އެމެރިކާއިން އުޅެނީ އީރާނުގެ ސަރުކާރު ވައްޓާލަން: ޚޮޝްރޫ

އީރާނުގައި އުފެދިފައިވާ ޤާނޫނީ ސަރުކާރު ވައްޓާލުމަށް އެމެރިކާގެ ސެކެޓްރީ އޮފް ސްޓޭޓް، ރެކްސް ޓިލަރސަން މަސައްކަތް ކުރައްވަމުން ގެންދަވާ ކަމަށް އީރާނުން ތުހުމަތުކޮށްފިއެވެ.

އީރާނުން އދ. އަށް ކަނޑައަޅުއްވާފައި ހުންނަވާ ސަފީރު، ގޮލާމާލީ ޚޮޝްރޫ، އދ. ގެ ސެކެޓްރީ ޖެނެރަލް އެންޓޯނިއޯ ގުޓްރޭޒްއަށް ފޮނުއްވެވި ސިޓީފުޅެއްގައި ވިދާޅުވީ، ބައިނަލްއަޤުވާމީ ޤާނޫނުތަކާއި، އދ. ގެ ޗާޓަރާއި ޚިލާފަށް އެމެރިކާއިން އީރާނުގެ ޤާނޫނީ ސަރުކާރު ވައްޓާލުމަށް މަސައްކަތް ކުރަމުންދާ ކަމަށެވެ.

ސިޓީފުޅުގައި ޚޮޝްރޫ އިތުރަށް ވިދާޅުވީ، އެމެރިކާއިން މިހާރު ހިންގަމުންދަނީ 1981 ވަނަ އަހަރު އީރާނާއި އެމެރިކާ އާއި ދެމެދު ވެވުނު އެލްގިއަރޒް އެކޯޑާ ވެސް ޚިލާފު ކަންތައްތަކެއް ކަމަށެވެ.

އެލްގިއަރޒް އެކޯޑްގައި އެމެރިކާއިން އެއްބަސްވެފައި ވަނީ، "ސިދާކޮށް، ނުވަތަ ނުސީދާކޮށް ވިޔަސް، ސިޔާސީ ގޮތުން އަދި އަސްކަރީ ގޮތުން ވިޔަސް، އީރާނުގެ އެތެރޭގެ ކަންކަމާ ނުބެހުމަށެވެ."

އިރާނުން މިފަދައިން މައްސަލައެއް ފެންމަތިކޮށްފައި މި ވަނީ، ޖޫން 14 ވަނަ ދުވަހު، އެމެރިކާގެ ޤާނޫނުހަދާ މަޖިލީހުގެ ފޮރިން އެފެއާޒް ކޮމިޓީގައި ޓިލަރސަން ދެއްކެވި ވާހަކަފުޅަކާ ގުޅިގެންނެވެ.

އެ ކޮމިޓީގައި ވާހަކަ ދައްކަވަމުން، ޓިލަރސަން ވިދާޅުވީ، އެމެރިކާގެ ސިޔާސަތަކީ، އީރާނުން ނިއުކްލިއަރ ހަތިޔާރު އުފެއްދުން ހުއްޓުވައި، އީރާނުގައި ތިބި، ސުލްހަވެރިކަމާ އެކު އެޤައުމުގެ ސަރުކާރު ބަދަލުކުރެވޭނެ ފަރާތްތަކާ އެކު މަސައްކަތް ކުރުން ކަމަށެވެ.

ސަފީރު ޚުޝްރޫ ވަނީ އެމެރިކާގެ މިފަދަ އަމަލުތައް ކުށްވެރިކުރުމަށް ހުރިހާ ޤައުމުތަކަށް ގޮވާލައްވާފައެވެ.