އައްޑޫ ބިޔުރޯ

"އިސްތިއުފާ, ނާޤާބިލް ވެރިން އިސްތިއުފާ" މިއީ މިއަދު މިރާއްޖޭގެ ހުރިހާ ދިމާލަކުން އިވޭ އެއް އަޑެއެވެ. ވެރިކަމަށް ރައީސަކު އިންތިޚާބު ކުރަނީ ބަދަލަކަށް އެދިގެންނެއެވެ. ރާއްޖޭގެ ތާރީޚުގައި އަބަދުވެސް ކަން ހިނގަމުންދާ އުސޫލަކީ މިއީ އެވެ. ކޮންމެ ފަސް އަހަރަކުން އައު ރައީސަކު އިންތިޚާބު ކުރަންޖެހެއެވެ. މިއީވެސް ކުރީގެ ތިބި ވެރިންނަށް ވުރެ ކަންކަން ރަނގަޅަށް ގެންދިއުމުގެ ބޭނުމުގައެވެ.

ވާނީވެސް އެހެންތާ އެވެ. އެތައް އަހުދަކާއި ވައުދެއް ރައްޔިތުންނަށް ވެއެވެ. ހަމަ އެރައްޔިތު މީހާވެސް މިވާހަކަތައް އަޑު އަހައި ޤަބޫލުކުރެއެވެ. އެއީ ވެރިކަމުގައި ހުންނަވާ ބޭފުޅާއަށްވުރެ ބޮޑަށް، އަލަށް ވެރިކަމަށް ވަޑައިގަންނަވާ ބޭފުޅަކު ރަނގަޅު ވެދާނެ ކަމަށް ހީކޮށްގެންނެ އެވެ. ރައްޔިތުންގެ އުއްމީދުތައް ވިއްސިވިހާލިވާ ހިސާބަކީ ރައްޔިތުންނަށް ވާ ވައުދުތައް ނުފުއްދުމެއެވެ. އެހިސާބުން ކެތްކޮށްލައެވެ. ނަމަވެސް ކަންކަން ރަނގަޅު ނުވެ ދުވަސްތައް ދިގުލައިދާ ހިސާބަކީ ރައްޔިތުން މަގުމައްޗަށް ނިކުންނަ ހިސާބެވެ. ވަލިއްޔުލްއަމްރަށް އަޑު އިއްވުމަށެވެ. ސަރުކާރުން އެކަށީގެންވާ ޖަވާބެއް ލިބުމުގެ އިންތިޒާރުގައެވެ. އެވަރުންވެސް އަޑު ނީވުމުން ދެން ގޮވަން ޖެހެނީ ވެރިންގެ އިސްތިއުފާއަށެވެ. އެހިސާބުން ކަންތައް ގޯސްވެއެވެ. އިސްތިއުފާއަށް ގޮވާ މީހާ ކުށްވެރިއަކަށް ބަދަލުވެއެވެ. ތުހުމަތުތަކެއްކޮށް ދެއިރު ދެދަޅަށް ފުލުސް އޮފީހަށް ހާޒިރުކުރަން ފައްޓައެވެ.

އަނެއްކާވެސް ރައްޔިތުން ރުޅިގަދަ ކުރެއެވެ. މިއަދުގެ ހާލަތަކީ މިއީއެވެ. އެއްވެސް ކަމެއް ރަނގަޅަކަށް ނުދެއެވެ. ރައްޔިތުންނަށް ދޭން ވައުދުވި ބޯހިޔާވަހިކަން ފޭރިގަތީއެވެ. އާސަންދައިން ބޭސް ނުލިބިގެން ބޭސް ސިޓީއަށް ސަލާން ޖަހަން ފެއްޓީއެވެ. ސަރުކާރުގެ މަތި ފަޑީގައި ކޮރަޕްޝަނުގެ ވަބާ އިންތިހާއަށް ބޮޑުވީއެވެ. ރާއްޖޭގެ ތަރައްޤީއަށް ކުރަމުންދާ މަސައްކަތެއް ފެންނާކަށް ނެތެއެވެ. ދަރަނި ދުވަހެއް ދުވަހަކަށް ބޮޑުވަމުންދާ ވާހަކަ އަޑު އިވެނީއެވެ. މިއިން ކޮންމެ ކަމަކުންވެސް ރައްޔިތުން ވެއްޓެނީ ހާސްކަމެއްގެ ތެރެއަށެވެ. މުޅި ދައުލަތް އޮތީ ވަކި ބޭފުޅެއްގެ އަތްޕުޅުގައެވެ. މިހެންގޮސް ކިޔާނެ ކަމެއް ނެތެއެވެ. ރައްޔިތަކަށް ކުރެވޭނެ އެއްވެސް ކަމެއް ނެތެއެވެ.

