ހަނދު ސާބިތު ކުރުމުގެ ކަންކަން، ޝަރުޢީހަމަތަކާއި އެއްގޮތަށް އިސްލާމިކް މިނިސްޓްރީން ކުރިއަށްގެންދާނެ: ޝަހީމް
29 މާރިޗު 2025 | ހޮނިހިރު 08:42އަމިއްލައަށް ރޯދަ އިޢުލާންކުރުމާއި ޢީދު އިއުލާންކުރުމަކީ މަސްލަޙަތު ގެއްލިދާނެ ކަމެއް
އިސްލާމިކް މިނިސްޓަރ ޑރ.މުހައްމަދު ޝަހީމް އަލި ސައީދު
ރަމަޟާން މަހުގެ ހަނދު ސާބިތުކުރުމާއި ޝައްވާލުމަހުގެ ހަނދު ސާބިތުކުރުމުގެ ކަންކަން، ޝަރުޢީހަމަތަކާއި، ރާއްޖޭގައި ޢަމަލުކުރުމަށް ކަނޑައެޅިފައިވާ ހަރުދަނާ އުޞޫލުތަކުގެ މަތިން އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާނެ ކަމަށް އިސްލާމީ ކަންތައްތަކާއި ބެހޭ ވުޒާރާގެ މިނިސްޓަރ މުޙައްމަދު ޝަހީމް އަލީ ސައީދު ވިދާޅުވެއްޖެ އެވެ.
މިނިސްޓަރ ޝަހީމް މިހެން ވިދާޅުވެފައިމިވަނީ މިއަހަރުގެ ފިތުރު އީދު ދުވަހާ ގުޅިގެން ދިވެހިންގެ ތެރޭގައި ބަހުސްއެއް އުފެއްދިފައިވާ ދަނޑިވަޅެއްގައެވެ. އެގޮތުން މި ބަހުސް އުފެދިފައިވަނީ ފަލަކީ އިލްމުވެރިޔާ އަދި ކުރީގެ ރައީސް މައުމޫން އަބްދުލްގައްޔޫމާއި، އަދި އިލްމުވެރިޔާ، ރާއްޖޭގެ ގައުމީ ޔުނިވާސިޓީގެ ކުރީގެ ޗާންސެލަރު ޑރ. ހަސަން ހަމީދުގެ ހިޔާލު ތަފާތު ވުމާއެކު އެވެ.
މިކަމާއި ގުޅިގެން މިނިސްޓަރ ޝަހީމް ވިދާޅުވީ ތަރިރުހަނދާއި ގުޅިގެން ފަލަކީ އިލްމުގެ ދާއިރާގައި އިލްމީ ބަހުސްކުރުމަކީ މައްސަލައެއްނޫން ކަމަށާއި ނަމަވެސް މިކަން ކުރަންވާނީ ޢާއްމު މަޞްލަޙަތަށް އަސަރު ނުކުރާގޮތައް ކަމަށެވެ.
ޚާއްޞަކޮށް ރަމަޟާންމަހާއި ޝައްވާލުމަހުގެ ހަނދުގެ ކަންކަމަކީ އޭގެ މައްޗަށް ޝަރުޢީ އަޙްކާމްތަކެއް ތަރުތީބުވާ ކަންތައްތަކެއްކަމުން މިކަމުގައި ރައްޔިތުންނަށް އޮޅުން އަރައި ޝައްކުއުފެދޭގޮތައް ކަމާ ނުގުޅޭ ފަރާތްތަކުން ވާހަކަ ދެއްކުމަކީ މަޞްލަޙަތު ގެއްލިދާނެކަމެއް ކަމަށްވެސް މިނިސްޓަރ ވިދާޅުވި އެވެ.
އަދި އެއްވެސް ފަރާތަކުން އަމިއްލަ އަމިއްލައަށް ރޯދަ އިޢުލާންކުރުމާއި ޢީދު އިއުލާންކުރުމަކީ މަސްލަޙަތު ގެއްލިދާނެކަމެއް ކަމަށާއި އެހެންކަމުން މިކަމަށް ސަމާލުވުމަށް މިނިސްޓަރ ވަނީ އިލްތިމާސްކޮށްފަ އެވެ.
މިއަހަރުގެ ޝައްވާލް މަހުގެ ހަނދު ސާބިތުކުރުމަށްބާއްވާ ޖަލްސާ މިރޭ އޮންނާނެކަމަށް އިސްލާމިކް މިނިސްޓްރީވަނީ ބުނެފަ އެވެ. ހަނދުބެލުމުގެ ކަންކަން އެހެން އަހަރުތަކުގައިވެސް ޢަމަލުކުރަމުންދާ އުސޫލުގެ ތެރެއިން ހަނދުބެލުމަށް ދިޔުމާއި ހަނދު ފެނުނުކަމަށް ހެކިބަސް ދިނުމުގެ ކަންކަން ކުރިއަށްގެންދިޔުމަށްވަނީ ނިންމާފައެވެ.
