ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަން، މުހައްމަދު ޝައްމާންގެ ގެއިން ހޯދި މޯބައިލް ފޯނަކީ މި މައްސަލައާ ގުޅުންހުރި ބިދޭސީ މީހާގެ ފޯނުކަން ހާމަވެއްޖެއެވެ.

24 މާރޗް 2025 ގައި ފުލުހުން ބުނެފައިވަނީ މި މައްސަލައާ ގުޅިގެން ޝަމްއާންގެ އާއިލާ މެންބަރެއްގެ ފޯނު ކޯޓު އަމުރެއްގެ ދަށުން ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. ނަމަވެސް ރާއްޖެއެމްވީއަށް އިތުބާރުހުރި ފަރާތަކުން ވިދާޅުވީ ޝައްމާންގެ ގެއިން ފުލުހުންގެ ބެލުމުގެ ދަށަށް ގެނެސްފައިވަނީ މައްސަލައާ ގުޅުންހުރި ބިދޭސީ މީހާގެ މޯބައިލް ފޯނު ކަމަށާއި، އެއީ އާއިލާ މެންބަރެއްގެ ފޯނެއް ނޫން ކަމަށެވެ.

އެބޭފުޅާ ވިދާޅުވީ އެ ފޯނުގައި މިސަރުކާރުގެ ވަޒީރަކާއި އެ ބިދޭސީ މީހާ ދައްކާފައިވާ ވާހަކަތަކުގެ ޗެޓް ލޮގްތައް ހުރި ކަމަށާއި، ވަރަށް ގިނަ މަޝްރޫއުތަކާ ޑީލްތަކުގެ ވާހަކަތައް ހުރި ކަމަށެވެ.

ފުލުހުން ގެންދިޔަ ތަކެތީގެ އިންވެންޓްރީގައި ސޮއިކުރުމަށް 21 މާރޗް 2025 ވީ ހުކުރު ދުވަހުގެ ރޭ ޝަމްއާން ހެންވޭރު ޕޮލިހަށް ހާޒިރުވުމުން، އޭނާ ހައްޔަރުކޮށްފައިވަނީ އެ ވާހަކަތައް މީޑީއާގައި ހިއްސާކުރާނެތީ ކަމަށް އެބޭފުޅާ ވިދާޅުވިއެވެ.

މި މައްސަލައާ ގުޅިގެން ރާއްޖެއެމްވީއަށް ފުލުހުން ބުނީ، ތަހުގީގު ކުރަމުންދާ މައްސަލައަކަށްވާތީ، އިތުރު މައުލޫމާތު ހިއްސާ ކުރެވެން ނެތް ކަމަށާއި، ޝައްމާން ދިރިއުޅޭ ގެ ބަލައި، ފާސްކޮށް ބައެއް ސާމާނުތައް ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.

ޝައްމާންގެ އަމުރަށް، 530،000 ދިވެހި ރުފިޔާއާއެކު ބިދޭސީއެއް ދޫކޮށްލާފައިވާ ކަމަށް ވެސް ފުލުހުން ބުނެފައިވެއެވެ.

މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުން ގެންދާއިރު، 6 އޭޕްރީލް 2025 ވީ އާދިއްތަ ދުވަހު ޝައްމާން ޝަރީއަތް ނިމެންދެން ވަނީ ބަންދު ކޮށްފައެވެ.