މިހާހިސާބަށް ކަންކަން ގޮސްފައި އޮއްވާ އަނެއްކާ ދެން އަޑު އިވިގެން މިދިޔައީ ދިރިއުޅުމުގެ ކަންކަން އެންމެ ނާޒުކު ހާލަތުގައި ތިބި ލޭ އަޅާ މީހުންގެ ލޭތައް އުކާލަންޖެހޭ މައްސަލަ ބޮޑުވެ، އިހުތިޖާޖުކުރަން ފެއްޓި ވާހަކައެވެ. އަބަދުވެސް ދަތިތަކާއި އެކު ދިރިއުޅުމުގެ ކަންކަން ހަމަޖައްސަމުން އަންނަ މިފަރާތްތަކަށް، މިއަދު ލޭ ފޮދުވެސް ނުލިބި އުކާލަންޖެހޭ ހިސާބަށް ކަންތައްދިއީއެވެ. ދެރަވަރުގެ ކަންކަމެވެ. މުޒާހަރާކުރި މީހުންގެ ތެރޭގައި ހުރި މީހަކު ބުނާތީ އަޑު އިވުނެއެވެ. ކޮނޑިކޮޅަށް ހޫނު ކުރަން ތިބެނީއެވެ. ސިޔާސީ ގޮތުން އަންނަ މީހާ ވިސްނަނީ އޭނާގެ މަންފާއަށެވެ. މިކަން ތަހައްމަލު ކުރަމުންދާ މީހުންގެ އެއްވެސް ކަމެއް އިހްސާސެއް ނުވެއެވެ. ނާޤާބިލް މީހުން އިސްތިއުފާ ދޭން ވީނޫންތޯ އެވެ. މިއަދު މި ރާއްޖޭގައި ވެރިމީހާއަށް އިސްތިއުފާ ގޮވާއި، ނޯޓްކޮޅުގައި ލިޔެގެން ތިބި އެތައް ހާސް ރައްޔިތުންނެއް އެބަތިއްބެވި އެވެ.

ލޭ އަޅައި ޕޭޝަންޓުންނަށް ވެރިން ދިނީ ބީރު ކަންފަތެކެވެ. މާލޭގެ ކަންކަން މިހާލަތުގައި ހުރި އިރު، ރާއްޖޭގެ އެހެން ރަށްރަށުގައި އަދި މާ ހާލު ދެރައެވެ. މިޕޭޝަންޓުން ތަހައްމަލު ކުރަމުންދާ ވޭން އިސްސާސްވެސް ނުކުރެވޭނެ އެވެ. ބޭސް ލިބުމުގެ ދަތިކަމާއި ކުރިމަތިލާން ނުޖެހޭ ދުވަހެއް ނުދެއެވެ. ކޮންމެ ރެއަކު 4 ނޫނީ 5 ލޭ ޕެކެޓު އުކާލަން ޖެހޭ ދުވަސް ގިނައެވެ. ތެލަސީމިއާ ސްޕެޝަލިސްޓެއް މިއަދާއި ހަމައަށް ވެސް ގެނެވިފައެއް ނުވެއެވެ. 40 އަހަރުން މަތީގެ ތެލަސީމިއާ މީހުންނަށް ވެސް ފަރުވާ ކުރަން ހުރީ ކުޑަކުދިންގެ ޚާއްސަ ޑޮކްޓަރެކެވެ. މިކަންކަމަށް ޖަވާބުދާރީ ވާނީ ކާކުތޯ އެވެ. މި ފަރާތަތްކުން މިވާހަކަ އަޑު އިއްވަން ދާނީ ކޮންވެރިއެއްގެ ކައިރިއަށްތޯއެވެ. މުޒާހަރާކުރި ތަނަށް ވަޑައިގެންނެވި ބޭފުޅުންވެސް ތަން ދޫކުރައްވާ ވަޑައިގެންނެވީއެވެ.

މިއަދު ރައްޔިތުންގެ ހާލަތު ކޮންމެ ދިމާލަކުން ބެލިކަމުގައިވީ ނަމަވެސް ވަރަށް ދެރަވަރުއެވެ. ރައްޔިތުންނަށް ކެތް ނުވެގެން ބުނަން އޮތީ ހަމަ އެއްޗެކެވެ. އިސްތިއުފާއެވެ. ދެއްކުންތެރިކަމެއް ބޭނުމެއް ނޫނެއެވެ. ނާޤާބިލް ވެރިން އިސްތިއުފާ ދޭންވީއެވެ.