"އިގްތިސާދު ފެއިލްވުމުން ސަރުކާރުގެ ސްޓްރެޓެޖީ އަކީ ހިލޭ އެއްޗެއް ދީގެން ރައްޔިތުންނަށް އޮޅުވާލުމާއި، އޮޅުވާލައިގެން ޖަލްސާތައް ބޭއްވުން"
3 އެޕްރީލު 2025 | ބުރާސްފަތި 09:50އެކި އުކުޅުތައް ބޭނުންކޮށްގެން އާއްމުންނަށް އޮޅުވާލާ ކަމަށް އޭނާ ވަނީ ވިދާޅުވެފައި
މަޖިލީހުގެ ހުޅުމާލޭ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު
އިގްތިސާދު ފެއިލްވުމުން ސަރުކާރުގެ ސްޓްރެޓެޖީ އަކީ ހިލޭ އެއްޗެއް ދީގެން ރައްޔިތުންނަށް އޮޅުވާލުމާއި، އޮޅުވާލައިގެން ޖަލްސާތައް ބޭއްވުން ކަމަށް ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެޓީވީގެ "ޓީވީ ޓޯކް" ޕްރޮގްރާމްގައި ވާހަކަދައްކަވަމުންނެވެ.
ސަރުކާރުގެ ސިޔާސަތުތައް ފެއިލްވުމުން ރައްޔިތުންނަށް އޮޅުވާލުމަށް ކެނޑިނޭޅި ސަރުކާރުން މަސައްކަތް ކުރާ ކަމަށް އޭނާ ވަނީ ވިދާޅުވެފަ އެވެ. އެގޮތުން އިގްތިސާދު ފެއިލްވެ ހޫނުފެނަށް ވެއްޓުމުން ހިލޭ އެއްޗެއް ދީގެން ރައްޔިތުން ރުއްސަން މަސައްކަތް ކުރާ ކަމަށް ޝަމްހީދު ވަނީ ވިދާޅުވެފަ އެެވެ. އިންތިޚާބުގެ ދުވަސްވަރު ކައިރި ވުމުން ސަރުކާރުން އަނެއްކާވެސް ޖަލްސާ ބާއްވައިގެންނާއި އެކި އުކުޅުތައް ބޭނުންކޮށްގެން އާއްމުންނަށް އޮޅުވާލާ ކަމަށް އޭނާ ވަނީ ވިދާޅުވެފަ އެވެ.
ސަރުކާރުގެ އެއްވެސް ރޭވުންތެރިކަމެއް ނެތުމުން ކަންކަން ފެއިލްވާ ކަމަށް ޝަމްހީދު ވިދާޅުވިއެވެ. އިގްތިސާދު ހަމައަކަށް އަޅުވާނެ ކަމަށް ވައުދުވެގެން މި ސަރުކާރު ވެރިކަމަށް އައި ނަމަވެސް ކަންކަން ވެގެން ދިޔައީ އެހެން ނޫން ކަމަށް އޭނާ ވިދާޅުވި އެވެ. އިގްތިސާދީ ގޮތުން ސަރުކާރުން ފެށި ހުރިހާ މަޝްރޫޢު އެއް މިއަދާއި ހަމައަށް ހުރީ ހުއްޓިފައި ކަމަށް ވެސް ޑރ.ޝަމްހީދު ވަނީ ވިދާޅުވެފަ އެވެ. އަދި ނިމިދިޔަ ސަރުކާރުން ފެށި މަޝްރޫޢުތައް ވެސް ހުއްޓިފައި ހުރި ކަމަށް އޭނާ ވިދާޅުވި އެވެ.
ހިތަށް އަރަނީ އެމްޑީޕީ ސަރުކާރުގަ އެކަހަލަ ކަމެއް ނުވާނެ އޭ. ރާއްޖޭގެ ޝިޕިން ފެށި އެމްޑީޕީ ސަރުކާރުން. އެކަން ކާމިޔާބު ކުރި. މި ބޭފުޅުން ފަށާ ކޮންމެ ކަމެއް ފެންނަނީ ކާމިޔާބު ނުވެ ފެއިލްވާތަން. ކަންކަން ހިނގާ ކަމަށް ދައްކަން ސޮއިކުރަނީ އޮޅުވާލަން. އެއިން ކަމެއް ދުވަަހަކު ނުފެށޭ. ނިމިދިޔަ ސަރުކާރުން ފެށި ކަންކަން ވެސް ހުރީ އެހެން ހަމަ.މަޖިލީހުގެ ހުޅުމާލޭ ދެކުނު ދާއިރާގެ މެމްބަރު ޑރ.އަހްމަދު ޝަމްހީދު
މި ސަރުކާރުން މަޝްރޫޢުތަކާއި ސިޔާސަތުތައް ހިންގަނީ އެއްވެސް ކަހަލަ ދިރާސާ އެއް ކުރުމެއް ނެތި ކަން ވަރަށް ސާފުކޮށް ފެންނަމުންދާ ކަމަށް އޭނާ ވިދާޅުވިއެވެ. އޭނާ ވިދާޅުވީ ދައުރު ފެށުމާއި އެކު އިކޮނޮމިކް މިނިސްޓަރ 3 މަސް ތެރޭގައި ރާއްޖެ އަށް ދިމާވެފައިވާ ޑޮލަރުގެ މައްސަލަ ހައްލުވާނެ ކަމަށް ވިދާޅުވެފައިވާ ކަމަށެވެ. އަދި އޭގެ ފަހުން ރައީސުލްޖުމްހޫރިއްޔާ ޗެލެންޖްކުރުމަށް ފަހު، ދެން ޑޮލަރުގެ އަގު ބޮޑު ނުވާނެ ކަމަށް ބުނި މަންޒަރު ފެނުނު ކަމަށް ޑރ.ޝަމްހީދު ވިދާޅުވި އެވެ.
