އެމެރިކާއާ އެކު ނުސީދާ މަޝްވަރާތަކަށް އިރާނު އޮތީ ތައްޔާރަށް

އެމެރިކާގެ ރައީސް ޑޮނަލްޑް ޓްރަމްޕްގެ ސިޓީއަށް އީރާނުން ރައްދުދީ، އެމެރިކާއާ އެކު ނުސީދާ މަޝްވަރާތަކަށް ތައްޔާރަށް އޮތްކަން ހާމަކޮށްފި އެވެ.

އީރާނުގެ ޚާރިޖީ ވަޒީރު އައްބާސް އަރަގްޗީއާ ހަވާލާދީ އިރްނާގެ ރަސްމީ ނޫސް އޭޖެންސީން ބުރާސްފަތި ދުވަހު ބުނެފައި ވަނީ އެމެރިކާގެ ރައީސް ޑޮނަލްޑް ޓްރަމްޕް، އިރާނާއެކު އައު ނިއުކްލިއާ އެއްބަސްވުމަކަށް އައުމަށް އެދި ފޮނުއްވި ސިޓީއަށް އީރާނުން އޮމާން މެދުވެރިކޮށް ޖަވާބެއް ފޮނުވާފައިވާ ކަމަށެވެ.

އަރަގްޗީއާ ހަވާލާދީ އިރްނާ އިން ބުނެފައިވަނީ އިރާންގެ ސިޔާސަތަކީ އަދިވެސް އެންމެ ބޮޑު ޕްރެޝަރާއި އަސްކަރީ ނުރައްކާތަކާ އެކު ސީދާ މަޝްވަރާތަކުގައި ބައިވެރި ނުވުން ކަމަށެވެ. އެހެން ނަމަވެސް ކުރިން އޮތް ގޮތަށް ނުސީދާ މަޝްވަރާތައް ކުރިއަށް ގެންދެވިދާނެ ކަމަށެވެ.

މީގެ ކުރިން އީރާނުގެ އެންމެ މަތީ ލީޑަރު އަލީ ޚާމަނާއީގެ އެޑްވައިޒަރަކު ވިދާޅުވީ އެމެރިކާއާ އެކު ނުސީދާ މަޝްވަރާތަކަށް ތެހެރާން އޮތީ ތައްޔާރަށް ކަމަށެވެ.

ސަރުކާރާ ގުޅިފައިވާ ތަސްނީމް ނިއުސް އެޖެންސީން ކަމާލް ޚަރްރާޒީއާ ހަވާލާދީ ބުނެފައި ވަނީ ތެހެރާން އޮތީ "އަނެއް ފަރާތް އެސެސްކޮށް، އަމިއްލަ ޝަރުތުތައް ހުށަހަޅައި، އެކަށީގެންވާ ނިންމުމެއް ނިންމުމަށް ޓަކައި ނުސީދާ މަޝްވަރާތަކަށް ތައްޔާރަށް" ކަމަށެވެ.

މިދިޔަ މާޗް މަހުގެ ހަތް ވަނަ ދުވަހު އެމެރިކާގެ ރައީސް ޑޮނަލްޑް ޓްރަމްޕް ވަނީ އާ ނިއުކްލިއާ މަޝްވަރާތަކަށް ގޮވާލައި ޚާމަނާއީއަށް ސިޓީއެއް ފޮނުއްވައި، އީރާނުން ދެކޮޅު ހަދައިފި ނަމަ އަސްކަރީ ފިޔަވަޅު އަޅާނެ ކަމުގެ އިންޒާރު ދެއްވާފަ އެވެ. މި ސިޓީ އީރާނަށް އަރުވާފައިވަނީ މިމަހުގެ 12 ވަނަ ދުވަހު ޔޫއޭއީގެ ޕްރެޒިޑެންޝަލް އެޑްވައިޒަރު އަންވަރު ގަރްގާޝް އެވެ.

