ފިތުރު އީދާ ގުޅިގެން އަންނަ ހޮނިހިރު ދުވަހުގެ ރޭ މުޅި ރާއްޖެ ބޮކިތަކުން ދިއްލޭނެ ކަމަށް މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސްއިން ބުނެފިއެވެ.

މިނިސްޓްރީގެ އިތުރުން، ސަރުކާރުގެ ބައެއް ކުންފުނިތަކާއި، ކައުންސިލް ގުޅިގެން ރާއްޖެ ދިއްލައިލުމަށް ކުރަންޖެހޭ މަސައްކަތްތައް ދަނީ ކުރަމުންނެވެ.

މި މަސައްކަތާ ގުޅޭގޮތުން މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވާރކްސް އާދަމް ޝަރީފު އުމަރު ވިދާޅުވީ މި މަހުގެ 29 ވަނަ ދުވަހުގެ ރޭ އީދު ލައިޓްތައް ދިއްލިގެންދާނެ ކަމަށާއި، ސަރުކާރުގެ ކުންފުނިތަކާ ގުޅިގެން މި އީދުގައި ވަރަށް ޚާއްސަ ހަރަކާތެއް މާލޭގައި ކުރިއަށްދާނެ ކަމަށެވެ. އަދި މާލޭސިޓީގައި އީދުލައިޓްތައް ޖެހުމުގެ މަސައްކަތް ވަރަށް ފޯރީގައި މިހާރު ފެށިގެން ކުރިއަށްދާކަން ފާހަގަކުރެއްވިއެވެ.

މުޅި ރާއްޖެ ހަރަކާތަށް އިޝާރާތް ކުރައްވައި އާދަމް ޝަރީފް ވިދާޅުވީ މި ދިއްލުން ވެގެން ދިޔައީ ކުޑަކުދިންނާއި، ޒުވާނުންގެ ޝައުގުވެރިކަން ވަރަށް ބޮޑަށް އިތުރުވެގެން ދިޔަ މަގުބޫލު ހަރަކާތަކަށް ކަމަށެވެ.

މި ދިޔަ އަހަރު ދިއްލި ރަށްތަކާއި، ސިޓީތަކުގެ އިތުރުން މި އަހަރު އިތުރު 36 ރަށަކަށް އީދު ލައިޓްތައް ފޮނުވާނެ ކަމަށް މިނިސްޓްރީން ބުނެއެވެ. އެގޮތުން އަލަށް ދިއްލޭ 36 ރަށަށް ފޮނުވާ ލައިޓްތަކާއި، ސްޕީކަރުތައް މި މަހުގެ 24 ވަނަ ދުވަހު ރަށްރަށަށް ފޮނުވުމުގެ މަސައްކަތް ކުރިއަށްދާނެ ކަމަށް ދިއްލުމުގެ ހަރާކާތު ކޮމިޓީން މައުލޫމާތުދީފައިވެއެވެ.

އީދާ ގުޅިގެން ގެންނަ ލައިޓްތަކާއި، ބޮކިތަކަށް 28 މިލިއަން ރުފިޔާ ހަރަދުވާނެ ކަމަށް މިނިސްޓަރ އާދަމް ޝަރީފް އުމަރު މީގެ ކުރިން ވިދާޅުވެފައިވެއެވެ. އެކަމާއި ގުޅިގެން ގިނަ ބައެއްގެ ފާޑުކިޔުން ވެސް ވަނީ އަމާޒުވެގެން ގޮސްފައެވެ.

މި އަހަރު "ޢީދު އަލި" ދިއްލުމުގެ ބޮޑު އިވެންޓް ބޭއްވުމަށް ހަމަޖެހިފައި ވަނީ މި މަހުގެ 29 ވަނަ ދުވަހުގެ ރޭ ހުޅުމާލޭ ސެންޓްރަލް ޕާކުގައެވެ. މި އިވެންޓްގައި ރައީސުލްޖުމްހޫރިއްޔާ ޑރ. މުއްމަދު މުއިއްޒު ބައިވެރިވެވަޑައިގަންނަވައި ގޮތަށް ވަނީ ހަމަޖެހިފައެވެ.