މިއަހަރުގެ ފިތުރު އީދު ދުވަހާ ގުޅިގެން ބޮޑު ބަހުސްއެއް

މިއަހަރުގެ ފިތުރު އީދު ދުވަހާ ގުޅިގެން ދިވެހިންގެ ތެރޭގައި ބަހުސްއެއް އުފެއްދިއްޖެ އެވެ.

މި ބަހުސް އުފެދިފައިވަނީ ފަލަކީ އިލްމުވެރިޔާ އަދި ކުރީގެ ރައީސް މައުމޫން އަބްދުލްގައްޔޫމާއި، އަދި އިލްމުވެރިޔާ، ރާއްޖޭގެ ގައުމީ ޔުނިވާސިޓީގެ ކުރީގެ ޗާންސެލަރު ޑރ. ހަސަން ހަމީދުގެ ހިޔާލު ތަފާތު ވުމާއެކު އެވެ.

ރައީސް މައުމޫނު ވޮއިސްގައި ލިޔުއްވާފައިވާ ގޮތުގައި ސައޫދީ އަރަބިއްޔާ އާއި، މިސުރާއި، ތުރުކީ އާއި، މޮރޮކޯ ފަދަ އިސްލާމީ ގައުމުތަކަށް މި ހިނގާ މާރިޗު މަހުގެ 29 ދުވަހު އިރުއޮއްސުމަށްފަހު، ހަނދު ނޯއްސި 8 މިނެޓާއި 20 މިނެޓާ ދެމެދުގެ މިންވަރަކަށް ހުންނާނެކަމަށް ފަލަކީ ހިސާބުން ދައްކާތީ، ޖެހިގެން އަންނަ ދުވަހަކީ (މާރިޗު 30 ވާ އާދީއްތަ ދުވަހަކީ) މިއަހަރުގެ ފިތުރު އީދު ދުވަހަށް ވާނެ ކަމަށް ވަރަށް ބޮޑަށް ޔަގީން ކުރެވޭ ކަމަށެވެ.

މާރިޗު މަހުގެ 29 ވަނަ ދުވަހަކީ ރަމަޟާން މަހުގެވެސް 29 ވަނަ ދުވަސް ކަމަށާއި، އެދުވަހު ދިވެހިރާއްޖެއަށް އިރުއޮއްސެނީ 18 ގަޑި 14 މިނެޓުގައި ކަމަށެވެ،. އަދި ހަނދު އޮއްސެނީވެސް، ހަމަ އެގަޑީގައި ކަމަށް ލިޔުއްވާފައިވެއެވެ.

އެހެންކަމުން، ވިދިގެން އަންނަ ދުވަހަކީ ދިވެހިރާއްޖެއަށް ފަލަކީގޮތުން ޝައްވާލު މަހުގެ 1 ވަނަ ދުވަސް ކަމަށް ވުމާއި ނުވުމާ މެދު ބަހުސެއް އޮތްނަމަވެސް، ވަރަށް ގިނަ އިސްލާމީ ގައުމުތަކަށް އެދުވަހަކީ ޝައްވާލު މަހުގެ 1 ވަނަ ދުވަސް ކަމަށް ވާނެތީ، މާރިޗު މަހުގެ 30 ވަނަ ދުވަހަކީ، ރާއްޖެއަށް ވެސް ޝައްވާލު މަހުގެ 1 ވަނަ ދުވަސް ކަމުގައި ވާނެކަމަށް ފެންނަ ކަމަށް ރައީސް މައުމޫނު ވިދާޅުވިއެވެ. އެއީ، ހަނދު ސާބިތު ކުރުމުގައި އަމަލު ކުރަމުން އަންނަ އުސޫލުތަކާ ހަމަތަކުގެ އަލީގައެވެ.

