ވުޒާރާތައް ހަދަނީ ބޭނުމެއްގައެވެ. ވަޒީރުން އައްޔަން ކުރަނީ ވެސް ބޭނުމެއްގައެވެ. އެންމެ މުހިއްމު ކަމަކީ ރައްޔިތުންނަށް ހިދުމަތްކޮށްދިނުމެވެ. ވުޒާރާއެކޭ ބުނުމުން އެގޭ ހައިބަތު ވަރަށް ބޮޑެއެވެ. މެންޑޭޑްޓްވެސް އެހާ ބޮޑުވާނެ ކަމަށް ޤަބޫލުކުރެއެވެ. އެކަމަކު މިސަރުކާރުގެ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވުޒާރާ ފެންނަނީ ވަރަށް ތަފާތު ކޮށެވެ. ސަރުކާރުގެ ފުރަތަމަ އަހަރު ހޭދަކުރީ އެއަހަރުގެ ރޯދަ މަހަށް ގޭގެއަށް ކާޑު ބެހުމުގައެވެ. ދެން އެއަހަރުގެ ފިތުރު އީދަށް ވެރިކަން ކުރާ ރަށްރަށަށް ލައިޓް ފޮނުވުމުގައެވެ. އެކަހަލަ ގޮތަކަށް ގޮސް އަހަރު ނިމުނީއެވެ. މިހާރު މިހިނގަނީ ވެރިކަމުގެ ދެވަނަ އަހަރެވެ. މިއަހަރުވެސް މިދެންނެވި ވުޒާރާ ފެންނަނީ މިކަހަލަ ގޮތަކަށެވެ. ދާދި ފަހުން ނިންމި އެންމެ ބޮޑު މަޝްރޫއުއަކީ މިއަހަރުގެ ފިތުރު އީދަށް އިތުރު 36 ރަށަށް ލައިޓް ފޮނުވުމެވެ. ފިތުރު އީދަށް އެރަށްރަށް ދިއްލުމެވެ. ވާހަކަ ދައްކަވަމުން ދިޔައީ ފިތުރު ޢީދަށް މުޅި ރާއްޖެ ދިއްލާލަނީ ކަމަށެވެ. އެކަމުގައި މިނިސްޓަރާއި، މިނިސްޓްރީގެ މުވައްޒަފުން ދެފައި އެއްތާނގައި ނުޖަހައި ކޮނޑު ހުޅު ނެއްޓެންދެން މަސައްކަތް ކުރަމުންދާ ކަމަށެވެ. ބޭނުމަކީ ދިއްލައިގެން އިސްލާމީ ވަޙްދަތު ވަރުގަދަ ކުރުން ކަމަށެވެ.

އާޚިރުގައި ކަންވީ ގޮތް އިނގޭތޯއެވެ. ލައިޓް ފޮނުވަން ބުނި ރަށްރަށް ފުރަތަމަ ފޮނުވާނެ ކަމަށް އެންގީ ނުވަ އައިޓަމެކެވެ. މަސްދުވަސް ފަހުން ދެން އެންގީ ފޮނުވޭނީ 6 އައިޓަމް ކަމަށެވެ. ފޮނުވާ ނިމުނު އިރު ގިނަ ރަށްރަށަށް 6 އައިޓަމްވެސް ހަމަ ނުވެއެވެ. ބައެއް ރަށްރަށުގައި ކޮންމެވެސް ތިން ދިމާލެއްގައި އެބުނާ ކަހަލަ 3 ލައިޓެއް ޖަހާފައި ދިއްލިއެވެ. ރާއްޖެ ދިއްލުމަށް ބޮޑު ސިންގާ ރަސްމިއްޔާތެއް ވެސް ބޭއްވިއެވެ. އެކަމުގައި އެކްސްސައިޓްމަންޓްގައި ހުންނަވައިގެން އަނގަފުރާ ޝުކުރުގެ ބަސްތައް އަޅުއްވައިގެން ގަދަ އަޑުން މިނިސްޓަރު ސްޕީޗެއްވެސް ދެއްވިއެވެ.

