ފޮތްތައް ދޫކުރުމުގައި ލަހެއް ނުވޭ، މުވައްޒަފުންނަށް މަސައްކަތް ބުރައެއް ނުވާނެ: މިނިސްޓަރު ޝަފީއު
21 މާރިޗު 2025 | ހުކުރު 12:57މުވައްޒަފުންނަށް ދަތިނުވާނެ ގޮތަށް އިންތިޒާމުތައް ހަމަޖެއްސުމަށް އަންގާފައިވޭ
މުދައްރިސުންގެ ކިޔަވައިދިނުމުގެ ހުނަރު އިތުރު ކުރުމަށް ކުރިއަށްގެންދިޔަ ޕްރޮގްރާމެއްގެ ތެރެއިން
ސްކޫލުގެ ދަރިވަރުންނަށް ފޮތް ދޫކުރުމުގައި ލަސްތަކެއް ކުރިމަތިވެ، އިދާރީ މުވައްޒަފުންނަށް މަސައްކަތްތައް ބުރަވެފައިވާ ކަމަށް ދެކެވޭ ވާހަކަތައް އެޑިޔުކޭޝަން މިނިސްޓަރު ޑރ.އިސްމާއީލް ޝަފީއު ދޮގުކުރައްވައިފި އެވެ.
މިކަން މިނިސްޓަރު ޝަފީއު ދޮގުކުރެއްވީ ސްކޫލުގެ ދަރިވަރުންނަށް ފޮތް ދޫކުރުމުގައި ލަސްތަކެއް ކުރިމަތިވެ، އިދާރީ މުވައްޒަފުންނަށް މަސައްކަތްތައް ބުރަވެފައިވާ ކަމަށް އެޑިޔުކޭޝަން މިނިސްޓްރީގެ އިސް އޮފިޝަލެއް މައުލޫމާތު ދިނުމާއި ގުޅިގެންނެވެ.
ރާއްޖެއެމްވީއަށް ނަން ނުޖެހުމަށް ޝަރުތުކޮށް އޮފިޝަލް ވިދާޅުވީ ފޮތްތައް ދޫކުރުމުގައި އެއްވެސް ކަހަލަ ރޭވުންތެރިކަމެއް ނެތް ކަމަށާއި، ވަރަށް ބޮޑަށް ލަސްވެފައިވާ ކަމަށެވެ. އަދި ރަމަޟާން މަހުގެ ފަހު 10 ސަރުކާރު ބަންދުކުރި ނަމަވެސް ސްކޫލުތަކުގެ އިދާރީ މުވައްޒަފުންނާއި، އެޑިޔުކޭޝަންގެ ބައެއް މުވައްޒަފުންގެ މަސައްކަތަށް ވަރަށް ބާރު ބޮޑުވެފައިވާ ކަމަށް އޭނާ ވިދާޅުވި އެވެ.
މިހެން ދިމާވީ އެޑިޔުކޭޝަން މިނިސްޓްރީގެ އިހުމާލުކަން ފާހަގަކުރައްވައި އޭނާ ވިދާޅުވީ ސްކޫލުތައް ޗުއްޓީއަށް ދިޔައިރު ފޮތްތައް ދޫކުރުމުގެ މަސައްކަތް ކުރެވިފައިނުވާ ކަމަށެވެ. އަދި ބައެއް މާއްދާތަކުގެ ކަރިކިއުލަމް ބަދަލުވާތީ ފޮތް ޗާޕު ކުރަންޖެހޭ ކަމަށާއި، އެ މަސައްކަތް ވެސް ކުރަން ފަށާފައިވަނީ ސަރުކާރު ބަންދުވުމުން ކަމަށެވެ.
މީގެ އިތުރުން އޭނާ ވިދާޅުވީ އިދާރީ މުވައްޒަފުންނަށް ގިނަ ވަގުތު މަސައްކަތުގައި އުޅެންޖެހިފައިވާތީ، ގިނަ މުވައްޒަފުންގެ ޝަކުވާ ވަރަށް ބޮޑު ވެފައިވާ ކަމަށެވެ.