ނަމަވެސް މި ކަމާއި ގުޅިގެން ޑރ. ހަސަން ހަމީދުގެ ބްލޮގުގައި ލިޔުއްވާފައިވާ ގޮތުން ފިތުރު އީދުގެ ހަނދު ފެންނަ ދުވަސް ބެލުމަށް އެންމެ ފުރަތަމަ ކުރަންޖެހޭނެ ކަމަކީ، އެ ހަނދު އުފަންވާ ވަގުތު ބެލުން ކަމަށެވެ.

ޑރ.ހަސަން ހަމީދު ލިޔުއްވާފައިވާ ގޮތުގައި 29 ވަނަ ދުވަހުގެ އާ ހަނދު އުފަންވަނީ މާލެ ގަޑިން ހަވީރު 3:57ގައި ގާތްގަޑަކަށް ހަވީރު 4 ޖަހާއިރު ކަމަށާއި، އެ ދުވަހު ހަނދު އޮއްސޭނީ އަދި އިރު އޮއްސެނީ ވެސް 6:14 ގައި ކަމަށެވެ. ހަނދު އޮއްސޭ ގަޑި އާއި އިރުއޮއްސޭ ގަޑި ދިމާވާ ހާލަތުގައި އިރުގެ ދަޅަޔާ ހެދި ހަނދެއް ނުފެންނާނެ ކަމަށާއި، ނުފެންނާނެ އަނެއް ސަބަބަކީ ހަނދު އުފަންވުމާއި އޮއްސުމާއި ދެމެދު ވަނީ ދެ ގަޑި 17 މިނެޓު ކަމަށް ލިޔުއްވާފައިވެއެވެ. އަދި ރާއްޖޭގައި ހަނދު ފެނުމަށް އުފަންވުމާއި އޮއްސުމާ ދެމެދު 17 ގަޑިއިރު ވާން ޖެހޭނެ ކަމަށާއި، ނުފެންނާނޭ އަނެއް ދަލީލަކީ އޮއްސޭއިރު ހަނދުގެ އަލިކަން ހުންނާނެ ވަރަކީ %0.0 ކަމަށްވާތީ ކަމަށެވެ.

މީގެ އިތުރުން ޑރ.ހަސަން ހަމީދު ވިދާޅުވީ މުޅި އޭޝިއާގެ ބައްރަށް 29 މާޗްގައި ހަނދެއް ނުފެންނާނެ ކަމަށާއި، ފެނުމުގެ ފުރުސަތު އޮތީ ހަމައެކަނި އެމެރިކާގެ ހުޅަނގު ބިތަށް ކަމަށެވެ. އަދި މިހާ ޅަ ހަނދެއް، މައްކާގެ އުޑުމަތި ކިތަންމެ ސާފު ވިއަސް ނުފެންނާނެ ކަމަށް ލިޔުއްވާފައިވެއެވެ.

ނަމަވެސް މިއަށް ރައްދު ދެއްވައި ރައީސް މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ ހިޖުރީމަހެއް ފެށުމަކަށް އާ މަހުގެ ހަނދު ހަމަލޮލަށް ފެނުން ލާޒިމު ނޫން ކަމަށެވެ. އަދި އިރު އޮއްސުމަށްފަހު ކިތަންމެ ކުޑަ ހިނދުކޮޅަކަށް ނަމަވެސް ހަނދު ނޯއްސި ހުރިކަން ހިސާބުން ސާބިތުވާނަމަ އާމަހެއް ފެށުނީ ކަމަށް އެމަނިކުފާނު ވިދާޅުވިއެވެ.

މިއާއެކު ދިވެހިންގެ މެދުގައި މިއަހަރުގެ ފިތުރު އީދު ދުވަހާ ގުޅިގެން ދިވެހިންގެ ތެރޭގައި ވަނީ ބަހުސްއެއް ވަރަށް ބޮޑަށް އުފެދިގެން ގޮސްފައެވެ. އަދި ކަލަންޑަރުގައިވާ ގޮތުން މިއަހަރުގެ ފިތުރު އީދު ވާނީ މި މަހު 31 ވާ ހޯމަ ދުވަހެވެ.