ގެއްލިގެން ހޯދަން އިއުލާންކޮށްފައިވާ މީހަކު މަސްތުވާތެކެތީގެ މައްސަލައެއްގައި ހައްޔަރުކޮށްފި
އޭނާގެ ބަންދަށް ހޮނިހިރު ދުވަހު 10 ދުވަހުގެ މުއްދަތެއް ކްރިމިނަލް ކޯޓުން ވަނީ ޖަހައިފަ
ނ. މަނަދޫ، ރީހުއްސަބާ، ޢަބްދުالله ޝިހާދު
ގެއްލިގެން ހޯދަން އިއުލާންކޮށްފައިވާ މީހަކު މަސްތުވާތެކެތީގެ މައްސަލައެއްގައި ހައްޔަރުކޮށްފިއެވެ.
މި މަހުގެ ކުރީކޮޅު ނ. މަނަދޫ، ރީހުއްސަބާ، ޢަބްދުالله ޝިހާދު ގެއްލިގެން ހޯދުމަށް ފުލުހުން ވަނީ އާއްމުކޮށް އިއުލާންކޮށްފައެވެ. އުމުރުން 37 އަހަރުގެ އެ ޒުވާނާ ގެއްލިގެން ހޯދަން ފަށާފައި ވަނީ މިހިނގާ މާރޗް މަހުގެ އަށް ވަނަ ދުވަހުގެ 16:51 އިން ފެށިގެން އޭނާގެ ހަބަރެއް ނުވާ ކަމަށް އާއިލާ އިން ރިޕޯޓްކޮށްފައިވާތީ ކަމަށް ފުލުހުން ވަނީ ބުނެފައެވެ.
ފުލުހުން ބުނިގޮތުަގައި އެކަން އެ އިދާރާ އަށް ރިޕޯޓްކޮށްފައި ވަނީ މި މަހުގެ 10 ވަނަ ދުވަހުގެ 20:05 އެހައިކަންހާއިރެވެ. ފުލުހުން ވަނީ އޭނާ ހޯދުމުގެ މަސައްކަތް ފުލުހުން ކުރަމުންދާ ކަމަށާއި ޝިހާދު ދިރިއުޅެނީ މާލޭގައި ކަމަށް އޭރު ހާމަކޮށްފައެވެ. މީގެ އިތުރުން އޭނާގެ ފޯނަށް ވެސް ނުގުޅޭ ކަމަށް އާއިލާ އާއި ހަވާލާދީ ފުލުހުން ވަނީ އޭރު ހާމަކޮށްފައެވެ.
ހޮނިހިރު ދުވަހު އާއްމުކުރި ކޯޓު އަމުރެއްގައި ވާގޮތުން އޭނާ މަސްތުވާތަކެތީގެ މައްސަލައެއްގައި ވަނީ ހައްޔަރުކޮށްފައެވެ. އަދި އޭނާގެ ބަންދަށް ހޮނިހިރު ދުވަހު 10 ދުވަހުގެ މުއްދަތެއް ކްރިމިނަލް ކޯޓުން ވަނީ ޖަހައިފައެވެ.
އޭނާގެ މައްޗަށް ތުހުމަތު ކުރެވެނީ ޖިނާއީ ބޮޑު ކުށެއްގެ ގޮތުގައި ހިމެނޭ، ރާއްޖެއަށް މަސްތުވާތަކެތި އެތެރެކުރުމާއި ވިޔަފާރި ކުރުމުގެ ކުށް ކަމަށް އޭނާ ބަންދުގައި ބެހެއްޓުމަށް ނެރުނު ކޯޓު އަމުރުގައި ވަނީ ބުނެފައެވެ.
