މިދިޔަ އަހަރުގެ ފަހުކޮޅު މާޝަލް ލޯ އިއުލާން ކުރެއްވި މައްސަލައާއި ގުޅިގެން ދެކުނު ކޮރެއާގެ ދުސްތޫރީ ކޯޓުގެ އިއްތިފާގުން ރައީސް ޔޫން ސުކް ޔެއޯލް މަގާމުން ދުރުކުރުމަށް ވޯޓު ދީފި އެވެ.

ހުކުރު ދުވަހުގެ ހެނދުނު ކޯޓުގައި ހުކުމް ކިޔަވަމުން ދަނިކޮށް އެކްޓިން އުއްތަމަ ފަނޑިޔާރު މޫން ހިއުންގް-ބޭ ވަނީ ޔޫން މާޝަލް ލޯ އިއުލާން ކުރި ކޮންމެ ސަބަބެއް ދޮގުކޮށް، ޑިސެމްބަރު މަހު ވެރިރަށު މަގުތަކަށް ސިފައިން ނެރެ، ރައީސް އޭނާގެ ބާރުގެ ބޭނުން ނަހަމަގޮތުގައި ބޭނުންކޮށްފައިވާ ކަމަށެވެ.

މޫން ވިދާޅުވީ ދައުވާ ލިބޭ މީހާ ދުސްތޫރީ މުއައްސަސާތަކުގެ ބާރު ރޫޅާލުމަށް އަސްކަރިއްޔާ އާއި ފުލުހުންގެ ބާރުތައް އެއްކޮށް، ރައްޔިތުންގެ އަސާސީ ހައްގުތަކަށް އަރައިގަނެފައިވާ ކަމަށެވެ. އަދި އެކަން ކުރުމުގައި ގާނޫނު އަސާސީ ދަމަހައްޓަން ދުސްތޫރީ ވާޖިބު ދޫކޮށް ކޮރެއާގެ ރައްޔިތުންގެ އިތުބާރަށް ވަރަށް ބޮޑަށް ޚިޔާނާތްތެރިވި ކަމަށް މޫން ވިދާޅުވި އެވެ.

މޫން އިތުރަށް ވިދާޅުވީ، މިފަދަ ގާނޫނާ ހިލާފު އަދި ގާނޫނުއަސާސީއާ ހިލާފު އަމަލުތަކަކީ ގާނޫނުއަސާސީގެ ދަށުން ތަހައްމަލު ނުކުރެވޭނެ އަމަލެއް ކަމަށެވެ. މި އަމަލުތަކުގެ ނޭދެވޭ ނަތީޖާތަކާއި ރިޕްލް އިފެކްޓްސް ބޮޑު ކަމަށާއި އަދި މަގާމުން ވަކިކުރުމުން ދުސްތޫރީ ހަމަޖެހުން އަލުން ގެނައުމުގެ ފައިދާ ވެރިކަމުގައި ހުންނަވާ ރައީސަކު ވަކިކުރުމާ ގުޅިގެން ކުރާ ގައުމީ ހަރަދަށް ވުރެ ބޮޑުވާނެ ކަމަށެވެ.

އިދިކޮޅު ޑިމޮކްރެޓިކް ޕާޓީން ކޯޓުގެ ހުކުމަކީ "ރައްޔިތުންގެ ކާމިޔާބީ" އެއް ކަމަށް ސިފަކުރިއިރު، ޔޫންގެ ވެރިކަން ކުރާ ޕީޕަލް ޕަވަރ ޕާޓީން ބުނީ ކޯޓުގެ ހުކުމް ބަލައިގަންނަ ކަމަށެވެ.

މިއަދަކީ ގާނޫނު އަސާސީ ދިފާއުކޮށް، ޑިމޮކްރަސީ ނައްތާލަން މަސައްކަތްކުރި ބާރުތަކުން ޑިމޮކްރަސީ ރައްކާތެރިކުރި ތާރީހީ ދުވަހެއް ކަމަށް އިދިކޮޅު ޕާޓީގެ އިސް ތަރުޖަމާނު ޗޯ ސެންގްރޭ ވިދާޅުވި އެވެ.

ޔޫން ވަނީ ޑިސެމްބަރު މަހުގެ 3 ވަނަ ދުވަހުގެ ހަވީރު ކުރު މުއްދަތަކަށް މާޝަލް ލޯ އިއުލާންކޮށް، އެންޓިސްޓޭޓް އަދި އުތުރު ކޮރެއާގެ ބާރުތައް ސަރުކާރަށް ވަދެފައިވާ ކަމަށް ބުނެފަ އެވެ.

ނަމަވެސް ދެކުނު ކޮރެއާގެ ގައުމީ މަޖިލިސް ހުއްޓުވަން ފޮނުވި އަސްކަރީ އަދި ފުލުހުންގެ އިސް އޮފިޝަލުން ކޯޓުގައި ހެކިބަސް ދީފައި ވަނީ ވާދަވެރި ސިޔާސީ ބޭފުޅުން ހިފެހެއްޓުމަށާއި ޔޫންގެ އަސްކަރީ ވެރިކަމުގެ އަމުރު އުވާލުމަށް މަޖިލީހުން ވޯޓު ނުދެވޭނެ ގޮތަށް ހެދުމަށެވެ.

ދެކުނު ކޮރެއާގެ ގައުމީ މަޖިލީހުން ޑިސެމްބަރު 14 ވަނަ ދުވަހު ޔޫން މަގާމުން ދުރުކުރުމަށް ވޯޓު ދިން ނަމަވެސް ޔޫން ރަސްމީކޮށް ވަކިކުރުމަށް ދުސްތޫރީ ކޯޓުގެ ރުހުން ހޯދަންޖެހެއެވެ. ރިޔާސީ އިންތިހާބެއް ބޭއްވުމަށް ސަރުކާރަށް މިހާރު ލިބިފައިވަނީ 60 ދުވަހެވެ. އެކްޓިން ރައީސް ހާން ޑަކް-ސޫ އޭގެ ކުރިން އޭނާގެ މަގާމުގައި ދެމިހުންނާނެ އެވެ.

ކޯޓުގޭގެ ބޭރުގައި އެ ހުކުމާ ގުޅިގެން ޔޫންއަށް ފާޑުކިޔާ މީހުން ވަނީ އުފާފާޅުކޮށްފައެވެ. އަދި ޔޫން އަށް ތާއިދުކުރާ އުމުރުން ދުވަސްވީ ގިނަބަޔަކުވެސް ކޯޓު ކައިރީގައި އަޑު އުފުލަމުންދިޔައެވެ. އަދި ޔޫންގެ ދިފާއުގައި އެ ފަރާތްތަކުން ގޮވާލަމުން ދިޔައީ މިއީ ފޭރިގެންފައިވާ އިންތިހާބެއް ކަމަށާއި، ކޮރަޕްޝަން ހިމެނޭ ކަމަށެވެ.

މުޒާހަރާތައް ކުރިއަށްދިޔަ އިރު ގިނަ އަދަދެއްގެ ފުލުހުން ދިޔައީ ހިނގާފާނެ ހަމަނުޖެހުމަކަށް ތައްޔާރުވަމުންނެވެ. އެގޮތުން އެތައް ސަތޭކަ ސިފައިން އެކަމަށް ތައްޔާރުވެ ތިއްބެވެ.