ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ސިޔާސީ ހަރަކާތްތަކުގައި އިސްކޮށް އުޅޭ މަރިޔަމް ޒުބައިރު (މަންދީ)ގެ ގަޔަށް ކަޅު ތެޔޮ ޖެހި ކަމުގެ ތުހުމަތުގައި މީހަކު ހައްޔަރުކޮށްފިއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި މަންދީ ގަޔަށް ކަޅުތެޔޮ ޖެހިކަމުގެ ތުހުމަތުގައި ޒުވާނަކު ވަނީ ހައްޔަރުކޮށްފައެވެ. ބައެއް މީޑިއާތަކުގައި ބުނެފައިވަނީ މި މައްސަލައާ ގުޅިގެން ހައްޔަރުކޮށްފައިވަނީ ގއ. ދާންދޫ/ ސަންލައިޓްވިލާ، 20 އަހަރުގެ އަހުމަދު ރިޝްމާހް އެވެ.

ކްރިމިނަލް ކޯޓުން ވަނީ ހުކުރު ދުވަހުގެ ރޭ އޭނާގެ ބަންދަށް 15 ދުވަސް ވެސް ޖަހާފައެވެ.

ބަންދު އަމުރުގައި ބުނެފައިވަނީ އެ ހާދިސާ ހިނގި ވަގުތު ސައިކަލު ދުއްވިކަމަށް އިންކާރު ނުކުރާ ކަމަށް ރިޝްމާހު ބުނެފައިވާ ކަމަށެވެ. އަދި އޭނާގެ މައްޗަށް މުދަލަށް ގެއްލުން ދިނުމާއި އިންޒާރު ދިނުމުގެ ތުހުމަތު ފުލުހުން ވަނީ ކޮށްފައެވެ.

މީގެ ކުރިން ވެސް މާރާމާރީ ހިންގި ކަމުގެ ތުހުމަތުގައި ރިޝްމާހު ހައްޔަރުކޮށްފައިވެއެވެ. އަދި މިދިޔަ ފެބްރުއަރީ މަހު ވެސް މާރާމާރީ ހިންގަން އުޅުނު ކަމުގެ ތުހުމަތުގައި ހައްޔަރުކޮށްފައިވެއެވެ.

މަންދީ ގަޔަށް ކަޅުތެޔޮ ޖެހި މައްސަލަ ފުުލުހުން ތަހުގީގު ކުރަމުންދާއިރު، މި މައްސަލައާ ގުޅޭގޮތުން ފުލުހުންގެ ފަރާތުން ރަސްމީކޮށް އެއްވެސް ޖަވާބެއް ލިބިފައިނުވެއެވެ. ތަހުގީގު ކުރިއަށް ގޮސްފައިވާ ހިސާބާއި، މީހަކު ހައްޔަރު ކުރިކަން ވެސް ފުލުހުން ހާމަކޮށްފައިނުވެއެވެ.

މަންދީ ގަޔަށް ބަޔަކު ކަޅު ތެޔޮ ޖަހާފައި ވަނީ 16 މާރިޗް 2025 ވީ އާދީއްތަ ދުވަހުގެ ރޭ، މާލޭގެ ވުޑްބެރީ ރެސްޓޯރަންޓް ހިމެނޭ ސަރަހައްދުގަ އެވެ. މަންދީގެ ގަޔަށް ކަޅު ތެޔޮ ޖަހާފައި ވަނީ ހެލްމެޓު އަޅައިގެން އަދި މާސްކް އަޅައިގެން ސައިކަލުގައި އައި ބައެއް ކަމަށް މައުލޫމާތު ލިބިފައިވެ އެވެ.

މަންޒަރު ދުށް ފަރާތަކުން ބުނި ގޮތުގައި، ޗާންދަނީ މަގުގައި ހުންނަ އެމްޑީޕީގެ މައި ހަރުގެ އާ ހިސާބުން ކަޅު ތެޔޮ ޖެހި ދެ މީހުން އައީ މަންދި ފޮލޯ ކުރަމުން ކަމަށެވެ.

މި މައްސަލައާ ގުޅިގެން މަންދީ ބުނީ މިއީ ވަކި ބަޔެއްގެ ނުފޫޒުން ވަކި ބަޔަކު ފޮނުވައިގެން ކުރި ކަމެއް ކަމަށެވެ. އަދި ރައީސް ޑރ.މުހައްމަދު މުއިއްޒާއި، އެމަނިކުފާނުގެ އަނބިކަނބަލުން ސާޖިދާގެ އަތެއް މިކަމުގައި ނުވާނެ ކަމަށް ނުދަންނާވާނެ ކަމަށް މަންދީ ބުނެފައިވެއެވެ.