ސިއްހީ ޚިދުމަތްދޭ ތަންތަން އިމާރާތްކުރުމަށް، 760 މިލިއަން ރުފިޔާގެ ދިހަ މަޝްރޫއުއެއް ސަރުކާރު ހިއްސާވާ ކުންފުނިތަކަށް !
ފަސް ސިއްހީ މަރުކަޒާއި، ފަސް ހޮސްޕިޓަލެއް ތަރައްގީ ކުރުމަށް ހަވާލުކޮށްފައިވޭ
ސިއްހީ މަރުކަޒު އަދި ހޮސްޕިޓަލްތައް އެޅުމަށް ކުންފުނިތަކާ ހަވާލުކުރުމަށް ހެލްތް މިނިސްޓްރީގައި ބޭއްވި ރަސްމިއްޔާތުގެ ތެރެއިން
ދިހަ ރަށެއްގެ ސިއްހީ ޚިދުމަތްދޭ ތަންތަނުގެ އައު އިމާރާތް ކުރުމުގެ މަސައްކަތް ކުންފުނިތަކާ ހަވާލުކޮށްފިއެވެ.
ހުކުރު ދުވަހުގެ ރޭ ހެލްތް މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި މި އެއްބަސްވުންތަކުގައި ވަނީ ސޮއިކޮށްފައެވެ. އެގޮތުން ފަސް ސިއްހީ މަރުކަޒާއި، ފަސް ހޮސްޕިޓަލެއް ތަރައްގީ ކުރުމަށް ހަވާލުކޮށްފައިވެއެވެ.
ބ. ކުޑަރިކިލު، ގއ. ކޮންޑޭ، ގދ، ނަޑެއްލާ، ހދ. ނެއްލައިދޫ އަދި އދ. ފެންފުށީގެ ސިއްހީ މަރުކަޒުތައް އެޅުމަށް ކުންފުނިތަކާ ހަވާލުކޮށްފަައިވާއިރު، އަދި ށ. މިލަންދޫ، ކ. ތުލުސްދޫ، އއ. ރަސްދޫ، ގއ. ވިލިނގިލި އަދި ނ. ވެލިދޫ ގެ އާ ހޮސްޕިޓަލްތައް އިމާރާތް ކުރުމަށް ވެސް ކުންފުނިތަކާ ވަނީ ހަވާލު ކޮށްފައެވެ.
ހެލްތް މިނިސްޓްރީން ބުނީ ރޯޑް ޑެވެލޮޕްމަންޓް ކޯޕަރޭޝަން (އާރްޑީސީ)އާ 02 ރަށެއްގެ ސިއްހީ ޚިދުމަތްދޭ ތަންތަނުގެ އައު އިމާރާތްކުރުމަށް ދީފައިވާ ކަމަށާއި، އެމަސައްކަތުގެ އެއްބަސްވުމުގައި ސޮއިކޮށްފައިވާ ކަމަށެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އިސްމާއިލް އަބްދުﷲއަދި އާރުޑީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، ބްރިގޭޑިއަރ ޖެނެރަލް ރިޓަޔާޑް އަލީ ޒުހެއިރު އެވެ.
އެގޮތުން ނ. ވެލިދޫ ހޮސްޕިޓަލްގެ އައު އިމާރާތުގެ މަސައްކަތް ހަވާލުކޮށްފައިވަނީ 108,322,537.03 (ސަތޭކަ އަށް މިލިއަން ތިން ލައްކަ ބާވީސް ހާސް ފަސް ސަތޭކަ ތިރީސް ހަތް ރުފިޔާ ތިން ލާރި)އަށް 540 ދުވަސް ތެރޭގައި ނިންމާ ގޮތަށެވެ. އަދި އދ. ފެންފުށީ ސިއްހީ މަރުކަޒުގެ އައު އިމާރާތުގެ މަސައްކަތް ހަވާލުކޮށްފައިވަނީ 26,839,684.82 (ސައްބީސް މިލިއަން އަށް ލައްކަ ތިރީސް ނުވަ ހާސް ހަ ސަތޭކަ އަށްޑިހަ ހަތަރު ރުފިޔާ އަށްޑިހަ ދެ ލާރި) އަށް 540 ދުވަސް ތެރޭގައި ނިންމާ ގޮތަށެވެ.
މީގެ އިތުރުން ފެނަކަ ކޯޕަރޭޝަން ލިމިޓެޑްއާ 03 ރަށެއްގެ ސިއްހީ ޚިދުމަތްދޭ ތަންތަނުގެ އައު އިމާރާތްކުރުމަށް ދީފައިވާއިރު، މި އެއްބަސްވުންތަކުގައި ސޮއިކޮށްފައިވާ ކަމަށް ހެލްތް މިނިސްޓްރީން ބުނެއެވެ.
މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އިސްމާއިލް އަބްދުﷲ އަދި ފެނަކައިގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، މޭޖަރ ރިޓަޔާޑް މުހައްމަދު ނަޖާހް އެވެ.