އީރާނުގެ ދައުލަތުގެ ހުރިހާ ކަމެއްގައި އެންމެ ފަހުބަސް ވިދާޅުވާ ޚާމަނާއީ ވަނީ ޓްރަމްޕް ގެ އައުޓްރީޗް ދޮގުކުރައްވައި، އެމެރިކާއަކީ މަޝްވަރާއަށް ހުޅުވާލެވިފައިވާ ގައުމެއް ކަމަށާއި އީރާނަކީ ހުރަހެއްގެ ގޮތުގައި ސިފަކޮށް ދުނިޔެއަށް އޮޅުވާލަން މަސައްކަތް ކުރައްވާ ކަމަށް ތުހުމަތު ކުރައްވާފަ އެވެ.

އަރަގްޗީ މިދިޔަ ހަފުތާގައި ވިދާޅުވެފައި ވަނީ ޓްރަމްޕްގެ ސިޓީއަކީ މާ ބޮޑު ނުރައްކަލެއް ކަމަށެވެ. އެކަމަކު އެ ސިޓީގައި ވެސް ފުރުސަތު އެބައޮތް ކަމަށް ވިދާޅުވެފައިވާ ކަމަށާއި، ސިޓީގައި ވާ ހުރިހާ ނުކުތާއަކަށް ސަމާލުކަން ދީ، ރައްދުގައި އިންޒާރާއި ފުރުސަތަށް ވެސް ވިސްނާ ވަޑައިގަންނަވާނެކަމަށް އަރަގްޗީ ވިދާޅުވި އެވެ.

ކުރީގެ ޚާރިޖީ ވަޒީރު ޚަރްރާޒީ ވަނީ ޓްރަމްޕްގެ ސަރުކާރުން އީރާނާ ދެކޮޅަށް ނަފްސާނީ ހަނގުރާމައެއް ހިންގަމުންދާ ކަމަށް ތުހުމަތު ކުރައްވާފައެވެ. ޚަރްރާޒީ ވިދާޅުވީ ކުރިން ކަނޑައެޅިފައިވާ ނަތީޖާއަކާއެކު މަޝްވަރާތަކަށް އީރާން "ދަމައިގަނެވޭނެ" ކަމަށް އެމެރިކާއިން ގަބޫލުކުރާ ކަމަށެވެ.

ހޯމަ ދުވަހު އަރަގްޗީ ވިދާޅުވީ އެމެރިކާއާއެކު ނުސީދާ ކޮށް މަޝްވަރާކުރުމަށް އީރާނުން ހުޅުވާލާފައިވާ ކަމަށާއި ޓްރަމްޕްގެ "މެކްސިމަމް ޕްރެޝަރު" ސިޔާސަތު ދެމިއޮތްހާ ހިނދަކު ސީދާ މަޝްވަރާތައް އޮތީ މޭޒުން ބޭރުގައި ކަމަށެވެ.

މިދިޔަ ޖެނުއަރީ މަހު ވައިޓް ހައުސްއަށް އެނބުރި ވަޑައިގަތުމަށްފަހު ޓްރަމްޕް އަލުން އިއާދަކުރެއްވި މި ސިޔާސަތުގެ ދަށުން 2015 ވަނަ އަހަރުގެ ނިއުކްލިއާ އެއްބަސްވުން ދޫކޮށްލުމަށް ފަހު ފުރަތަމަ ދައުރުގައި އީރާނާ ދެކޮޅަށް އަލުން ދަތިކުރުމުގެ ފިޔަވަޅުތައް އެޅުއްވި އެވެ.

ޖޭސީޕީއޯއޭ އިން ވަނީ އީރާނުގެ ނިއުކްލިއާ ޕްރޮގްރާމަށް ހުރަސް އެޅުމުގެ ބަދަލުގައި އީރާނަށް ދަތިކުރުމުގެ ފިޔަވަޅުތަކަށް ލުޔެއް ދީފަ އެވެ. އެމެރިކާ ހިމެނޭ ގޮތަށް ހުޅަނގުގެ ގައުމުތަކުން އީރާނުން ނިއުކްލިއާ ހަތިޔާރު ހޯދަން އުޅޭ ކަމަށް ގިނަ ދުވަސްތަކެއް ވަންދެން ތުހުމަތު ކުރެ އެވެ.