ކޮންމެއަކަސް ފިތުރު އީދަށް މުޅި ރާއްޖެ ދިއްލައިފިއެވެ. ދިއްލާލާފައިބެލި އިރު ރާއްޖޭގެ އާބާދީގެ ބޮޑު ބައި އޮތީ ނުދިއްލިއެވެ. 184 ރަށުގެ ތެރެއިން ދިއްލި ކަމަށްވަނީ 60 ހަކަށްރަށެވެ. ބާކީ 125 ރަށް އޮތީ އަނދިރީގައެވެ. އިސްލާމީ ވަހުދަތެއްވެސް ނެތެއެވެ. ފިތުރު އީދުގެ އުފަލެއްވެސް ނެތެއެވެ. އެކަމުގެ މުޅި ރާއްޖެ ދިއްލާލީއެވެ.

ޤަބޫލުފުޅު ކުރައްވާށެއެވެ. ފާޑު ފާޑުގެ ބޮކި ގެނެސް ދިއްލައިވައިގެން ދެއްކުންތެރިކަމުގެ އެތައް އަމަލެއް ހިންގަވައިގެން ރައީސް އަށް ތައުރީފް ކުރައްވައިގެންވެސް ހިފެހެއްޓެވޭނީ އީދު ހަ ދުވަސްނޫންތޯއެވެ. މި ހަދުވަހަށްފަހު ދެން ހައްދަވާނީ ކިހިނެއްތޯއެވެ. ދެން ދައްކަވަން އޮތީ ކޮންއެއްޗެއް ދިއްލާ ވާހަކަ ތޯއެވެ. ފިތުރު އީދަށް ރަށްރަށް ދިއްލެވިއިރު، މާލެ ނަގާފައި އޮތް އެންމެ އާބާދީ ބޮޑު އައްޑޫ ސިޓީ އޮތި އަނދިރީގައެވެ. ލ. އަތޮޅުގެ ބައެއް ކުދި ކުދި ރަށްރަށްވެސް ހަމަ އެހާލުގައެވެ. މި 6 ދުވަހަށްފަހު ރައްޔިތުންގެ ޝަކުވާތަކާއި މައްސަލަތައް އޮއްބަން ދެން ކުރައްވާނީ ކީއްތޯއެވެ. ދެން ކުޅުއްވާނީ ކޮން ޗަރުކޭހެއްތޯއެވެ. ލައިޓް ދިއްލުމުގެ ޖަލްސާގައި ހުންނަވައިގެން ރަށްރަށް ދިއްލުމުގެ ބުރަ މަނަސައްކަތުގެ އިތުރަށް މިނިސްޓްރީގެ މުވައްޒަފުން، ކައުންސިލް އިމާރާތްތައް އަޅާނެ ސަބް ކޮންޓްރެކްޓަރުން ހޯދަން ވަރަށް ބުރަކޮށް މަސައްކަތް އެބަ ކުރެޔޭ ވިދާޅުވެ ވަޒީރު ވާހަކަފުޅު ދެއްކެވުމަކުން ހުރިހާ ކަމައް ހަމައެއް ނުޖެހޭނެ ނޫންތޯއެވެ.

ހަޤީޤަތާއި ކުރިމަތި ލައްވާށެވެ. ހަޤީޤަތް ޤަބޫލުކުރައްވާށެވެ. ދިވެހި ރައްޔިތުން ތިބީ ތިޔަހެން ދިއްލާލާ ލައިޓަކުން ފިލައިގެންދާވަރުގެ ވޭނެއްގައެއް ނޫނެއެވެ. ތިޔަހެން ދައްކަވާ ފޮނި ވާހަކައަކުން ނެތިގެންދާވަރުގެ ރިހުމެއްގައެއް ވެސް ނޫނެއެވެ. އެޔަށްވުރެ ހާލަތު ދަށެއެވެ. ސީދާ މައްސަލައަށް އެޑްރެސްކުރައްވާށެއެވެ.