"ސަރުކާރުން އީދު ބޮކި ފޮނުވާ ރަށްތަކުގެ ލިސްޓުން އޮމަދޫ އުނިކުރީ އެ ރަށު ރައްޔިތުން ލަދު ގަންނަވަން"
30 މާރިޗު 2025 | އާދީއްތަ 14:0928 މިލިއަން ރުފިޔާ ހޭދަކޮށްގެން އީދުބޮކި ދިއްލަން ސަރުކާރުން މިހާބޮޑު އިސްކަމެއް ދިން ދިނުމުން އާއްމުން ދަނީ އެކަމަށް ފާޑުކިޔުން އަމާޒުކުރަމުން
އދ. އޮމަދޫ
ފިތުރު އީދާ ގުޅިގެން ސަރުކާރުން އީދު ބޮކި ފޮނުވާ ރަށްތަކުގެ ލިސްޓުން އޮމަދޫ އުނިކޮށްފައިވާ ކަމަށް އެ ކައުންސިލުން ބުނެފި އެވެ.
އެ ކައުންސިލުން ބުނެފައި ވަނީ މި އަހަރު ފިތުރު އީދުގައި ކުލަ ބޮކި ދިއްލަން 28 މިލިއަން ރުފިޔާ ހަރަދުކުރުމށް ނިންމާ، ބޮކިތައް ފޮނުވަން ސަރުކާރުން ނިންމާފައިވާ 36 ރަށުގެ ލިސްޓުގައި އދ. އޮމަދޫ ކުރިން ހިމެނިފައިވީ ނަމަވެސް އެ ރަށުގެ ނަން އެ ލިސްޓުން އުނިކޮށްފައިވާ ކަމަށެވެ.
އެކަން ހާމަކޮށް އޮމަދޫ ކައުންސިލުން އާއްމު ކުރި ބަޔާނެއްގައި ބުނެފައި ވަނީ ސަރުކާރުގެ މި އަމަލު އެ ކައުންސިލުން ކުށްވެރިކުރާ ކަމަށް ބުނެފައެވެ. އެ ބަޔާނުގައި އިތުރަށް ބުނެފައި ވަނީ ފިތުރު އީދަށް ބޮކި ފޮނުވާ ރަށްތަކުގެ ލިސްޓުގައި އޮމަދޫ ހިމެނޭ ކަމަށް ލޯކަލް ގަވަމަންޓު މިނިސްޓްރީން ކުރިން އެ ކައުންސިލަށް އަންގާފައިވާ ކަމަށެވެ.
އެކަން ހާމަކޮށް އެ ވުޒާރާ އިން އެ ކައުންސިލަށް ސިޓީއެއް ފޮނުވާފައި ވަނީމާޗު 6 ގައި ކަމަށް ވެސް އޮމަދޫ ކައުންސިލުން ބުނެއެވެ. އެހެންކަމުން އެ ސިޓީއާ ގުޅިގެން މިކަމަށް ވާންޖެހޭ ހުރިހާ ތައްޔާރީއެއް އެ އިދާރާއިން ވި ކަމަށްވެސް އޮމަދޫ ކައުންސިލުން ބުނެފައިވެ އެވެ.
އަދި، އެގޮތަށް އެންގުނީ އޮޅުމަކުން ކަމަށް ބުނެ މިނިސްޓްރީން އޮމަދޫ ކައުންސިލަށް ދެވަނަ ސިޓީއެއް ފޮނުވީ އިއްޔެ ހަވީރު 5:30 ހާއިރު ކަމަށްވެސް އެ އިދާރާގެ ބަޔާނުގައި ބުނެފައިވެ އެވެ.
"ނަމަވެސް، މި ކައުންސިލަށް ލިބިފައިވާ މައުލޫމާތަށް ބަލާއިރު ބުރަވެވެނީ ސިޔާސީ ގޮތުން ނުފޫޒު ހުރި ފަރާތްތަކުން ބާރުވެރިކަމުގެ އޮއިވަރުގައި ޖެހި ލައިޓުތައް ގެންދިއުމަށް ކަނޑައެޅިފައިވާ ލިސްޓަށް ބަދަލު ގެނެސް މި ރަށުގެ ނަން އެ ލިސްޓުން އުނިކޮށް އެހެން ރަށަކަށް އެ ލައިޓުތައް ބަދަލުކޮށްފައިވާ ކަމަށް،" އޮމަދޫ ކައުންސިލުން ބުނެފައިވެ އެވެ.
އީދަށް އަލަށް ދިއްލާ ރަށްތަކުގެ ތެރޭގައި އދ. އަތޮޅުން ހިމެނުނީ މާމިގިލި އެވެ. އޮމަދޫ ކައުންސިލުން ބުނެފައި ވަނީ މިއީ އެ ރަށުގެ ރައްޔިތުންނަ ލަދުގަންނަވާލަން ކުރި ކަމެއްގެ ކަމަށެވެ. މީގެ އިތުރުން އެ ރަށުގެ ބަނދަރުގެ މަސައްކަތްވެސް ކުރިއަށް ނުދާ ކަމަށް އެ ކައުންސިލުން ވަނީ ބުނެފައެވެ. އެހެންކަމުން އެ މަސައްކަތް ފަށާ ލައިޓުތައް އެ ރަށަށް ފޮނުވުމަށް އޮމަދޫ ކައުންސިލުން ވަނީ ސަރުކާރަށް ގޮވާލާފަ އެވެ.
ސަރުކާރުން ދުރާލާ ބުނަމުން އައީ ހެޔޮވަރުގެ 28 މިލިއަން ރުފިޔާ އެކަމަށް ހޭދަކުރާނެ ކަމަށެވެ. އަދި ކުރީ ފަހަރަށްވުރެ އިތުރުކޮށް އަތޮޅުތެރޭގައި ބޮކިދިއްލާ ރަށްތައް އިތުރުވެސް ކުރާނެ ކަމަށެވެ. މިހާ އިގްތިސާދީ ހާލަތު ދަށުގައި އޮތް ދުވަސްވަރެއްގައި 28 މިލިއަން ރުފިޔާ ހޭދަކޮށްގެން އީދުބޮކި ދިއްލަން ސަރުކާރުން މިހާބޮޑު އިސްކަމެއް ދިން ދިނުމުން އާއްމުން ދަނީ އެކަމަށް ފާޑުކިޔުން އަމާޒުކުރަމުންނެވެ.
