ރާއްޖެއަށް އެންމެ ރަނގަޅީ އެމްޑީޕީ އާއި ޑިމޮކްރެޓްސް ގުޅުން: ނަޝީދު
5 އެޕްރީލު 2025 | ހޮނިހިރު 14:29ރައީސް ނަޝީދު ވިދާޅުވީ މިވަގުތު ރާއްޖެއަށާއި ދެ ޕާޓީއަށްވެސް އެންމެ ރަނގަޅު ގޮތަކީ ދެ ޕާޓީ ގުޅުން ކަމަށް އެމަނިކުފާނަށް ފެނިވަޑައިގަންނަވާ ކަމަށް
ރައީސް ޞާލިހާއި ރައީސް ނަޝީދު ރަށްވެހި ފަތިސް ކެމްޕޭންގެ ތެރޭގައި
ރާއްޖެއަށް އެންމެ ރަނގަޅީ މޯލްޑިވިއަން ޑިމޮކްރަޓްސް ޕާޓީ (އެމްޑީޕީ) އާއި ދަ ޑިމޮކްރެޓްސް ގުޅުން ކަމަށް ރާއްޖޭގެ ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ހިއްސާކުރެއްވި ޕޯސްޓެއްގައި އެމަނިކުފާނު ވިދާޅުވީ މިވަގުތު ރާއްޖެއަށް އެންމެ ރަނގަޅު ގޮތަކީ އެއީ ކަމަށެވެ. ސަރުކާރު ޖަވާބުދާރީކުރުވުމަށް އެމްޑީޕީ އާއި ޑިމޮކްރެޓްސް ވަކާލާތުކުރަމުންދާ އިރު ބައެއް އާއްމުން ދަނީ އެ ދެ ޕާޓީ އެކުގައި ސަރުކާރު ޒިންމާދާރުކުރުވަން ޖެހޭ ކަމަށް ވަކާލާތުކުރަމުންނެވެ.
ރައީސް ނަޝީދު ވިދާޅުވީ މިވަގުތު ރާއްޖެއަށާއި ދެ ޕާޓީއަށްވެސް އެންމެ ރަނގަޅު ގޮތަކީ ދެ ޕާޓީ ގުޅި އެކުގައި މަސައްކަތް ކުރުން ކަމަށް އެމަނިކުފާނަށް ފެނިވަޑައިގަންނަވާ ކަމަށެވެ.
ޑިމޮކްރެޓްސް އުފައްދާފައި ވަނީ އެމްޑީޕީގައި ކުރިން އިސްކޮށް ތިއްބެވި ބައެއް ބޭފުޅުންނާއި އެކުގައެވެ. ސީދާ ރަސްމީކޮށް އެކުގައި މަސައްކަތް ނުކުރި ނަމަވެސް ޤާނޫނުއަސާސީ ދިފާއުކުރުމާއި، ވެރިކަމުގެ ބާރުތައް ވަކިވެފައި އޮތުމާއި، މިނިވަން މުއައްސަސާތަކުގެ މިނިވަންކަން ދެމެހެއްޓުން ފަދަ ކަންކަމުގައި މި ދެ ޕާޓީގެ ޚިޔާލު އެއް ގޮތްކަން ފާހަގަކުރެވެއެެވެ.
