މި ސަރުކާރުން ވަނީ އާސަންދަ ސްކީމް ކެންޕޭން ފަންޑަކަށް ބަދަލުކޮށްފައި: ބޮންޑާ
އާސަންދަ ސްކީމް އަކީ ވަރަށް ބޮޑަށް ރަނގަޅު ކުރަންޖެހޭ ސްކީމެއް
ފަލަސުރުހީ ޕްރޮގްރާމްގައި މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) ވާހަކަ ދައްކަވަނީ
މި ސަރުކާރުން އާސަންދަ ސްކީމް ކެންޕޭން ފަންޑަކަށް ބަދަލުކޮށްފައިވާ ކަމަށް މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
ރާއްޖެޓީވީގައި އާސަންދަ ސްކީމާ ގުޅޭގޮތުން ވާހަކަ ދައްކަވަމުން އިބްރާހިމް ރަޝީދު ވިދާޅުވީ އާސަންދަ ސްކީމްއަކީ ވަރަށް ބޮޑަށް ރަނގަޅު ކުރަންޖެހޭ ސްކީމެއް ކަމަށާއި، އެއީ ވަރަށް ބޮޑަށް އިސްރާފުވާ ގޮތަށް އޮތް ސްކީމެއް ކަމަށެވެ.
ބޭހަށް ބޮޑު ހޭދައެއް ކުރަންޖެހޭކަން ފާހަގަކުރައްވައި އިބްރާހިމް ރަޝީދު ވިދާޅުވީ އާސަންދަ ހިނގި ނަމަވެސް ސްކީމް ވަރަށް ގޯސް ކަމަށާއި، އޭގެން ވަތްގަނޑަށް ވަންނަ އެއްޗެއް ނެތް ކަމަށެވެ. އާސަންދަ އޮޑިޓް ކޮށްފި ކަމަށްވާނަމަ ގިނަ މައްސަލަތައް ތިލަވާނެ ކަމަށް އޭނާ ވިދާޅުވިއެވެ.
މީގެ އިތުރުން އިބްރާހިމް ރަޝީދު ވިދާޅުވީ މި މިސަރުކާރުގައި އާސަންދައަކީ ވޯޓު ހޯދުމަށް ބޭނުން ކުރާ ކެންޕޭން ފަންޑަކަށް ބަދަލުކޮށްފައިވާ ކަމަށެވެ. އަދި ވިދާޅުވީ ރާއްޖޭގެ އާބާދީއަށް ވުރެ ގިނަ މީހުން އާސަންދައިން ޚިދުމަތް ހޯދާފައިވާ ކަމަށާއި، މިއީ ވަރަށް ކަންބޮޑުވާ ބޮޑު މައްސަލައެއް ކަމަށެވެ.
މިހާރު އެންސްޕާ އަދި އާސަންދަ އަކީ ކުންފުންޏެއް. ނިމިދިޔަ ވެރިކަމުގައި އަޅުގަނޑުމެން ކޮމެޓީން ވަރަށް ބޮޑަށް ބެލިން އޭގައި ރަނގަޅު ކުރަންޖެހޭ ކަންކަން. ވަރަށް ބޮޑަށް އިސްރާފުވާ ގޮތަށް ކުރެވޭ ގޮތަށް ހުރީ. ބޭހުގެ މައްސަލައިން ފެށިގެން ގޮސް. އެހެންވީމަ ބޭހުގެ ހަރަދުތަކަށް ވެސް ވަރަށް ބޮޑު ހޭދައެއް ސަރުކާރު ކުރަންޖެހޭ. ދެން ރައީސް ނަޝީދުގެ ވެރިކަމުގައި ތާ އެކަމެއް ފެށީ. ދެން އޭތި ގޯސްވެގެން ގޮސް މިއޮތީ ކެންޕޭން ފަންޑަށް ބަދަލު ވެފައި މިހާރު. ވޯޓު ހޯދާ އެއްޗަކަށް ބަދަލުވެފައި. މިސަރުކާރުން މާގޯސް. އަޅުގަނޑު ނޫހުން ދުށިން ކުރީ ސަރުކާރުތަކަށް ވުރެ މާ ބޮޑު އަދަދެއް ހޭދަކޮށްފައިވާ ވާހަކަ. ދެ ބިލިއަން ކަންނެނގެ ތިން ބިލިއަން ކަންނޭނގެ. ރާއްޖޭގެ ގާތްގަނޑަކަށް އާބާދީގެ، ވޯޓުލީ އާބާދީ އަށްވުރެ ގިނަ އާބާދީ ޚިދުމަތް ހޯދި ވާހަކަ. އަޅުގަނޑުމެންނަށް ގަބޫލެއް ނުކުރެވޭ. އަޅުގަނޑުމެން އޭގެން ޚިދުމަތެއް ނުހޯދަން އާސަންދައިން. ދިވެހިރާއްޖޭގެ އާބާދީއަށް ވުރެ ގިނަ ބަޔަކު އޭގެން ޚިދުމަތް ހޯދި.މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ)
އިބްރާހިމް ރަޝީދު ވިދާޅުވީ ފައިސާއަކީ ރައްޔިތުންގެ ފައިސާ ކަމަށާއި، ރައްޔިތުން މި ކަންކަމަށް ފާރަވެރިވާން ޖެހޭ ކަމަށެވެ. އަދި ވިދާޅުވީ މިސަރުކާރަށް އަތް ނުލެވެނީ ޕެންޝަން ފަންޑުގައި ކަމަށާއި، އެއީ އެއްވެސް ސަރުކާރަކަށް އަތް ނުލެވޭ ގޮތަށް ފަރުމާކޮށް، ހިންގާ ފަންޑަކަށްވާތީ ކަމަށް އޭނާ ވިދާޅުވިއެވެ.