މިމައްސަލައާ ގުޅިގެން ރާއްޖެއެމްވީއަށް އެޑިޔުކޭޝަން މިނިސްޓަރު ޑރ.އިސްމާއީލް ޝަފީއު ވިދާޅުވީ އެއީ ހަގީގަތެއް ނޫން ކަމަށާއި، ވަރަށް ރޭވުންތެރިކަމާއެކު މަސައްކަތްތައް ކުރިއަށްދާ ކަމަށެވެ. ކޮންމެހެން ދޭންޖެހޭ ޚިދުމަތްތައް ދިނުމަށް ކުރިން ވެސް އޮންނަ އުސޫލުގެ ތެރެއިން މަސައްކަތްތައް ކުރިއަށްދާ ކަމަށާއި، މުވައްޒަފުންނަށް ދަތިނުވާނެ ގޮތަށް އިންތިޒާމުތައް ހަމަޖެއްސުމަށް އަންގާފައިވާ ކަަމަށް މިނިސްޓަރު ޝަފީއު ވިދާޅުވި އެވެ.
މިނިސްޓަރު ޝަފީއު ވިދާޅުވީ ޗާޕު ކުރަންޖެހޭ ފޮތްތައް ޗާޕުކޮށް ނިމިފައިވާ ކަމަށާއި، ރާއްޖެއިން ބޭރުން ގެންނަ ބައެއް ފޮތްތައް އަންނަ ހަފްތާ ތެރޭގައި ލިބޭނެ ކަމަށެވެ.
އެޑިޔުކޭޝަން މިނިސްޓްރީން ސްކޫލުތަކަށް ފޮނުވި މެސެޖުގައި ބުނީ 2025 މާރިޗު 20 އިން ފެށިގެން ސަރުކާރު ބަންދުވުމާ ގުޅިގެން، ދިރާސީ އަހަރު ފެށުމަށްޓަކައި ވާންޖެހޭ ތައްޔާރީތައްވުމަށާއި މިކަމާ ގުޅިގެން ބެލެނިވެރިންނަށް ކޮންމެހެން ދޭންޖެހޭ ޚިދުމަތްތައް މެދުނުކެނޑި ދިނުމަށްޓަކައި، މިނިސްޓްރީއާއި ސްކޫލްތަކުގެ ކައުންޓަރުގެ ޚިދުމަތް މާރިޗު މަހުގެ 27ގެ ނިޔަލަށް ދިނުމަށް ނިންމާފައިވާ ކަމަށެވެ.
އެހެންކަމުން މި މަސައްކަތާ ގުޅޭ މުވައްޒަފުން ބޭނުން ކޮށްގެން 2025 މާރިޗު 20 އިން ފެށިގެން 27ގެ ނިޔަލަށް ކޮންމެ ދުވަހެއްގެ 10:00ން 12:00ށް ސްކޫލްތަކުގެ ކައުންޓަރުގެ ޚިދުމަތް ދެވޭނެ އިންތިޒާމްތައް ހަމަޖެއްސަންޖެހޭ ކަމަށް މިނިސްޓްރީން ބުނެއެވެ. އަދި މިގޮތަށް ހަމަޖެއްސުމުގައި މުވައްޒަފުންނަށް ދަތިނުވާނެގޮތަކަށް ބަހާލައިގެން ކުރިއަށް ގެންދިއުމަށް ވަނީ އެދިފައެވެ.
ރަމާޟާން މަހާ ދިމާކޮށް ދިރާސީ އަހަރުގެ ކިޔެވުން ނިންމައި, ރާއްޖޭގެ ހުރިހާ ސުކޫލެއްގެ ދަރިވަރުންގެ ޗުއްޓީ ފަށާފައިވަނީ 27 ފެބްރުއަރީ 2025 ގައެވެ. ޗުއްޓީ ނިންމައި ސްކޫލުތަކުގެ ކިޔެވުން ފެށޭނީ އޭޕްރީލު މަހުގެ ހަތްވަނަ ދުވަހެވެ.
