ރައީސަކު ނޫސްވެރިއަކަށް އިންޒާރު ދިނުމުން އެނގެނީ ހަތަރު އުދަރެސް ފެނުޖެހިފައިވާ މިންވަރު - ޕާޕާ

ރައީސުލްޖުމްހޫރިއްޔާކަމުގައި ހުންނަވާ ބޭފުޅަކު ނޫސްވެރިއަކަށް ގުޅާ ބިރު ދެއްކުމުން އެނގެނީ އެ މަނިކުފާނު ގޮތް ހުސްވެ ހަތަރު އުދަރެސް ފެނުޖެހިފައިވާ މިންވަރު ކަމަށް ރިޓަޔަރޑް ކާނަލް އަހުމަދު ފަޔާޒް (ޕާޕާ) ވިދާޅުވެއްޖެ އެވެ.

އޭނާ މިހެން ވިދާޅުވީ ރާއްޖެޓީވީގެ ކާލާ ބައިސާ ޕްރޮގްރާމްގައި ވާހަކަދައްކަވަމުންނެވެ.

Advertisement

14 މާރޗް 2025 ރޭ އިރާކޮޅުގެ ވަގުތެއްގައި ރައީސް މުޢިއްޒު ވަނީ ފިޔާޒަށް ފޯނުން ގުޅައި އިންޒާރުދެއްވާ ބިރު ދައްކަވާފަވާ ކަމަށް އޭނާ ވަނީ ބުނެފަ އެވެ. ފޯނުން ގުޅުއްވާ ފިޔާޒް އާ ދެކޮޅަށް އެޅުއްވެން ހުރި ހުރިހާ ފިޔަވަޅެއް އަޅުއްވާނެ ކަމަށް މުއިއްޒު ވިދާޅުވި ކަމަށް ވެސް އަދަދު ނޫހުން ވަނީ ހާމަކޮށްފަ އެވެ.

އެ މައްސަލަ އާއި ގުޅިގެން 'އަދަދު' ނޫހަށް ސީދާ ރައީސުލްޖުމްހޫރިއްޔާ ގުޅުއްވައި އިންޒާރު ދެއްވަންޖެހޭ ސަބަބެއް ނެތްކަމަށް އެ ނޫހުން ދެކޭކަން އަދަދު ނޫހުން ނެރުނު ބަޔާނުގައި ފާހަގަކޮށްފައިވެ އެވެ.

އެ މައްސަލަ އަށް އިޝާރާތްކުރައްވާ ވާހަކަދައްކަވަމުން ފަޔާޒް ވިދާޅުވީ އެއީ ރާއްޖޭގެ ތާރީހުގައި ވެސް ހިނގާފައި ނެތް ވަރުގެ ދަށު ދަރަޖައިގެ އަމަލެއް ކަމަށެވެ. އަދި އެއީ މީގެ ކުރިން ރައީސްކަމުގައި ހުންނެވި ބޭފުޅަކު ކުރައްވާފައިވާ ފަދަ އަމަލެއް ނޫން ކަމަށް ފަޔާޒް ވަނީ ވިދާޅުވެފަ އެވެ.

ދަންވަރެއްގަ ގުޅިއްޔާ ވެދާނެ ދެބަ ދޭތެރޭގަ ކުރެއްވި ކަމަކަށް. މިހާރު މުޅިން ދަންވަރުތާ ދައުލަތް އޮޕަރޭޓްކުރަނީ.

ފަޔާޒްގެ އިތުރުން ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު ނަޝީދު އަބްދުﷲ ވެސް ވަނީ ރައީސެއްގެ ކިބައިން މިފަދަ ކަމެއް ފެނުމަކީ ވަރަށް ދެރަވަރު ކަމެއް ކަމަށް ފާހަގަކުރައްވާފައެވެ. އަދި އެއީ ނިކަން ލަދު ގަންނަން ޖެހޭ ޒާތުގެ ކަމެއް ކަމަށް އޭނާ ވިދާޅުވި އެވެ.

މި މައްސަލަ އާއި ގުޅިގެން މޯލްޑިވްސް ޖަރނަލިސްޓް އެސޯސިއޭޝަނުން ބުނެފައި ވަނީ ގައުމުގެ އިސްވެރިޔާގެ ފަރާތުން ނޫސްވެރިންނަށް އިންޒާރު ލިބުމަކީ އެއްގޮތަކަށްވެސް ބަލައިގަންނަ ކަމެއް ނޫން ކަމަށެވެ. އެމްޖޭއޭއިން ނެރުނު ބަޔާނުގައި ވަނީ މީގެ އިތުރުންވެސް އަދަދު ނޫހުގެ އެކި ނޫސްވެރިންނަށް އެކި ފަހަރުމަތިން ލިބިފައިވާ އިންޒާރުތަކާއި ގުޅޭ ގިނަ މައްސަލަތަކެއް ހުރިއިރު، އެކަންކަމާއި ގުޅިގެން އެކަށީގެންވާ ފިޔަވަޅެއް އެޅިފައި ނެތުމަކީ ކަންބޮޑުވާ ކަމެއް ކަމަށެވެ.

އެހެންކަމުން އަދަދު ނޫހުގެ ފަރާތުން ހުށަހަޅާފައިވާ މައްސަލަ، އިންސާފުވެރިކަމާއި އެކު ވީހާވެސް އަވަހަށް ތަހުގީގު ކޮށްދިނުމަށް ދިވެހި ފުލުހުންގެ ޚިދުމަތަށް އެމްޖޭއޭއިން ވަނީ ގޮވާލާފަ އެވެ. މި މައްސަލަ އާއި ގުޅިގެން މި ހިނގާ މާޗް މަހުގެ 20 ވަނަ ދުވަހު ފިޔާޒް ޕޮލިހަށް ހާޒިރުކޮށް އޭނާގެ ބަޔާން ވަނީ ނަގާފައެވެ.