ސީިރިއާގެ އަސްކަރީ ދެ މަރުކަޒަކަށް ހަމަލާ ދީފައިވާ ކަމަށް، އިސްރާއީލްގެ އަސްކަރިއްޔާ އިން ބުނެފި އެވެ.

އިސްރާއީލްގެ އަސްކަރިއްޔާ އިން ބުނެފައިވާ ގޮތުގައި، އެ ޤައުމުން ވަނީ ސީރިއާގެ މެދު ތެރޭގައި ހުރި އަސްކަރީ ދެ މަރުކަޒަކަށް ހަމަލާ ދީފަ އެވެ. އޭގެ ތެރޭގައި ޕަލްމީރާގައި ހުރި މަރުކަޒެއް ހިމެނޭ ގޮތަށް ހަމަލާ ދީފައިވާ ކަމަށް ބުނެފައިވެ އެވެ. 

އިސްރާއީލް ސިފައިންގެ ބަޔާނުގައި ބުނެފައިވާ ގޮތުން، އެ އަސްކަރިއްޔާ އިން ވަނީ ތަދްމުރު އަދި ޓީ4 އަސްކަރީ މަރުކަޒު ތަކުގައި ހުރި ސްޓްރެޓެޖިކް ޤާބިލިއްޔަތު ތަކަށް ހަމަލާދީފައި އެވެ.

މި މަރުކަޒުތައް ހުރީ ޕަލްމީރާ އަދި އެ ސަރަހައްދުން 50 ކިލޯމީޓަރު ހުޅަނގަށް ވާ ހިސާބުގައި އެވެ. ބްރިޓަންގައި މައި އޮފީސް ޤާއިމު ކޮށްފައިވާ ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ބުނެފައި ވަނީ "އިސްރާއީލްގެ ހަނގުރާމަ މަތިންދ ާބޯޓު ތަކުން ޕަލްމީރާ އަސްކަރީ ވައިގެ ބަނދަރަށް އަމާޒުކޮށް ހަމަލާދީފައިވާ" ކަމަށެވެ.

މިދިޔަ ޑިސެމްބަރު މަހުގައި ސީރިއާގެ ކުރީގެ ރައީސް ބައްޝާރުލް އަލް-އައްސަދުގެ ވެރިކަން ވައްޓާލުމަށް ފަހު، އިސްރާއީލުން ވަނީ ސީރިއާގެ އަސްކަރީ މަރުކަޒުތަކަށް ސަތޭކައަށް ވުރެ ގިނަ ހަމަލާ ދީފައި އެވެ.

އިސްރާއީލުން ބުނާ ގޮތުގައި، މިއީ ސީރިއާގެ ވެރިކަމުގެ އަތް މައްޗަށް ހަތިޔާރު ނުފޯރުވުމަށް ކުރާ މަސައްކަތެކެވެ. އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ވަނީ، ދެކުނު ސީރިއާ ހަތިޔާރުން އެއްކިބާ ކުރުމަށް ގޮވާލައްވައި، ދިމިޝްކުގެ ދެކުނުގައި އައު ވެރިކަމުގެ ބާރުތައް ބޭއްވުމަށް ހުއްދަ ނުދޭނެ ކަމަށް ބުނެފައި އެވެ.

ސީރިއާގެ ޚާރިޖީ ވުޒާރާ އިން ބުނެފައިވަނީ، އިސްރާއީލުން "ޤައުމުގެ އިސްތިޤްރާރަށް" ބުރޫ އަރުވަމުންދާ ކަމަށެވެ.