަން ކަމަށް ކުރީގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.

ރައިސިންގ ބަހާރަތް ސަމިޓް 2025 ގައި ބައިވެެރިވެވަޑައިގެން އަމާޒުކުރެވުނު ސުވާލަކަށް ޖަވާބު ދެއްވަމުން މާރިޔާ ވިދާޅުވީ ދިވެހި ސަރުކާރުގެ މިހާރު ފޮރިން ޕޮލިސީއަކީ ވަރަށް ބޮޑު އޮޅުންބޮޅުމެއްެ ތެރޭގައި އޮތް އެއްޗެއް ކަމަށެވެ. ރައީސް ޑރ. މުހައްމަދު މުއިއްޒު ޗައިނާއަށް ތާއީދު ކުރައްވާ ސިޔާސަތާ ބެހޭ ގޮތުން ވާހަކަ ދައްކަވަމުން މާރިޔާ ވިދާޅުވީ ރާއްޖޭގެ މިހާރުގެ ޚާރިޖީ ސިޔާސަތު ވަރަށް ބޮޑަށް އޮޅުން އަރާފައިވާ ކަމަށް ދެކެވަޑައިގަންނަވާ ކަމަށެވެ.

މާރިޔާ ވިދާޅުވީ އިންޑިއާ އޮތީ ބޭނުން ވެއްޖެ ކޮންމެ ފަހަރަކު އެހީވާން އަންނަން އެންމެ ފިޔަވަޅެއް ދުރުގައި ކަމަށާއި، އިންޑިއާގެ ބޮޑުވަޒީރު ނަރެންދުރަ މޯދީގެ އަވަށްޓެރި ފުރަތަމަ ސިޔާސަތާއި، އެމަނިކުފާނުގެ މެޗޫރިޓީއާ އެކު، ގައުމުތަކުން ވަނީ ރައްޔިތުންގެ މެދުގައި އޮންނަ ގުޅުން ދަމަހައްޓާފައި ކަމަށެވެ.

ރާއްޖޭގައި ކުރިއަށް ގެންދިޔަ "އިންޑިއާ އައުޓް" ކެމްޕެއިނާ ބެހޭ ގޮތުން މާރިޔާ ދީދީ ވިދާޅުވީ ސޯޝަލް މީޑިއާގައި ދެކެވޭ ވާހަކަތަކާ މެދު މީހުންނަށް އޮޅުން އަރާ މަރުހަލާއެއް އޮތް ކަމަށެވެ. އެކަމަކު އެއީ ރައްޔިތުންގެ ފެންވަރުގައި އޮތް ކަމެއް ނޫން ކަމަށާއި، އެއީ ހަމައެކަނި ސިޔާސީ ފިޔަވަޅެއް ކަމަށާއި، ރައްޔިތުންގެ ވިސްނުން ގައުމުގެ އެތެރޭގައި ހުރި ކަންކަމުން ދުރުކުރަން މަސައްކަތް ކުރަން ކުރިކަމެއްގެ ގޮތުގައި މާރިޔާ ވިދާޅުވިއެވެ. އެކަމަކު އިންޑިއާ އައުޓަކީ މިހާރު އޮތް ކަމެއް ނޫން ކަމަށް މާރިޔާ ވިދާޅުވިއެވެ.

ކަނޑުގެ ވިޔަފާރީގެ މެދުގައި ރާއްޖެ އޮންނަ އިރު، ދުނިޔޭގެ ބާރުތަކުގެ ބާރު ރާއްޖެއަށް ނުފޯރާނެ ގޮތަކާ މެދު ސުވާލު ކުރުމުން މާރިޔާ ވިދާޅުވީ ދެކުނު އޭޝިއާ ސަރަހައްދުގެ ގައުމުތަކުން މީގެ ކުރިން ވެސް އެކުގައި މަސައްކަތްކޮށްފައިވާ ކަމަށެވެ. ވަސީލަތްތައް ޙިއްޞާކުރުމާއި، މަޢުލޫމާތު ޙިއްޞާކުރުމަކީ ވަރަށް މުހިންމު ކަމެއް ކަމަށާއި، އެހެންކަމުން މުޅި ދުނިޔެއިން ދެކެނީ މިއީ އެއް ސަރަހައްދެއްގެ ގޮތުގައި ކަމަށް މާރިޔާ ވިދާޅުވިއެވެ.