އީރާންގެ ނިއުކްލިއަރ ޕްރޮގްރާމް މުޅިން ނައްތާލުމަށް، އެމެރިކާ އިން މަސައްކަތް ކުރަމުން ދާ ކަމަށް، އެމެރިކާގެ ރައީސް ޑޮނަލްޑް ޓްރަމްޕްގެ ޤައުމީ ސަލާމަތާ ބެހޭ އެޑްވައިޒަރު މައިކް ވޯލްޓްޒް ވިދާޅުވެއްޖެ އެވެ.

ސީބީއެސް ނިއުސް އަށް ދެއްވި އިންޓަވިއުއެއް ގައި ވޯލްޓްޒް ވިދާޅުވީ، މުޅި ދުނިޔެ އަށް ފެންނަ ގޮތަށް އީރާން އެ ޤައުމުގެ ނިއުކްލިއަރ ޕްރޮގްރާމް ދޫކޮށްލަން ޖެހޭ ކަމަށެވެ.

މި މައްސަލަ އަވަހަށް ނިންމަން ޖެހޭ ކަމަށާއި، ހުރިހާ އޮޕަޝަންތަކެއް ވެސް މޭޒު މަތީގައި އޮތް ކަމަށް ރައީސް ޓްރަމްޕް ވިދާޅުވެފައިވާ ކަމަށް އޭނާ ފާހަގަ ކުރެއްވި އެވެ.

އެމެރިކާގެ ރައީސް ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް ވިދާޅުވީ، އީރާންގެ ރޫޙާނީ ލީޑަރު، އަލީ ޚާމަނާއީއާ ވާހަކަ ދެއްކުމަށް ރައީސް ޓްރަމްޕް ކުރައްވާ މަސައްކަތަކީ، ހަނގުރާމައިގެ ހައްލަކަށް ދިއުމާއި، ހަނގުރާމަ ހުއްޓުވުމަށް ކުރައްވާ މަސައްކަތެއް ކަމަށެވެ.

އެހެން ނަމަވެސް، ޚާމަނާއީ ވަނީ އެމެރިކާގެ މަޝްވަރާގެ ހުށަހެޅުމަށް ދެކޮޅު ހައްދަވާފައި އެވެ. އޭނާ ވިދާޅުވީ އެއީ މަކަރެއް ކަމަށާއި، ޓްރަމްޕްގެ ސަރުކާރާ މަޝްވަރާ ކުރުމުން ދިމާވާނީ އިތުރު ދަތިތަކާއި ފިއްތުން ތަކެއް ކަމަށެވެ.

އީރާންގެ ނިއުކްލިއަރ ޕްރޮގްރާމަކީ ހަމައެކަނި ސުލްހަވެރި ބޭނުން ތަކަށް ހިންގާ ޕްރޮގްރާމެއް ކަމަށް އެ ޤައުމުން ބުނަމުން އަންނަ ނަމަވެސް، ރަފައެލް ގްރޮސީ ވިދާޅުވެފައި ވަނީ އެ ޤައުމުން ޔުރޭނިއަމް އެންރިޗްކުރުން އަވަސް ކުރަމުންދާ ކަމަށާއި، މައްސަލަ ހައްލު ކުރުމަށް ވަގުތު ކުޑަތަން ވަމުންދާ ކަމަށެވެ.

އެމެރިކާގެ ރައީސް ޓްރަމްޕް ވަނީ، އީރާނާ ދެކޮޅަށް "މެކްސިމަމް ޕްރެޝަރ" ކެމްޕޭން އަލުން ފަށައި، އެ ޤައުމުގެ ތެލުގެ އެކްސްޕޯޓް ހުއްޓުވުމަށް މަސައްކަތް ކުރައްވަން ފައްޓަވާފައި އެވެ.

މިގޮތުން ޖެނުއަރީ 20 އިން ފެށިގެން އީރާންގެ ތެލުގެ ވިޔަފާރިއާ ގުޅޭ ގޮތުން ހަތަރު ފަހަރެއްގެ މަތިން ދަތި ކުރުމުގެ ފިޔަވަޅުތައް ވަނީ އަޅުއްވާފައި އެވެ.