ވިލާ ގުރޫޕް ރިސޯޓް ތަކުގެ މަސައްކަތްތެރިންނަށް ސާވިސްޗާޖު ނުދޭނަމަ މުޒާހަރާއަށް ނުކުތުމަށް ގޮވާލައިފި
ވިލާ ގުރޫޕް ރިސޯޓް ތަކުގެ މަސައްކަތްތެރިން ދެ މަހު ސާވިސްޗާޖު ނުދޭ
މާމިގިލި ދާއިރާގެ މެންބަރު އަދި ވިލާ އެއަރގެ ޗެއަރަމަން ގާސިމް އިބްރާހިމް
ވިލާ ގުރޫޕް ރިސޯޓް ތަކުގެ މަސައްކަތްތެރިންނަށް ސާވިސްޗާޖު ނުދޭނަމަ މުޒާހަރާއަށް ނުކުތުމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފު ޒާކިރު ގޮވާލައްވައިފި އެވެ.
ވިލާ ގުރޫޕް ރިސޯޓް ތަކުގެ މަސައްކަތްތެރިން ދެ މަހު ސާވިސްޗާޖު ނުދޭ ކަމަށް ބުނެ ގިނަ އަަދަދެއްގެ މުވައްޒަފުން އަންނަނީ ކަންބޮޑުވުންފާޅު ކުރަމުންނެވެ. ގާނޫނު އަސާސީން މަނާވި ނަމަވެސް ސާވިސްޗާޖު ލިބޭ ދުވަހެއް ވެސް ނޭނގޭ ކަމަށް އެމީހުން ބުނެއެވެ.
މި މައްސަލައާއި ގުޅިގެން މެންބަރު މައުރޫފު ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ ރަމަޟާން މަހުވެސް ވިލާ ގުރޫޕް ރިސޯޓް ތަކުގެ މަސައްކަތްތެރިން ތިބީ ދެމަހުގެ ސާވިސްޗާޖް ނުދިނުމުގެ ސަބަބުން ބޭނުންވާ ޒަރޫރީ ބޭނުންތައް ނުފުދިފައި ކަމަށާއި، ބިލްތައް ނުދެއްކޭ ކަމަށެވެ. ނަމަވެސް އާއިލާއާ ދުރުގަ ވަޒީފާއަދާ ކުރަމުންދާ ކަމަށް އޭނާ ވިދާޅުވިއެވެ.
ލިބެންޖެހޭ ސާވިސްޗާޖް ނުދީ ހިފެހެއްޓުމުގެ ސަބަބުން ވަރަށް ގިނަ ދަތިތަކަކާ ކުރިމަތިލާން ޖެހިފައިވާކަން ފާހަގަކުރައްވައި މެންބަރު މައުރޫފު ވިދާޅުވީ މިއީ އަބަދުވެސް މި ރިސޯޓުތަކުގައި ވަޒީފާ އަދާ ކުރާ މުވައްޒަފުންގެ ހާލުކަމަށް މުވައްޒަފުން ބުނާ ކަމަށެވެ.
މެންބަރު މައުރޫފު ވަނީ އެންމެ ދުވަހެއްވެސް ލަސްނުކޮށް ސާވިސްޗާޖް މުވައްޒަފުންނަށް ދިނުމަށް ގޮވާލައްވާ ފައެވެ. ސާވިސް ޗާޖް ނުދީ ލަސް ކުރާނަމަ ހަޅުތާލު ކުރުމަށް ވެސް އޭނާ ގޮވާލައްވާ ފައިވެއެވެ. އަދި މިއަދު މިފަދަ މައްސަލައެއް ބަލައި އިންސާފު ހޯދައިދޭނެ އިދާރާއެއް މި ގައުމަކު ނެތް ކަމަށްވެސް މެންބަރު މައުރޫފު ވިދާޅުވި އެވެ.
