ދިރާސީ އައު އަހަރުގެ ކިޔެވުން ފެށެންވާއިރަށް، ފޮތްތައް ހަވާލުކޮށް ނިމޭނެ ކަމަށާއި، ވަރަށް ފުރިހަމައަށް ތައްޔާރު ވަމުންދާ ކަމަށް އެޑިޔުކޭޝަން މިނިސްޓަރު ޑރ.އިސްމާއީލް ޝަފީއު ވިދާޅުވެއްޖެއެވެ.
ސްކޫލު ފޮތްތައް ދޫކުރުމުގައި ލަސްތަކެއް ކުރިމަތިވެފައިވާ ކަމަށާއި، ބައެއް ޓެކްސްޓް ފޮތްތައް އަދިވެސް ނުލިބޭ ކަމަށް ބުނެ، ބައެއް މީހުން ދަނީ ސޯޝަލް މީޑިއާގައި އެކަމުގެ ކަންބޮޑުވުން ފާޅު ކުރަމުންނެވެ. އަދި ބައެއް ސްކޫލުތަކުގެ ވައިބާ ގްރޫޕްތަކުގައި ވެސް ދަރިވަރުންގެ ފޮތްތައް ނުލިބޭ ކަމަށް ބުނެ ބެލެނިވެރިން ނުރުހުންފާޅު ކޮށްފައިވެއެވެ.
މިމައްސަލައާ ގުޅިގެން ރާއްޖެއެމްވީއަށް އެޑިޔުކޭޝަން މިނިސްޓަރު ޝަފީއު ވިދާޅުވީ ދިރާސީ އައު އަހަރަށް ތައްޔާރުވުމުގެ މަސައްކަތްތައް މިނިސްޓްރީގެ އިތުރުން ސްކޫލުތަކުން ވަރަށް ފުރިހަމައަށް ކުރަމުންދާ ކަމަށާއި، ޕްލޭންއާ އެއްގޮތަށް ފޮތްތައް ދޫކުރަމުންދާ ކަމަށެވެ. އަދި މިހާރު ސްކޫލުތަކުން ދޫކުރަމުންދާނީ އެންމެ ފަހު ބެޗް ކަމުގައިވާ ގްރޭޑް 4 އަދި 5 ގެ ދަރިވަރުންގެ ފޮތްތައް ކަމަށް މިނިސްޓަރު ޝަފީއު ވިދާޅުވިއެވެ.
މިނިސްޓަރު ޝަފީއު ވިދާޅުވީ ސްކޫލުތައް ހުޅުވުމުގެ ކުރިން ހުރިހާ މަސައްކަތެއް ނިމޭނެ ކަމަށާއި، ފޮތްތައް ދޫކޮށް ނިންމަން ކަނޑައެޅި ތާރީހަށްވުރެ ދެ ދުވަސް ކުރިން ނިންމާލެވޭނެ ކަމަށެވެ. އަދި ވިދާޅުވީ ބެލެނިވެރިންނަށް ވެސް ތައްޔާރުވުމުގެ ފުރުސަތު ލިބޭނެ ކަމަށެވެ.
ރަމާޟާން މަހާ ދިމާކޮށް ދިރާސީ އަހަރުގެ ކިޔެވުން ނިންމައި, ރާއްޖޭގެ ހުރިހާ ސުކޫލެއްގެ ދަރިވަރުންގެ ޗުއްޓީ ފަށާފައިވަނީ 27 ފެބްރުއަރީ 2025 ގައެވެ. ޗުއްޓީ ނިންމައި ސްކޫލުތަކުގެ ކިޔެވުން ފެށޭނީ އޭޕްރީލު މަހުގެ ހަތްވަނަ ދުވަހެވެ. އަދި އަންނަ ޑިސެމްބަރު މަހުގެ 25 ވަނަ ދުވަހަށް ދިރާސީ އަހަރުގެ ކިޔެވުން ނިންމައި، ޗުއްޓީއަށް ދާނެއެވެ. އެއަށްފަހު އައު ދިރާސީ އަހަރު ފަށާނީ 2026 ވަނަ އަހަރުގެ ޖަނަވަރީ 27 ގައެވެ.