ބ. ކުޑަރިކިލު ސިއްހީ މަރުކަޒުގެ އައު އިމާރާތުގެ މަސައްކަތް ހަވާލުކޮށްފައިވަނީ 7,641,116.64 (ހަތް މިލިއަން ހަ ލައްކަ ސާޅީސް އެއްހާސް އެއްސަތޭކަ ސޯޅަ ރުފިޔާ ފަސްދޮޅަސް ހަތަރު ލާރި) އަށް 365 ދުވަސް ތެރޭގައި ނިންމާ ގޮތަށެވެ. ގއ. ކޮނޑޭ ސިއްހީ މަރުކަޒުގެ އައު އިމާރާތުގެ މަސައްކަތް ހަވާލުކޮށްފައިވަނީ 6،763،307.54 (ހަ މިލިއަން ހަތް ލައްކަ ފަސްދޮޅަސް ތިންހާސް ތިން ސަތޭކަ ހަތް ރުފިޔާ ފަންސާސް ހަތަރު ލާރި) އަށް 300 ދުވަސް ތެރޭގައި ނިންމާ ގޮތަށެވެ. އަދި ގދ. ނަޑެއްލާ ސިއްހީ މަރުކަޒުގެ އައު އިމާރާތުގެ މަސައްކަތް ހަވާލުކޮށްފައިވަނީ 6،757،395.89 (ހަ މިލިއަން ހަތް ލައްކަ ފަންސާސް ހަތްހާސް ތިން ސަތޭކަ ނުވަދިހަ ފަސް ރުފިޔާ އަށްޑިހަ ނުވަ ލާރި) އަށް 300 ދުވަސް ތެރޭގައި ނިންމާ ގޮތަށެވެ.
ހެލްތް މިނިސްޓްރީން ބުނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާ 05 ރަށެއްގެ ސިއްހީ ޚިދުމަތްދޭ ތަންތަން އިމާރާތް ކުރުމަށް ހަވާލުކޮށްފައިވާ ކަމަށެވެ. އަދި އެކަމުގެ އެއްބަސްވުންތަކުގައި ސޮއިކޮށްފައިވާ ކަމަށް މިނިސްޓްރީން ބުނެއެވެ.
އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އަހުމަދު ގާސިމް އަދި އެމްޓީސީސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، ޑެޕިއުޓީ ކޮމިޝަނަރ އޮފް ޕޮލިސް ރިޓަޔަރޑް އަހުމަދު ސައުދީ އެވެ.
އެގޮތުން ހދ. ނެއްލައިދޫ ސިއްހީ މަރުކަޒުގެ އައު އިމާރާތުގެ މަސައްކަތް 11،197،462.90 (އެގާރަ މިލިއަން އެއްލައްކަ ނުވަދިހަ ހަތްހާސް ހަތަރުސަތޭކަ ފަސްދޮޅަސް ދެ ރުފިޔާ ނުވަދިހަ ލާރި) އަށް ހަވާލުކޮށްފައިވަނީ 450 ދުވަސް ތެރޭގައި ނިންމާ ގޮތަށެވެ. ށ. މިލަންދޫ ހޮސްޕިޓަލްގެ އައު އިމާރާތުގެ މަސައްކަތް ހަވާލު ކޮށްފައިވަނީ 110،878،732.12 ( ސަތޭކަ ދިހަ މިލިއަން އަށްސަތޭކަ ހަތްދިހަ އަށްހާސް ހަތްސަތޭކަ ތިރީސް ދެ ރުފިޔާ 12 ލާރި)އަށް 600 ދުވަސް ތެރޭގައި ނިންމާ ގޮތަށެވެ. ކ. ތުލުސްދޫ ހޮސްޕިޓަލްގެ އައު އިމާރާތުގެ މަސައްކަތް ހަވާލުކޮށްފައިވަނީ 110،716،537.72 (ސަތޭކަ ދިހަ މިލިއަން ހަތްސަތޭކަ ސޯޅަހާސް ފަސްސަތޭކަ ތިރީސް ހަތް ރުފިޔާ ހަތްދިހަ ދެ ލާރި) އަށް 600 ދުވަސް ތެރޭގައި ނިންމާ ގޮތަށެވެ. އއ. ރަސްދޫ ހޮސްޕިޓަލްގެ އައު އިމާރާތުގެ މަސައްކަތް ހަވާލުކޮށްފައިވަނީ 185،571،402.42 (ސަތޭކަ އަށްޑިހަ ފަސް މިލިއަން ފަސްސަތޭކަ ހަތްދިހަ އެއްހާސް ހަތަރުސަތޭކަ ދެ ރުފިޔާ ސާޅީސް ދެ ލާރި) އަށް 780 ދުވަސް ތެރޭގައި ނިންމާ ގޮތަށެވެ. އަދި ގއ. ވިލިނގިލީ ހޮސްޕިޓަލްގެ އައު އިމާރާތުގެ މަސައްކަތް ހަވާލުކޮށްފައިވަނީ 185،571،402.42 (ސަތޭކަ އަށްޑިހަ ފަސް މިލިއަން ފަސްސަތޭކަ ހަތްދިހަ އެއްހާސް ހަތަރުސަތޭކަ ދެ ރުފިޔާ ސާޅީސް ދެ ލާރި)އަށް 780 ދުވަސް ތެރޭގައި ނިންމާ ގޮތަށެވެ.
މި އެއްބަސްވުންތަކާ ގުޅޭގޮތުން ހެލްތް މިނިސްޓަރު އަބްދުﷲ ނާޒިމް ވިދާޅުވީ ސިއްހީ ނިޒާމު ހަރުދަނާ ކުރެވޭނީ އުމްރާނީ ގޮތުން ސިއްހީ ދާއިރާ ހަރުދަނާ ކޮށްގެން ކަމަށެވެ. އަދި މި މަސައްކަތްތައް ނިމިގެންދާއިރު ރާއްޖޭގެ ސިއްހީ ނިޒާމަށް، އަދި ޚާއްސަކޮށް މި މަޝްރޫއުތައް ހިންގާ ރަށްރަށުގެ ރައްޔިތުންނަށް ހެޔޮ ބަދަލެއް ފެނިގެންދާނެ ކަމަށް މިނިސްޓަރު ނާޒިމް ވިދާޅުވިއެވެ.
