މޯލްޑިވްސް ބްލަޑް ސަރވިސްއަށް ލިބިފައިހުރި ފިލްޓަރތަކުގެ މައްސަލައެއް ދިމާވެ، ލޭ އަޅާ މީހުންގެ ލޭތައް އުކާލަން ޖެހޭ މައްސަލަ ބޮޑުވެއްޖެއެވެ.

މިމައްސަލަ ބޮޑުވުމާއި ގުޅިގެން ލޭއަޅާ ބައެއް މީހުންގެ ކަންބޮޑުވުންތައް ސޯޝަލް މީޑިއާގައި ހިއްސާކޮށްފައިވެ އެވެ.

މި މައްސަލަ ދިމާވަމުންދާތާ ދުވަސްކޮޅެއް ވެފައިވާކަން ފާހަގަކޮށް ބައެއް ޕޭޝަންޓުން ބުނެފައިވަނީ ލޭގެ ޕެކުގައި ގިނަ އަދަދަކަށް ލޭ ބާކީ ވެފައި ހުންނަ ކަމަށާއި، ބައެއް ޕެކްތައް ގޯސްވުމުގެ ސަބަބުން އެހެން ފިލްޓަރެއް ބަދަލުކުރަން ޖެހި އިސްރާފު ބޮޑުވާ ކަމަށެވެ. އަދި ހައްގުތައް ކަށަވަރުކޮށްދޭން ޖެހޭ ކަމަށާއި، މި މައްސަލައަށް އަވަސް ދާއިމީ ހައްލެއް ހޯދައިދިނުމަށް ލޭ އަޅާ ޕޭޝަންޓުން ގޮވާލާފައިވެ އެވެ.

މި މައްސަލަ ދިމާވި ޕޭޝަންޓެއް ބުނެފައިވަނީ ދެހަފްތާ މަސައްކަތް ކޮށްގެން ހޯދާ ލޭ އުކާލަން ޖެހިފައިވާ ކަމަށާއި، ބްލަޑް ސަރވިސްއަށް ލިބިފައި ހުރި ފިލްޓަރތަކުގައި މައްސަލަ އުޅޭ ކަމަށެވެ. އަދި މައްސަލަ އުޅޭކަން އެނގޭއިރު ވެސް މެނޭޖްމަންޓުން ތިބީ ބީރު ކަންފަތެއް ދީގެން ކަމަށެވެ. އެނގިގެން އެއްރޭ 5 ޕޭޝަންޓެއްގެ ފިލްޓަރ މައްސަލަ ޖެހުނު ކަމަށް ބުނެފައިވެ އެވެ.

ކަންބޮޑުވުންފާޅު ކުރި އިތުރު ލޭ އަޅާ ޕޭޝަންޓެއް ބުނީ އެވްރެޖްކޮށް ރޯދަމަހު ކޮންމެ ރެއަކު 4 އާއި 5 އާއި ދެމެދުގެ އަދަދަކަށް ލޭ ޕެކް، ގާތްގަނޑަކަށް ދެބައިކުޅަ އެއްބައި، އުކާލާފައި ވަނީ ފެންވަރު ދަށް ފިލްޓަރުތަކެއް ހުރުމުން ކަމަށެވެ. މިކަމުގެ ސަބަބުން ޚިދުމަތުގެ ފެންވަރަށް އަސަރުކުރުމުގެ އިތުރުން މި މުއްދަތުގައި ލޭ ހަދިޔާކުރާ މީހުން ހޯދުމުގެ ގޮންޖެހުން އިތުރުވެގެންދާ ކަމަށެވެ.

ބަލިމީހުންނަށް އިތުރު ޑޯނަރުން ހޯދައި ގިނައިން ޓްރާންސްފިއުޝަން ދޭން ޖެހިފައިވާއިރު، ހީމޯގްލޯބިންގެ މިންވަރު އިތުރުވެ، އޭގެ ސަބަބުން ފުރާނައަށް ނުރައްކާވެދާނެ ކަމަށް ވެސް ބައެއް ޕޭޝަންޓުން ބުނެފައިވެ އެވެ.

މީގެ އިތުރުން ލޭ ލިބެނީ ވަރަށް މަސައްކަތުން ކަމަށާއި، އިހުމާލުން ދިމާވާ މައްސަލައަކާ ގުޅިގެން ލޭ އުކާލަން ޖެހުމަކީ ވަރަށް ބޮޑު ދެރަ ކަމެއް ކަމަށް ޕޭޝަންޓުން ބުނެފައިވެއެވެ. އަދި ނަރުހުންނަށް ވެސް އަބަދު ފިލްޓަރ ބަދަލުކޮށް ނުވަތަ ފިލްޓަރއަށް މައްސަލަ ދިމާވެތޯ ބަލަން ނުތިބެވޭނެ ކަމަށް އެމީހުން ބުނެފައިވެ އެވެ.

ލޭ އުކާލަންޖެހޭ މައްސަލައާ ގުޅިގެން ގިނަ ބައެއްގެ ފާޑުކިޔުން ހެލްތް މިނިސްޓްރީއަށް ވަނީ އަމާޒުވެފަ އެވެ. އަދި ސިއްހީ ނިޒާމު އެއްކޮށް ފެއިލް ކޮށްލާފައިވާ ކަމަށް ބައެއް މީހުން ބުނެފައިވެ އެވެ.

މި މައްސަލައާ ގުޅިގެން ހެލްތް މިނިސްޓްރީގެ އަދި ބްލަޑް ސަރވިސްގެ ބަހެއް ވަނީ ލިބޭ ގޮތް ނުވެފަ އެވެ.