ރަސްމާލޭގެ މަސައްކަތްތައް ކުރިއަށްދޭ، މިހާތަނަށް 52.15 ހެކްޓަރުގެ ބިން ވަނީ ހިއްކާފައި: އެޗްޑީސީ
23 މާރިޗު 2025 | އާދީއްތަ 08:21"އޭރިއާ ޖޭ" ގައި ހިމެނޭ 29 ހެކްޓަރު ބިން ހިއްކާ ނިމިފައިވޭ
"ރަސްމާލެ" ހިއްކަނީ
ފުށިދިއްގަރުފަޅު ހިއްކައިގެން ތަރައްގީ ކުރާ ރަސްމާލޭގެ މަސައްކަތްތައް ކުރިއަށްދާ ކަމަށާއި، މަޝްރޫއު ހިއްކުމުގެ މަސައްކަތުގެ ދަށުން މިހާތަނަށް 52.15 ހެކްޓަރުގެ ބިން ހިއްކާފައިވާ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)އިން ބުނެފި އެވެ.
ދައުލަތުގެ މީޑީއާއަށް އެޗްޑީސީން ހިއްސާކޮށްފައިވާ މައުލޫމާތަށް ބަލާއިރު، މާރިޗު މަހުގެ 9 ވަނަ ދުވަހާ ހަމައަށް "އޭރިއާ ޑީ، އެފް، ޖީ އަދި އެލް" ހިމެނޭ ސަރަހައްދުތަކުން 52.15 ހެކްޓަރުގެ ބިން ހިއްކާ ނިންމާފައިވާ ކަމަށެވެ. އަދި "އޭރިއާ ޖޭ" ގައި ހިމެނޭ 29 ހެކްޓަރު ބިން ހިއްކާ ނިމިފައިވާ ކަމަށް އެޗްޑީސީން ބުނެއެވެ.
މީގެ އިތުރުން އެޗްޑީސީން ބުނީ މި ސަރަހައްދުތަކުން ޖުމްލަ 378 ހެކްޓަރުގެ ބިން ހިއްކާނެ ކަމަށެވެ.
މި މަޝްރޫއުގެ މަސައްކަތް ފުރަތަމަ ފަށާފައިވަނީ 18 ޑިސެންބަރު 2023 ގައެވެ. ނަމަވެސް މަސައްކަތް ފަށައި، ކުޑަ ދުވަސްކޮޅެއްގެ ތެރޭގައި މަސައްކަތް ވަނީ ހުއްޓިފައެވެ. ނަމަވެސް މި އަހަރަށް ރައްޔިތުންގެ މަޖިލިސް ހުޅުވާދެއްވައި 6 ފެބްރުއަރީ 2025 ގައި އިއްވެވި ރިޔާސީ ބަޔާނުގައި ރައީސް ޑރ. މުހައްމަދު މުއިއްޒު ވިދާޅުވީ ބޯހިޔާވަހިކަމުގެ ގިނަ މަޝްރޫއުތަކުގެ އަމަލީ މަސައްކަތް ފަށައި، ރަސްމާލެ މިއަހަރު ހިއްކާ ނިންމާނެ ކަމަށެވެ.
ރަސްމާލޭގެ ނަމުގައި ތަރައްގީކުރާ ފުށިދިއްގަރު ފަޅުން 1153 ހެކްޓަރުގެ ބޮޑު ސަރަހައްދެއް ހިއްކަން ވަނީ ނިންމާފައެވެ.
