މެލޭޝިއާގެ ޕެޓްރޯނާސް ގޭސް ހޮޅީގައި ބޮޑު އަލިފާނުގެ ހާދިސާއެއް ހިނގައިފި

މެލޭޝިއާގެ ދައުލަތުގެ ހަކަތަ އުފައްދާ ކުންފުނި ޕެޓްރޯނާސް އިން ހިންގާ ގޭސް ހޮޅިއެއްގައި ބޮޑު އަލިފާނުގެ ހާދިސާއެއް ހިނގައި ބައެއް ފަރާތްތަކަށް ފަރުވާދޭން ފަށައިފިއެެވެ.

ކަމާބެހޭ ފަރާތްތަކުން ބުނީ ވެރިރަށް ކުއަލަލަމްޕޫރުގެ ބޭރުގައި އޮންނަ ޕުޗޮންގް ޓައުންގައި ރޯވި އަލިފާންގަނޑު މެންދުރު ފަހުގެ ވަގުތެއްގައި ނިއްވާލާފައިވާ ކަމަށެވެ. އެމީހުން ބުނީ މަދުވެގެން 305 މީހުންނަށް އަސަރުކޮށްފައިވާ ކަމަށާއި އޭގެ ތެރޭގައި 190 ވަރަކަށް ގެއަށް ގެއްލުން ލިބުމުން ގެދޮރު ނެތި ދޫކޮށްލާފައިވާ މީހުން ހިމެނޭ ކަމަށެވެ.

އެއްވެސް މީހަކު މަރުވެފައި ނުވާއިރު، ހޮސްޕިޓަލުގައި އެޑްމިޓް ކުރި މީހުންގެ ހާލު ވެސް ރަނގަޅު ކަމަށް ހެލްތު މިނިސްޓަރު ވިދާޅުވި އެވެ.

ދައުލަތުގެ ނޫސް އެޖެންސީ ބެރްނާމާ އިން ހެލްތު މިނިސްޓްރީގެ ޑޭޓާއާ ހަވާލާދީ ބުނީ 145 މީހަކަށް ހޮސްޕިޓަލުން ފަރުވާ ލިބިފައިވާ ކަމަށާއި އޭގެ ފަހުން 41 މީހަކު ދޫކޮށްލާފައިވާ ކަމަށެވެ. އެމީހުންނަށް ފަރުވާ ދީފައިވަނީ ފިހިފައިވާ ތަންތަނާއި އެހެނިހެން އަނިޔާތަކާއި ނޭވާލާ ނިޒާމުގެ މައްސަލަތަކަށް ކަމަށް ދައުލަތުގެ ކަމާބެހޭ ފަރާތްތަކުން ބުނެއެވެ.

އަލިފާންގަނޑު ފެށުނީ އަންގާރަ ދުވަހުގެ ވަގުތެއްގައެވެ. ނޫސްވެރިންނާއި ސޯޝަލް މީޑިއާގައި އާންމުން ހިއްސާކުރި ފޮޓޯ ވީޑިއޯއިން ފެންނަނީ އޮރެންޖު ކުލައިގެ އުސް އަލިފާންގަނޑަކާއި އުޑުމަތިން ފެންނަ ދުންގަނޑަކެވެ.

ޕެޓްރޯނާސް އިން މީގެ ކުރިން ބުނެފައި ވަނީ ޕައިޕްލައިން ވަކިކޮށް، ވަށައިގެންވާ ހިސާބުގައި ދިރިއުޅޭ މީހުންގެ ސަލާމަތާއި ތިމާވެއްޓާއި، ގޭސް ސަޕްލައިގެ ރައްކާތެރިކަން ކަށަވަރު ކުރުމަށް ކަމާ ބެހޭ ހުރިހާ ފަރާތްތަކާ ގުޅިގެން މަސައްކަތް ކުރަމުން އަންނަ ކަމަށެވެ.

މެލޭޝިއާގެ ބޮޑުވަޒީރު އަންވަރު އިބްރާހިމް ވިދާޅުވީ އެ ސަރަހައްދު އަލުން އާރާސްތު ކުރުމުގެ ފުރިހަމަ ޒިންމާ ސްޓޭޓް ސަރުކާރާއި ޕެޓްރޯނާސް އިން ނަގާނެ ކަމަށާއި އެ ކަމަށް އަހަރެއްހާ ދުވަސް ނަގާނެ ކަމަށެވެ.

މި ހާދިސާ ހިނގަން މެދުވެރިވި ސަބަބު ދެނެގަންނަން ވަގުތު ނަގާނެ ކަމަށް އަންވަރު ވިދާޅުވިއެވެ. އަދި ފުރިހަމަ ތަހުގީގެއް ކުރުމަށް ވަނީ އަންގާފައެވެ. މީގެ އިތުުރުން އެންމެ ބޮޑު އިސްކަމެއް ދެއްވަނީ ސަލާމަތާއި ރައްކާތެރިކަމަށް ކަމަށާއި، ހާލުގައި ޖެހުނު ފަރާތްތަކަށް މާލީ އެހީތެރިކަން ފޯރުކޮށްދޭނެ ކަމަށް އޭނާ ވިދާޅުވި އެވެ.